மின் இணைப்புடன் ஆதார் எண்ணை எப்படி இணைக்கவேண்டும்? எளிய வழிமுறை இதோ..!

தமிழகத்தில் மின் இணைப்புடன் ஆதார் எண்ணை இணைக்க கடந்த டிசம்பர் 31ஆம் நாள் கடைசி தேதி என அறிவிக்கப்பட்டது. பிறகு ஜனவரி 31 ஆம் தேதி வரை இறுதிநாள் நீட்டிக்கப்பட்டது. தமிழகத்தில் மொத்தம் 2.30 கோடி மின் இணைப்புகளும், 22 லட்சம் விவசாய மின் இணைப்புகளும், 11 லட்ச குடிசை வீடுகளுக்கான மின் இணைப்புகளும் உள்ளன. இந்த மின் இணைப்புகளுடன் ஆதார் எண்ணை இணைக்குமாறு தமிழ்நாடு மின் வாரியம் அறிவிப்பை வெளியிட்டு இருந்தது.

இன்னும் 50 லட்சம் இணைப்புகளுடன் ஆதார் எண் இணைக்கப்படவுள்ளதாக தகவல் வெளியாகியுள்ளது. பலருக்கும் சர்வர் பிரச்னை ஏற்பட்டதால், அதன் தேதி நீட்டிக்கப்பட்டு, மின் இணைப்பை ஆதார் எண்ணுடன் இணைக்கும் வழியை மின் வாரியம் எளிமைப்படுத்தியது. இதனால் பயனாளர்கள் 2 நிமிடத்தில் ஆதாரை மின் இணைப்புடன் இணைக்க முடியும்.

இணையம் மூலம் எவ்வாறு ஆதார் எண்ணை இணைப்பது?

Step 1 : ஆதாரை இணைக்க https://adhar.tnebltd.org/Aadhaar/ என்ற இணையதள பக்கத்திற்கு சென்று உங்கள் மின் இணைப்பு எண், மொபைல் எண், இமேஜில் இருக்கும் டெக்ஸ்டை டைப் செய்ய வேண்டும்.

Step 2 : நீங்கள் டைப் செய்த மின்இணைப்புக்கான நுகர்வோர் பெயர் திரையில் தெரியும். அதற்கு கீழ் நீங்கள் அந்த வீட்டிற்கு உரிமையாளரா அல்லது வாடகைக்கு குடியிருப்போரா அல்லது நீங்கள் அந்த வீட்டின் உரிமையாளர் ஆனால் மின் இணைப்பு வேறு ஒருவர் பெயரில் உள்ளதா என்ற ஆப்ஷன்களை தோன்றும். அதன்பின் உங்கள் ஆதார் எண்ணை டைப் செய்து நெக்ஸ்ட் கொடுக்க வேண்டும்.

Step 3 : ஆதார் எண் உடன் நீங்கள் இணைத்துள்ள கைப்பேசி எண்ணுக்கு OTP வரும். அதனை நீங்கள் டைப் செய்து சப்மிட் கொடுத்தால் போதும். உங்கள் ஆதார் எண் மின் இணைப்புடன் இணைக்கப்பட்டு விடும். மிக எளிதாக ஆதாரை இணைத்து விடலாம்.