இந்தூர் டெஸ்டில் புதிய உச்சத்தை நோக்கி விராட் கோலி… சச்சின், டிராவிட் வரிசையில் இணைவாரா?

இந்தூர் டெஸ்ட் கிரிக்கெட் போட்டியில் விராட் கோலி ஏற்படுத்தவுள்ள சாதனைகள் வரிசையில் காத்திருக்கின்றன. இந்த டெஸ்டில் கோலி ஓரளவு ரன்களை குவித்தால் புதிய உச்சம் தொட்டு சச்சின், டிராவிட், கவாஸ்கர் போன்ற ஜாம்பவான்களின் சாதனை பட்டியலில் இணைவாரா என்ற எதிர்பார்ப்பு எழுந்துள்ளது. ஆஸ்திரேலிய கிரிக்கெட் அணி இந்தியாவில் சுற்றுப் பயணம் மேற்கொண்டு தற்போது 4 டெஸ்ட்களில் விளையாடி வருகிறது. முதல் 2 டெஸ்ட் பேட்டிகளில் அந்த அணி படுதோல்வியை சந்தித்துள்ள நிலையில்,10 நாட்கள் இடைவெளிக்கு பின்னர் இன்று 3 ஆவது டெஸ்ட் போட்டி மத்திய பிரதேச மாநிலம் இந்தூரில் உள்ள ஹோல்கர் மைதானத்தில் தொடங்குகிறது.

இந்த போட்டியில் இந்திய அணி வெற்றி பெற்றால் தொடரை கைப்பற்றி விடும். அத்துடன் உலக டெஸ்ட் சாம்பியன்ஷிப் தொடரின் இறுதிப்போட்டிக்கு முன்னேறும் வாய்ப்பு அதிகரிப்பதோடு, டெஸ்ட் அணிகளில் நம்பர் ஒன் இடத்திற்கு முன்னேறவும் வாய்ப்புள்ளது. இந்த டெஸ்டில் விராட் கோலி ஏற்படுத்தவுள்ள சாதனைகள் பின்வருமாறு-

• இந்தியாவில் நடந்த டெஸ்ட் போட்டிகளில் விராட் கோலி 3923 ரன்களை எடுத்துள்ளார். இந்த டெஸ்டில் 77 ரன்கள் எடுத்தால் அவர் 4 ஆயிரம் ரன்களை எட்டுவார்.
• இந்திய வீரர்களில் சச்சின் (7216), டிராவிட் (5598), சுனில் கவாஸ்கர் (5067), விரேந்தர் சேவாக் (4656) ஆகியோர் மட்டுமே 4 ஆயிரம் ரன்களை டெஸ்டில் கடந்துள்ளனர். அந்த வரிசையில் விராட் கோலியும் இணையலாம்.
• இந்திய அணியின் கேப்டன ரோஹித் சர்மா சர்வதேச ஆட்டங்களில் 17 ஆயிரம் ரன்களை எட்டுவதற்கு இன்னும் 45 ரன்கள் மட்டுமே தேவைப்படுகிறது.
• இந்தியாவில் நடந்த போட்டிகளில் 2 ஆயிம் ரன்களை எட்டுவதற்கு 57 ரன்களும், கேப்டனாக சர்வதேச போட்டிகளில் 3 ஆயிரம் ரன்களை எட்டுவதற்கு ரோஹித் சர்மாவுக்கு 80 ரன்களும் தேவைப்படுகிறது.

இந்த தொடரில் கேப்டன் ரோஹித் சர்மா முதல் டெஸ்டில் சதம் அடித்து அருமையான ஃபார்மில் உள்ளார். விராட் கோலி 2 டெஸ்டில் 3 இன்னிங்ஸ்களில் விளையாடி 76 ரன்கள் மட்டுமே எடுத்துள்ளார்.