ஈரோடு கிழக்கு இடைத்தேர்தல்: அமமுக வேட்பாளர் வாபஸ்... பின்னணி என்ன?

ஈரோடு கிழக்கு இடைத்தேர்தல் பிப்ரவரி 27ம் தேதி நடைபெறவுள்ள நிலையில் அமமுக தனது வேட்பாளரை வாபஸ் பெறுவதாக டிடிவி தினகரன் அறிவித்தார்.

ஈரோடு இடைத்தேர்தலில் திமுக கூட்டணி சார்பில் காங்கிரஸ் கட்சி போட்டியிடுகிறது. அதில் ஈவிகேஎஸ் இளங்கோவன் போட்டியிடுவதாக அறிவிக்கப்பட்டது. இதனை தொடந்து அதிமுகவின் எடப்பாடி பழனிசாமி அணி தென்னரசுவையும், ஓ.பன்னீர்செல்வம் அணி செந்தில் முருகனையும் வேட்பாளர்களாக அறிவித்தனர். இதனிடையே இபிஎஸ் தரப்பு வேட்பாளருக்கு ஓபிஎஸ் ஆதரவு தெரிவிக்க வேண்டுமென அண்ணாமலை கோரிக்கை வைத்தார்.

இதனையடுத்து இரட்டை இலை முடங்கிவிடக்கூடாது என்பதற்காக தங்கள் தரப்பு வேட்பாளரை வாபஸ் பெறுவதாக ஓபிஎஸ் அறிவித்தார். அத்துடன், இரட்டை இலை சின்னம் வெற்றிபெற உழைப்போம் என்றும் தெரிவித்தது. இன்று காலை அதிமுக சார்பில் தென்னரசு வேட்புமனுவை தாக்கல் செய்தார்.

இந்நிலையில் அமமுக பொதுச்செயலாளர் டிடிவி தினகரன் வேட்பாளரை வாபஸ் பெறுவதாக அறிவித்தார். குக்கர் சின்னம் ஒதுக்கப்படாததால் ஈரோடு இடைத்தேர்தலில் போட்டியிடப்போவதில்லை என தெரிவித்தார்.

மேலும் “கடந்த காலத்தில் குக்கர் சின்னம் ஒதுக்கிய தேர்தல் இந்த முறை மறுத்துள்ளது. இன்னும் ஒராண்டில் நாடாளுமன்ற தேர்தல் உள்ளதால் வேறு சின்னத்தில் போட்டியிடுவது குழப்பத்தை ஏற்படுத்தும் என்பதால் போட்டியிடவில்லை” என அமமுக பொதுச்செயலாளார் டிடிவி தினகரன் தெரிவித்தார்.

ஏற்கனவே மக்கள் நீதி மய்யம் கட்சி தலைவர் கமல்ஹாசன், காங்கிரஸ் வேட்பாளர் ஈவிகேஎஸ் இளங்கோவனுக்கு ஆதரவு தெரிவித்தார். அதிமுக கூட்டணியில் நீண்ட நாட்களாக குழப்பம் நீடித்து வந்த நிலையில் ஓபிஎஸ் தனது வேட்பாளரை வாபஸ் பெற்றார். பாஜகவும் எடப்பாடி பழனிசாமி தரப்பு வேட்பாளர் தென்னரசுக்கு ஆதரவு தெரிவித்தனர்.

அமமுக தரப்பு தற்போது தங்கள் வேட்பாளரை வாபஸ் பெற்றுள்ள நிலையில் காங்கிரஸ் கட்சிக்கும் அதிமுகவிற்கும் இடையே போட்டி நிலவும் என எதிர்பார்க்கப்படுகிறது.