கே.எல்.ராகுல் அதிரடி நீக்கம்… டெஸ்ட் போட்டிகளில் இந்திய அணிக்கான அடுத்த துணை கேப்டன் யார்?

டெஸ்ட் கிரிக்கெட் போட்டிகளில் இந்திய அணிக்கான துணை கேப்டன் பொறுப்பிலிருந்து கே.எல்.ராகுல் அதிரடியாக நீக்கப்பட்டுள்ளார். இந்நிலையில் அடுத்து அந்த பொறுப்புக்கு யார் வருவார் என்ற எதிர்பார்ப்பு ரசிகர்கள் மத்தியில் எழுந்துள்ளது. கே.எல். ராகுல் தொடர்ந்து மோசமான ஆட்டத்தை வெளிப்படுத்தி வரும் நிலையில், அவருக்கு ஏன் மீண்டும் மீண்டும் வாய்ப்பு அளிக்கப்படுகிறது என்று ரசிகர்கள் சமூக வலைதளங்களில் கேள்வி எழுப்பி வருகின்றனர். இதற்கு அணி நிர்வாகம், கேப்டன், பயிற்சியாளர் உள்ளிட்டோர் அளிக்கும் விளக்கங்கள் ரசிகர்களை திருப்திபடுத்தும் வகையில் அமையவில்லை. கடந்த ஆண்டு ராகுல் ஒரே ஒரு அரைச்சதம் மட்டுமே அடித்துள்ளார். ஆஸ்திரேலிய அணிக்கு எதிராக 2 டெஸ்டில் நடந்த 3 இன்னிங்ஸ்களில் ராகுல் மொத்தம் 38 ரன்கள் மட்டுமே எடுத்து இருக்கிறார். இதனால் அவரை ஆடும் லெவனில் இருந்து நீக்கிவிட்டு சுப்மன் கில் அல்லது சூர்யகுமார் யாதவுக்கு வாய்ப்பு அளிக்க வேண்டும் என்று ரசிகர்கள் வலியுறுத்தி வருகின்றனர்.

ஆஸ்திரேலிய அணிக்கு எதிராக இந்தூரில் நடக்கும் மூன்றாவது டெஸ்டில் கே.எல். ராகுல் விளையாடமாட்டார் என்று சில நாட்களுக்கு முன்பு தகவல் வெளிவந்தது. முதல் இரண்டு டெஸ்ட் போட்டிகளுக்கு கே.எல். ராகுல் துணை கேப்டனாக நியமிக்கப்பட்டிருந்தார். ஆனால் அவரிடமிருந்து பொறுப்பு தற்போது நீக்கப்பட்டுள்ளது. இந்நிலையில் அடுத்த துணை கேப்டனாக ரவிந்திர ஜடேஜா அல்லது ரவிச்சந்திரன் அஷ்வின் ஆகியோரில் ஒருவர் நியமிக்கப்படலாம் என்று தகவல்கள் தெரிவிக்கின்றன.

இருவரும் பல டெஸ்ட் போட்டிகளில் விளையாடிய அனுபவம் மிக்கவர்கள். அத்துடன் ஆஸ்திரேலிய அணிக்கு எதிரான முதல் 2 போட்டிகளில் அற்புதமான ஆட்டத்தை வெளிப்படுத்தியுள்ளனர். கே.எல்.ராகுலை 3 ஆவது டெஸ்டிலிருந்து நீக்க வேண்டும் என்று ரசிகர்கள் வலியுறுத்தி வருகின்றனர். ஆனால் 2 போட்டிகளில் இந்திய அணி வெற்றி பெற்றதால்,  இந்த விவகாரம் அதிக கவனத்தில் எடுத்துக் கொள்ளப்படவில்லை.