தமிழகத்தில் 5 நாட்களுக்கு வறண்ட வானிலையே நிலவும் - வானிலை ஆய்வு மையம்

தென்கிழக்கு வங்க கடலில் குறைந்த காற்றழுத்தத் தாழ்வுப் பகுதி உருவாகியிருந்தாலும் தமிழகத்தில் 5 நாட்களுக்கு பெரும்பாலும் வறண்ட வானிலையே நிலவும் என சென்னை வானிலை ஆய்வு மையம் தெரிவித்துள்ளது.

இதுகுறித்து வானிலை ஆய்வு மையம் வெளியிட்டுள்ள அறிவிப்பில் , வடகிழக்கு பருவ காற்றின் காரணமாக ராமநாதபுரம் மாவட்டத்தின் ஓரிரு இடங்களில் லேசானது முதல் மிதமான மழை பெய்யக்கூடும். ஏனைய மாவட்டங்கள் மற்றும் புதுவை, காரைக்கால் பகுதிகளில் பெரும்பாலும் வறண்ட வானிலையே நிலவும் என கணிக்கப்பட்டுள்ளது. உள் மாவட்டங்கள் மற்றும் மேற்குத் தொடர்ச்சி மலையை ஒட்டிய மாவட்டங்களில் இரு தினங்களுக்கு லேசான பனிமூட்டம் நிலவும் என கூறப்பட்டுள்ளது.

சென்னையை பொறுத்தவரை அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். கடந்த 24 மணி நேரத்தில் ராமேஸ்வரத்தில் 3 சென்டி மீட்டர் மழை பதிவாகியுள்ளது. குமரிக்கடல் பகுதிகளில் பலத்த காற்று வீசும் என்பதால் 20ம் தேதி வரை அப்பகுதிகளுக்கு மீனவர்கள் எச்சரிக்கையுடன் செல்லுமாறு அறிவுறுத்தப்பட்டுள்ளது.

ALSO READ |  இந்தியாவில் ஓமைக்ரான் பாதிப்பு 126 ஆக அதிகரிப்பு...

தென் கிழக்கு வங்கக்கடல் பகுதிகளில் சூறாவளி காற்று வீசும் என்பதால் மீனவர்கள் அப்பகுதிக்கு இரு நாட்கள் செல்ல வேண்டாம் என எச்சரிக்கப்பட்டுள்ளது.