தமிழகத்தில் 6 மாவட்டங்களில் மிக கனமழை எச்சரிக்கை - வானிலை மையம்

தெற்கு ஆந்திரா- வட தமிழக கடலோர பகுதிகளை ஒட்டியுள்ள தென்மேற்கு வங்கக்கடலில் நிலவும் வளிமண்டல மேலடுக்கு சுழற்சி காரணமாக 6 மாவட்டங்களில் மிக கனமழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. கடலூர், மயிலாடுதுறை, நாகப்பட்டினம், திருவாரூர், தஞ்சாவூர், புதுக்கோட்டை மற்றும் காரைக்காலின் ஓரிரு இடங்களில் இடி மின்னலுடன் கூடிய கன முதல் மிக கன மழை பெய்யும் என கணிக்கப்பட்டுள்ளது.

கிருஷ்ணகிரி, தர்மபுரி, சேலம், நாமக்கல், திருச்சியில் கனமழை பெய்ய வாய்ப்புள்ளது. இதேபோல் அரியலூர், பெரம்பலூர், கரூர், திண்டுக்கல், தேனி, மதுரையிலும் கனமழை பெய்யக்கூடும். சிவகங்கை, ராமநாதபுரம், விருதுநகர், நீலகிரி, கோவை,திருப்பூர், ஈரோடு, கள்ளக்குறிச்சி, விழுப்புரம் மாவட்டங்கள் மற்றும் புதுச்சேரியின் அநேக இடங்களில் இடி மின்னலுடன் கூடிய கன மழையும் பெய்ய வாய்ப்புள்ளது.

வட தமிழகம் மற்றும் தென் தமிழகத்தில் அநேக இடங்களில் லேசானது முதல் மிதமான மழையும் பெய்யக்கூடும். சென்னையை பொறுத்தவரை அடுத்த 24 மணி நேரத்திற்கு வானம் பொதுவாக மேகமூட்டத்துடன் காணப்படும். நகரின் ஒருசில பகுதிகளில் லேசானது முதல் மிதமான மழை பெய்யக்கூடும்.  கடந்த 24 மணி நேரத்தில் அதிகபட்சமாக குறிஞ்சிப்பாடி, வடகுத்துவில் தலா 16 சென்டி மீட்டர் மழை பதிவாகியுள்ளது.

மத்தியகிழக்கு அரபிக் கடல், தெற்கு வங்கக் கடல் பகுதிகளில் சூறாவளி காற்று மணிக்கு 50 முதல் 60 கிலோ மீட்டர் வேகத்திலும் இடையிடையே 70 கிலோ மீட்டர் வேகத்திலும் வீசக்கூடும் என்பதால் 2 தினங்களுக்கு மீனவர்கள் கடலுக்கு செல்ல வேண்டாம் என அறிவுறுத்தப்பட்டுள்ளது. ஆழ்கடல் மீன்பிடிப்புக்குச் சென்றவர்கள் வரும் 9-ம் தேதிக்குள் கரைக்கு திரும்புமாறு எச்சரிக்கை விடுக்கப்பட்டுள்ளது.