• HOME
  • »
  • NEWS
  • »
  • tamil-nadu
  • »
  • சட்டவிரோத காவலில் சூழலியல் போராளி முகிலன்?- கேள்வி எழுப்பும் எவிடென்ஸ் கதிர்

சட்டவிரோத காவலில் சூழலியல் போராளி முகிலன்?- கேள்வி எழுப்பும் எவிடென்ஸ் கதிர்

முகிலன் - கோப்புபடம்

முகிலன் - கோப்புபடம்

"இன்றைய காலகட்டத்தில் சமூகத்துக்காகப் போராடுபவர்களை பயணங்களின் போது கைது செய்வது காவல்துறைக்கு ஃபேஷனாகி உள்ளது"

  • News18
  • Last Updated :
  • Share this:
கடந்த மூன்று நாள்களாக சுற்றுச்சூழலியல் போராளி முகிலனைக் காணவில்லை. ஸ்டெர்லைட் ஆலை தொடர்பான போராட்டக் காலத்தில் நிகழ்ந்த வன்முறைகள் குறித்த ஆதாரத் தொகுப்புகளை கடந்த மூன்று நாள்களுக்கு முன்னர் வெளியிட்ட முகிலன், அன்று இரவு முதல் காணவில்லை.

தமிழ்நாடு சுற்றுச்சூழல் பாதுகாப்பு இயக்கத்தின் ஒருங்கிணைப்பாளரும் சூழலியல் போராளியுமான முகிலன், கடந்த பிப்ரவரி 15-ம் தேதி சென்னையில் “கொளுத்தியது யார்?- ஸ்டெர்லைட் மறைக்கப்பட்ட உண்மைகள்” என்ற தலைப்பில் தூத்துக்குடி ஸ்டெர்லைட் ஆலை தொடர்பாகவும் போராட்டங்கள் தொடர்பாகவும் அறிக்கை வெளியிட்டார்.

அன்று மாலை இறுதியாக நண்பர்கள் அவரை எழும்பூர் ரயில் நிலையத்தில் சந்தித்துள்ளனர். அதன் பின்னர் முகிலன் குறித்து எந்தத் தகவலும் இல்லை.

கடந்த மூன்று நாள்களாக முகிலன் காணவில்லை என அவரது நண்பர்கள், சமூக செயற்பாட்டாளர்கள் எனப் பலரும் சட்டப்பூர்வமாகப் புகார் அளித்தும் வழக்குத் தொடுத்தும் உள்ளனர்.

இவ்விவகாரம் குறித்து எவிடென்ஸ் கதிர் நம்மிடம் பேசுகையில், “தோழர் முகிலனைக் கடந்த மூன்று நாள்களாகக் காணவில்லை. இது முற்றிலும் தமிழகக் காவல்துறையின் சட்டத்துக்குப் புறம்பான செயல்பாடாகத் தான் உள்ளது. இன்றைய காலகட்டத்தில் சமூகத்துக்காகப் போராடுபவர்களை பயணங்களின் போது கைது செய்வது காவல்துறைக்கு ஃபேஷனாகி உள்ளது.

எவிடென்ஸ் கதிர்


அன்று ஐ.நா.வில் பேசி நாடு திரும்பிய திருமுருகன் காந்தியும் இவ்வாறுதான் கைது செய்யப்பட்டார். நக்கீரன் கோபாலையும் இதுபோலவே விமான நிலையத்தில் வைத்துக் கைது செய்தனர். இன்று, ரயில் பயணத்திலிருந்த தோழர் முகிலனை தமிழகக் காவல்துறை சட்டவிரோத காவலில் வைத்துள்ளது.

இது அராஜகம். கருத்து சுதந்திரத்துக்கும் ஜனநாயகத்துக்கும் எதிரான காவல்துறையின் அராஜகம். அரசு மற்றும் காவல்துறையினர் தூத்துக்குடியில் நடத்திய அராஜகத்தை வெட்ட வெளிச்சமாக்கிய அன்றிலிருந்து முகிலன் என்ன ஆனார் என்றே தெரியவில்லை. மாஃபியா கும்பல் போல் செயல்படுகிறது காவல்துறை.

ஒருவரைக் கைது செய்தால் 24 மணி நேரத்தில் நீதிமன்றத்தில் ஆஜர்படுத்த வேண்டும் என்பதுதான் சட்டம். போராளி ஒருவரின் கருத்தை எதிர்கொள்ள தைரியமில்லாத காவல்துறையும் அரசும் சேர்ந்த இந்தக் கடத்தல் வேளையில் ஈடுபட்டுள்ளது.

இதுபோலத்தான் சில மாதங்களுக்கு முன்னர் ஒரு வருட கொடூர காவல்கட்டுப்பாட்டில் இருந்து விடுதலை ஆனார் முகிலன். இந்தியாவில் உள்ள அத்தனை சமூக ஆர்வலர்களுக்கும் இந்த நாட்டில் அச்சுறுத்தல் தான்” என்றார் மிகவும் கடுமையாக.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தைஇங்கே கிளிக்செய்து ஃபாலோ செய்யுங்கள்.. செய்திகளை உடனுக்குடன் பெறுங்கள். Also Follow @ Facebook, Twitter, Instagram, Sharechat,Telegram, YouTube

Published by:Rahini M
First published: