ஹர்திக் பாண்ட்யா, தினேஷ் கார்த்திக் விளாசல்.. ஆவேஷ் கான் அசத்தல் - 82 ரன்கள் வித்தியாசத்தில் இந்திய அணி அபார வெற்றி

தென்ஆப்பிரிக்க அணிக்கு எதிரான நான்காவது டி-20 போட்டியில் இந்திய அணி, 82 ரன்கள் வித்தியாசத்தில் அபார வெற்றி பெற்றது. இதன் மூலம் தொடரிலும் சமநிலையை எட்டியது.

இந்தியா - தென்ஆப்பிரிக்கா அணிகளுக்கு இடையே 5 போட்டிகளை கொண்ட 20 ஓவர் கிரிக்கெட் தொடர் நடைபெற்று வருகிறது. இதில், 3 போட்டிகளின் முடிவில் தென்ஆப்பிரிக்கா 2-1 என முன்னிலை பெற்றது. இதனால், தொடரை இழக்காமல் இருக்க, ராஜ்கோட்டில் நடைபெற்ற 4-வது போட்டியில் இந்திய அணி வெற்றிபெற வேண்டிய கட்டாயம் ஏற்பட்டது. இப்போட்டியில் டாஸ் வென்ற தென்ஆப்பிரிக்கா முதலில் பந்துவீச்சை தேர்வு செய்தது.

இதையடுத்து ஆட்டத்தை தொடர்ந்த இந்திய அணி, 40 ரன்களுக்குள் 3 முக்கிய விக்கெட்டுகளை இழந்தது. இருப்பினும், நடுவரிசையில் அசத்தலான ஆட்டத்தை வெளிப்படுத்திய ஹர்திக் பாண்ட்யா 46 ரன்கள் விளாசி, அணிக்கு வலு சேர்த்தார். கடைசிக் கட்டத்தில் அதிரடியில் மிரட்டிய தினேஷ் கார்த்திக், அரைசதம் கடந்து அசத்தினார். இதனால், இந்திய அணி 6 விக்கெட்டுகள் இழப்பிற்கு 169 ரன்கள் சேர்த்தது.

பின்னர், இலக்கை துரத்திய தென்ஆப்பிரிக்க அணியில், தொடக்க வீரர் பவுமா 8 ரன்கள் சேர்த்திருந்த போது காயம் ஏற்பட்டு வெளியேறினார். இதை தொடர்ந்து இந்திய பந்துவீச்சை எதிர்கொள்ள முடியாமல் அந்த அணி, விக்கெட்டை பறிகொடுத்த வண்ணம் இருந்து. இதனால், 16.5 ஓவர்களில், 87 ரன்களில் ஆல்-அவுட்டானது.

Also Read: புஜாரா பேச்சைக் கேட்டு சதத்தை கோட்டை விட்டேன் - கடுப்பான ரிஷப் பண்ட்

இதன் மூலம் 82 ரன்கள் வித்தியாசத்தில் இந்தியா அபார வெற்றிபெற்றதுடன், 2-2 என தொடரில் சமநிலையை எட்டியது. இந்திய தரப்பில் அதிகபட்சமாக அவேஷ் கான் 4 விக்கெட்டுகளை வீழ்த்தி அசத்தினார்.இப்போட்டியில், 87 ரன்களில் ஆல்-அவுட்டானதே டி-20 கிரிக்கெட்டில் தென்ஆப்பிரிக்க அணியின் குறைந்தபட்ச ஸ்கோரானது. அதேவேளையில், தென்ஆப்பிரிக்க அணிக்கு எதிராக இந்திய அணியின் மிகப்பெரிய வெற்றியாக அமைந்தது.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.

ஆட்டநாயகன் தினேஷ் கார்த்திக்

27 பந்துகளில் 55 ரன்கள் விளாசிய தினேஷ் கார்த்திக் ஆட்டநாயகனாக ஜொலித்தார். மேலும், சர்வதேச டி-20 கிரிக்கெட்டில் அவர் அடித்த முதல் அரைசதமாகவும் இது பதிவானது.இந்தியா - தென்ஆப்பிரிக்கா அணிகளுக்கு இடையே 5-வது மற்றும் கடைசிப் போட்டி பெங்களூருவில் நாளை நடைபெறவுள்ளது.