குழந்தைகளின் ஆபாச வீடியோ - தமிழ்நாட்டில் முதல் கைது.. சிக்கியது எப்படி?

கைது செய்யப்படுவோருக்கு 3 முதல் 7 ஆண்டுகள் வரை சிறை தண்டனை

குழந்தைகளின் ஆபாச வீடியோ - தமிழ்நாட்டில் முதல் கைது.. சிக்கியது எப்படி?
கைது செய்யப்படுவோருக்கு 3 முதல் 7 ஆண்டுகள் வரை சிறை தண்டனை
  • News18
  • Last Updated: December 13, 2019, 8:36 AM IST
  • Share this:
குழந்தைகளின் ஆபாச படங்களை பகிர்ந்ததாக, தமிழ்நாட்டில் முதன்முறையாக திருச்சியைச் சேர்ந்த ஒருவர் கைது செய்யப்பட்டு சிறையில் அடைக்கப்பட்டுள்ளார்.

நாடு முழுவதும் குழந்தைகளுக்கு எதிரான பாலியல் குற்றங்களைத் தடுப்பதில், மத்திய, மாநில அரசுகள் கவனம் செலுத்தி வருகின்றன. அதன் ஒருபகுதியாக, குழந்தைகளின் ஆபாச படங்கள் பார்ப்போர் பட்டியலை உள்துறை அமைச்சகம், மாநில அரசுகளுக்கு அனுப்பி வைத்தது. இதையடுத்து, தமிழகத்தில் பெண்கள் மற்றும் குழந்தைகளுக்கு எதிரான குற்றத்தடுப்பு பிரிவு அண்மையில் அறிவிப்பு ஒன்றை வெளியிட்டது.

அதன்படி, குழந்தைகள் தொடர்பான ஆபாச படங்கள், வீடியோக்கள் பார்ப்பது சட்டப்படி குற்றம். செல்போன், லேப்டாப்களில் அந்த வீடியோக்களை வைத்திருப்பதும், டவுன்லோடு செய்வதும் சட்டப்படி குற்றம். மீறி செய்தால் அவர்கள் போக்சோ சட்டத்தில் கைது செய்யப்படுவதோடு, 3 முதல் 7 ஆண்டுகள் வரை சிறை தண்டனை விதிக்கப்படும் எனவும் எச்சரிக்கப்பட்டது.


வெறும் எச்சரிக்கையோடு நிறுத்திவிடாமல் களத்திலும் இறங்கியுள்ளது தமிழக காவல்துறை. முதல் நடவடிக்கையாக திருச்சியைச் சேர்ந்த கிறிஸ்டோபர் என்பவரை, குழந்தைகள் ஆபாச வீடியோவை வெளியிட்டதாக காவல்துறை கைது செய்துள்ளது.

திருச்சி பாலக்கரை காஜாப்பேட்டை புதுத்தெருவைச் சேர்ந்த கிறிஸ்டோபர், ஐடிஐ படித்துவிட்டு ஏ.சி.மெக்கானிக்காக வேலை செய்து வருகிறார். இவர் பெரும்பாலும் நேரத்தை சமூக வலைதளங்களில் செலவிடுவதையே வழக்கமாக கொண்டுள்ளார். அப்போது, குழந்தைகளின் ஆபாச வீடியோக்களை பதிவிறக்கம் செய்தும், அதனை நண்பர்கள் உட்பட பலருக்கும் பகிர்ந்து வந்துள்ளார். தமது அடையாளத்தை மறைக்க, நிலவன், ஆதவன், நிலவன் நிலவன் என்ற பெயரில் போலி கணக்கை தொடங்கி, அதில் ஆபாச வீடியோக்களை பகிர்ந்து வந்துள்ளார்.

அதோடு, மெசஞ்சரில் தனியாக தமது நண்பர்கள் பட்டாளத்தை கொண்ட குழுவை உருவாக்கி, அந்த குழுவிலும் சிறார்களின் ஆபாச வீடியோக்களை பகிர்ந்து வந்துள்ளார்.இதையடுத்து கிறிஸ்டோபரைக் கைது செய்த போலீசார், போக்சோ சட்டத்தில் 3 பிரிவுகள், தகவல் தொழில்நுட்ப பிரிவில் 2 பிரிவுகள் என மொத்தம் 5 பிரிவுகளின் கீழ் வழக்குப்பதிவு செய்துள்ளனர். கடந்த 4 ஆண்டுகளாக குழந்தைகள் ஆபாச படங்களை பார்த்து வருவதாகவும், இதனால், அவற்றிற்கு தான் அடிமையாகிவிட்டதாகவும் கிறிஸ்டோபர் அல்போன்ஸ் ராஜ் வாக்குமூலம் அளித்துள்ளார். திருச்சி மாவட்ட மகளிர் நீதிமன்றத்தில் ஆஜர்படுத்திய பிறகு, 15 நாட்கள் நீதிமன்ற காவலில் திருச்சி மத்திய சிறையில் அடைக்கப்பட்டார்.

இவைதவிர, திருச்சியில் மட்டும் சிறார் வதை ஆபாச வீடியோக்களை வெளியிட்டதாக கூறப்படும் 60 பேரின் ஐ.பி முகவரியை, குழந்தைகளுக்கு எதிரான குற்றத்தடுப்பு பிரிவு, உள்ளூர் போலீசாருக்கு அனுப்பி வைத்துள்ளதாக கூறப்படுகிறது. மற்ற மாவட்டங்களிலும் இது தொடர்பான விசாரணை தீவிரப்படுத்தப்பட்டுள்ளது. இதனால் அடுத்தடுத்து கைது தொடரும் என்று எதிர்பார்க்கப்படுகிறது. சிறார் வதை ஆபாச வீடியோக்களை பதிவிட்டதற்காக தமிழ்நாட்டில் முதன்முறையாக திருச்சியில் ஒருவர் கைது செய்யப்பட்டிருப்பது பரபரப்பை ஏற்படுத்தியுள்ளது.

Also see:

First published: December 13, 2019
மேலும் பார்க்க
அடுத்து செய்திகள்