Home /News /tamil-nadu /

விமான நிலையத்திலும், விமானங்களிலும் அறிவிப்புகள் இனிமேல் தமிழ் மொழியில் முதலாவதாக இடம்பெறும் - அமைச்சர் பாண்டியராஜன்

விமான நிலையத்திலும், விமானங்களிலும் அறிவிப்புகள் இனிமேல் தமிழ் மொழியில் முதலாவதாக இடம்பெறும் - அமைச்சர் பாண்டியராஜன்

கோப்புப்படம்

கோப்புப்படம்

தமிழ்நாட்டின் ஆட்சி மொழியான தமிழ் உட்பட பல்வேறு மாநிலங்களில் பேசப்படும் பிராந்திய மொழிகளுக்கு எந்தவிதத்திலும் பின்னடைவு ஏற்படாதவாறு நடவடிக்கைகள் எடுக்கப்படும்.

  • News18
  • Last Updated :
    தமிழகத்தில் உள்ள விமானநிலையத்திலும், இங்கிருந்து புறப்படும் விமானங்களிலும் இனிமேல் அறிவிப்புகள் தமிழ் மொழியில் இடம்பெறும் என்று அமைச்சர் பாண்டியராஜன் தெரிவித்துள்ளார்.

    புதுடெல்லியில் விமான போக்குவரத்து துறையின் மத்திய அமைச்சர் ஹர்தீப் சிங் பூரி அவர்களையும், அமைச்சகத்தின் உயர் அதிகாரிகளையும் சந்தித்ததற்குப் பிறகு பத்திரிகையாளரிடம் பேசிய அமைச்சர் பாண்டியராஜன், தமிழ் பேசும் மக்களுக்கு மகிழ்ச்சியளிக்கும் வகையில், தமிழ்நாட்டிலுள்ள விமான நிலையங்களிலும் மற்றும் இங்கிருந்து புறப்படுகின்ற விமானங்களிலும் செய்யப்படும் அறிவிப்புகள் இனிமேல் தமிழ் மொழியில் முதலாவதாக இடம் பெறும் என்ற தகவலை தெரிவித்தார்.

    இது குறித்து விமானத்துறை அமைச்சகம் பல்வேறு விமான சேவை நிறுவனங்களுக்கு சுற்றறிக்கை அனுப்பப்பட்டிருக்கிறது என்று கூறிய அமைச்சர், இதற்கு சட்டபூர்வ செயல்வடிவம் தந்ததற்காக விமான போக்குவரத்துத் துறையின் அமைச்சர் மற்றும் அதிகாரிகளுக்கு தனது மனமார்ந்த நன்றியையும் அமைச்சர் பதிவுசெய்தார்.  தமிழர்களின் திருநாளான பொங்கலுக்குள் தமிழ்நாட்டின் விமான நிலையங்களில் இறங்கும் விமானங்களில் இத்தகைய அறிவிப்புகள் தமிழ் மொழியில் முதலாவதாக ஒலிக்கும் என்று தன் நம்பிக்கையையும் வெளியிட்டார்.

    “ராஜபாஷா” என்று அலுவல் மொழியாக கூறப்படும் ஹிந்திக்கு இணையாக செம்மொழியான தமிழ் மொழிக்கும் அதே தகுதிநிலை வழங்கப்பட வேண்டும் என்ற கோரிக்கையை வலியுறுத்தி இது குறித்து இத்துறையின் செயலாளர்களை சந்தித்ததாகவும், அப்போது தொன்மையான மொழியான தமிழுக்கும் இதே கவுரவம் வழங்கப்பட வேண்டும் என்பதை வலியுறுத்தியதாகவும் அமைச்சர் தெரிவித்தார்.

    இக்கோரிக்கையை பரிசீலிக்கவும் மற்றும் உரிய நடவடிக்கைகளை எடுப்பதற்கும் மத்திய அரசு உறுதியளித்திருப்பதாக அமைச்சர் பாண்டியராஜன் குறிப்பிட்டார். இது குறித்து தமிழ்நாடு முதலமைச்சர் பல கடிதங்கள் வழியாக தொடர்ந்து மத்திய அரசுக்கு வலியுறுத்தி வந்திருப்பதாகவும் அவர் சுட்டிக்காட்டினார்.
    மத்திய அரசு மற்றும் பொதுத்துறை நிறுவன அலுவலகங்களில் ஒவ்வொரு நாளும் ஒரு ஹிந்தி வார்த்தைக்கு தமிழ் மற்றும் ஆங்கில மொழியில் விளக்கங்களை எழுதி காட்சிப்படுத்தி வரும் நடைமுறையைப் போலவே மற்றொரு விளம்பர பலகையிலும் ஒவ்வொரு ஒரு தமிழ் வார்த்தைக்கு ஆங்கில மற்றும் ஹிந்தியில் பொருள் விளக்கம் தரப்பட வேண்டும் என்ற கோரிக்கையை தான் முன்வைத்ததாகவும் மற்றும் இக்கோரிக்கையை ஏற்று செயல்படுத்துவதற்கான ஏற்பாடுகள் செய்யப்படும் என்று இத்துறையின் கூடுதல் செயலாளர் உறுதியளித்துள்ளார் என்றார்.

    மேலும் தமிழ்நாட்டின் ஆட்சி மொழியான தமிழ் உட்பட பல்வேறு மாநிலங்களில் பேசப்படும் பிராந்திய மொழிகளுக்கு எந்தவிதத்திலும் பின்னடைவு ஏற்படாதவாறு நடவடிக்கைகள் எடுப்பதும் தங்களது பொறுப்பு என்று இத்துறை அதிகாரிகள் ஒப்புக்கொண்டதாக அமைச்சர் குறிப்பிட்டார். நீதிமன்றங்களில் வழக்காடு மொழியாக தமிழ் இடம்பெற வேண்டும் என்ற கோரிக்கையை தமிழக அரசு தொடர்ந்து வலியுறுத்தி வருவதை சுட்டிக்காட்டிய அமைச்சர், ஒரே நேரத்தில் பல்வேறு இந்திய மொழிகளில் மொழிபெயர்க்கக்கூடிய மென்பொருளை உருவாக்கும் திட்டத்தினை வேகமாக செயல்படுத்த வேண்டும் என்று கேட்டுக்கொண்டதாகவும் மற்றும் இது விரைவில் செயல் வடிவம் பெறும் என்றும் அவர் நம்பிக்கை தெரிவித்தார்.

    நீதிமன்றத்தின் அனைத்து தீர்ப்புகளும் வெளிவந்த ஒரு நாளுக்குள் 16 பிராந்திய மொழிகளில் மொழி பெயர்க்கப்பட்டு வெளியிட வேண்டும் என்று உச்சநீதிமன்றம் தெரிவித்திருக்கின்ற யோசனை செயல்வடிவம் பெறுவதற்கும் மற்றும் மத்திய அரசு அனுப்பும் கடிதங்கள் மற்றும் சுற்றறிக்கைகளையும் உடனடியாக மொழி பெயர்க்கப்படுவதற்கு மத்திய அரசு மேற்கொண்டுவரும் மென்பொருள் திட்டம் உதவும் என்றும் அவர் குறிப்பிட்டார்.

    செம்மொழி தமிழ் ஆராய்ச்சி நிறுவனத்திற்கு இயக்குநர் நியமிக்க சமீபத்தில் நியமனம் செய்யப்பட்டிருக்கும் நிலையில் 74000 சதுரஅடி பரப்பளவில் அந்நிறுவனத்திற்கான கட்டிடம் விரைவில் தயாராகிவிடும் என்ற செய்தியினை தெரிவித்த அமைச்சர், இந்நிறுவனத்திற்காக 43 அதிகாரபூர்வ பணியாளர் பதவிகளுக்கு ஒப்புதல் வழங்கப்பட்டிருக்கிறது என்ற மகிழ்ச்சிகரமான செய்தியையும் அவர் பகிர்ந்துகொண்டார்.
    Published by:Vijay R
    First published:

    Tags: Airport

    அடுத்த செய்தி