Australian Open : மகளிர் இரட்டையர் பிரிவில் பார்போரா – கேட்ரினா இணை பட்டம் வென்றது…

ஆஸ்திரேலிய ஓபன் டென்னிஸ் தொடரில் மகளிர் இரட்டையர் பிரிவில், நடப்பு சாம்பியனான பார்போரா கிரெஜ் சிகோவா – கேட்ரினா சினியாகோவா இணை மீண்டும் சாம்பியன் பட்டத்தை வென்று பாராட்டைப் பெற்றுள்ளது. இன்று நடந்த இறுதிப் போட்டியில் ஜப்பானை சேர்ந்த ஷுகோ அவ்யோமா – ஈனா ஷிபாரா ஜோடியை 6-4, 6-3 என்ற நேர் செட் கணக்கில் வீழ்த்தி செக் குடியரசு வீராங்கனைகள் மீண்டும் பட்டத்தை கைப்பற்றினர். பரபரப்பாக நடைபெற்ற இந்த ஆட்டத்தில் செக் குடியரசு வீராங்கனைகள் பார்போரா – கேட்ரினாவின் ஆட்டம் பிரம்மிப்பூட்டும் வகையில் இருந்தது. இருப்பினும் தங்களது அனுபவ ஆட்டத்தை நேர்த்தியாக வெளிப்படுத்தி செக் குடியரசு வீராங்கனைகள் ஆட்டத்தை தொடர்ந்து தங்களது கட்டுப்பாட்டில் வைத்திருந்து பட்டத்தை வென்றனர்.

வெற்றிக்கு பின்னர் செக் குடியரசு வீராங்கனை கேட்ரின சினியாகோவா கூறுகையில், ‘நாங்கள் மீண்டும் பட்டத்தை வென்றுள்ளோம். இந்த தருணம் உணர்வுப் பூர்வமாக உள்ளது. இதற்காக நாங்கள் கடந்த சில மாதங்களாக கடுமையாக உழைத்தோம். இது அணியின் ஒட்டுமொத்த உழைப்புக்கு கிடைத்த வெற்றி’ என்று கூறினார்.

முன்னதாக நேற்று நடந்த மகளிர் ஒற்றையர் பிரிவு இறுதிப் போட்டியில் பெலாரஸ் நாட்டை சேர்ந்த அரினா சபலெங்கா சாம்பியன் பட்டத்தை வென்றார்.  மெல்பர்னில் நடைபெற்ற இறுதிப் போட்டியில் கஜகஸ்தான் வீராங்கனை எலெனா ரைபெகினாவுடன், சபலெங்கா மோதினார். முதல் செட்டை 6க்கு4 என ரைலெனாவும், இரண்டாவது செட்டை 6-க்கு 3 என சபலெங்காவும் கைப்பற்றினர். வெற்றியை நிர்ணயிக்கும் 3-வது செட்டில் 6-க்கு 4 என்ற கணக்கில் வெற்றி பெற்று அசத்தினார் சபலெங்கா. இதைத் தொடர்ந்து ஆடவர் இரட்டையர் பிரிவு இறுதிப்போட்டி இன்று நடைபெற்றது. இதில் ஆஸ்திரேலியாவின் ரிங்கி ஹிஜிகடா – ஜேசன் குப்லெர் இணை மொனாக்கோவின் ஹியூகோ நைஸ் மற்றும் போலந்து நாட்டின் ஜான் ஜெலன்ஸ்கி இணையுடன் மோதியது. இந்த போட்டியில் 6-4, 7-6 என்ற செட் கணக்கில் ஹியூகோ – ஜான் ஜெலன்ஸ்கியை வீழ்த்தி ஆஸ்திரேலிய இணையான ரிங்கி – குப்லெர் சாம்பியன் பட்டத்தை வென்றனர்