புரோ கபடி லீக்: முதல் வெற்றி ஈட்டுமா தமிழ் தலைவாஸ்? - இன்று யு-மும்பாவுடன் மோதல்

புரோ கபடி லீக் 2021-22-ல் இன்றைய 15வது போட்டியில் தமிழ்நாடு அணி யு-மும்பா அணியை சந்திக்கிறது. இந்தப் போட்டியிலாவது தமிழ்நாடு அணி வென்று தன் முதல் வெற்றியைச் சாதிக்குமா என்று ரசிகர்கள் ஆவலுடன் காத்திருக்கின்றனர்.

மாறாக யு-மும்பா அணி ஒரு வெற்றி, ஒரு தோல்வியுடன் களம் காண்கிறது. பெங்களூரு புல்ஸ் அணியை 46-30 என்று பதம் பார்த்த யு-மும்பா அடுத்ததாக  27-31 என்று டெல்லியிடம் நெருக்கமான தோல்வியைத் தழுவியது. மாறாக தமிழ் தலைவாஸ் இன்னும் முதல் வெற்றியையே பெறவில்லை முதல் போட்டியில் தெலுங்கு டைட்டன்ஸுடன் 40-40 என்று த்ரில் டை செய்தது. பெங்களூரு புல்ஸ் அணியிடம் 2வது போட்டியில் 30-38 என்ற புள்ளிகளில் தோல்வியடைந்தது.

இந்நிலையில் யு-மும்பாவுடனான தமிழ் தலைவாஸ் போட்டி இன்று இரவு 7:30 மணிக்கு பெங்களூரு ஒயிட்ஃபீல்டில் நடைபெறுகிறது. தமிழ் தலைவாஸ் அணியில் பவானி ராஜ்புத் இதுவரை சிறந்த ரெய்டராக 8 புள்ளிகளைப் பெற்றுள்ளார். கே.பிரபஞ்சன், மஞ்சீத் சொதப்பி வருகின்றனர். தடுப்பாட்டத்தில் சாகரும் சுர்ஜீத்தும் சிறந்து விளங்குகின்றனர்.

தமிழ் தலைவாஸ் அணி: கே.பிரபஞ்சன், சுர்ஜீத் சிங், மோஹித், மஞ்சீத், பவானி ராஜ்புத், சாகர், சாஹில் சிங்.

யு-மும்பா அணி: அபிஷேக் சிங், ஆஷிஷ் சங்வான், ஹரேந்திர குமார், மோசென் மக்சோட்லூ, வி. அஜித், ரிங்கு அல்லது ஷிவம், பாசல் அட்ராசலி.

இதையும் படிங்க: Vijay Hazare: கேட்சை விட்டு, பீல்டிங்கில் கோட்டை விட்டு கோப்பையை நழுவ விட்ட தமிழ்நாடு அணி