WPL : பெங்களூரு அணியை 9 விக்கெட் வித்தியாசத்தில் வீழ்த்தி மும்பை இந்தியன்ஸ் அபார வெற்றி

மகளிர் ஐபிஎல் கிரிக்கெட் தொடரில் பெங்களூரு அணியை 9 விக்கெட் வித்தியாசத்தில் வீழ்த்தி மும்பை இந்தியன்ஸ் அணி அபார வெற்றி பெற்றுள்ளது. டாஸ் வென்ற பெங்களூரு அணியின் கேப்டன் ஸ்மிருதி மந்தனா பேட்டிங்கை முதலில் தேர்வு செய்தார். தொடக்க வீராங்கனையாக களமிறங்கிய அவர் 17 பந்துகளில் 23 ரன்கள் எடுத்து ஆட்டமிழந்தார். மற்றொரு ஓபனர் சோபி டிவைன் 16 ரன்னில் வெளியேற அடுத்து வந்த திஷா கசாத் ரன் ஏதும் எடுக்காமல் ஏமாற்றம் அளித்தார்.

மும்பை அணியின் பவுலர்கள் சீரான இடைவெளியில் விக்கெட்டுகளை வீழ்த்தி, பெங்களூரு அணி ரன் குவிக்காமல் பார்த்துக் கொண்டனர். பெங்களூரு அணியில் விக்கெட் கீப்பர் ரிச்சா கோஷ் 28, கனிகா அஹுஜா 22, ஷ்ரேயங்கா பாட்டீல் 23, மேகன் ஷூட்டி 20 ரன்கள் எடுத்தனர். 18.4 ஓவரில் அனைத்து விக்கெட்டுகளையும் இழந்த பெங்களூரு அணி 155 ரன்கள் எடுத்தது.

156 ரன்களை இலக்காக கொண்டு களத்தில் இறங்கிய மும்பை அணிக்கு தொடக்க பேட்டர்கள் ஹேலி மேத்யூஸ் மற்றும் யஸ்திகா பாட்டியா சிறப்பான தொடக்கத்தை கொடுத்தனர். இருவரும் முதல் விக்கெட்டிற்கு 45 ரன்கள் பார்ட்னர்ஷிப் அமைத்தனர். 23 ரன்கள் எடுத்திருந்தபோது யஸ்திகா ப்ரீத்தி போஸ் பவுலிங்கில் எல்.பி.டபிள்யூ. முறையில் ஆட்டமிழந்து வெளியேறினார். இதன்பின்னர் இணைந்த ஹேலி மேத்யூஸ் – நேட் சீவர் இணை அதிரடியாக விளையாடி ரன்களை சேர்த்தது. ஒவ்வொரு ஓவரிலும் பவுண்டரிகள் பறந்ததால் மும்பை ரசிகர்கள் உற்சாகம் அடைந்தனர். 14.2 ஆவது ஓவரில் மும்பை அணி எளிதாக வெற்றி இலக்கை எட்டியது. ஹேலி மேத்யூஸ் 38 பந்துகளில் 77 ரன்களும், நேட் சீவர் ப்ரன்ட் 29 பந்தில் 55 ரன்களும் எடுத்து அணியின் வெற்றிக்கு உதவினர். முதல் போட்டியில் குஜராத்தை வென்ற நிலையில், பெங்களூருவுக்கு எதிராகவும் அசத்தல் வெற்றியை மும்பை இந்தியன்ஸ் அணி பெற்றுள்ளது.