சேப்பாக்கம் மைதானத்தின் குத்தகை பாக்கி ₹2081 கோடி! விஸ்வரூபம் எடுக்கும் சி.ஏ.ஜி அறிக்கை

நமக்கு தெரிந்ததெல்லாம் சேப்பாக்கம் மைதானம் கிரிக்கெட் மைதானம் என்பது தான் ஆனால் அதையும் தாண்டி சேப்பாக்கம் மைதானத்தில் வேறு என்ன வசதிகள், ஆடுகளம் இருக்கிறது தெரியுமா?

Web Desk | news18-tamil
Updated: September 4, 2019, 10:23 PM IST
சேப்பாக்கம் மைதானத்தின் குத்தகை பாக்கி ₹2081 கோடி! விஸ்வரூபம் எடுக்கும் சி.ஏ.ஜி அறிக்கை
சேப்பாக்கம் மைதானம்
Web Desk | news18-tamil
Updated: September 4, 2019, 10:23 PM IST
சென்னை சேப்பாக்கம் கிரிக்கெட் மைதானத்தின் ஒப்பந்தத்தை புதுப்பிக்கும் பணி தற்போது சர்ச்சைக்குள்ளாகி இருக்கிறது. வருவாய்துறை செயலாளர் அதுல்ய மிஸ்ரா, நிதித் துறைச் செயலாளர் கிருஷ்ணன், நில நிர்வாக ஆணையர் என மூன்று நபர் குழுவினர் இதற்கான பணியில் களமிறக்கப்பட்டுள்ளனர்.

1916-ம் ஆண்டு சென்னை சேப்பாக்கம் மைதானம் 17 ஏக்கர் நிலத்தில் லண்டன் நிறுவனத்தால் கட்டப்பட்டது. தற்போது மெட்ராஸ் கிரிக்கெட் கிளப் மற்றும் தமிழ்நாடு கிரிக்கெட் சங்கத்தால் நிர்வகிக்கப்பட்டு வருகிறது.

1965-ம் ஆண்டு முதல் 1995-ம் ஆண்டு வரை எந்த விதமான பிரச்சனையும் இல்லாமல் தமிழக அரசிடம் ஒப்பந்தம் போடப்பட்டு நிர்வகிக்கப்பட்டு வந்துள்ளது.


இந்நிலையில் 1995-ம் ஆண்டு ஒப்பந்தம் முடிவடைந்ததை தொடர்ந்து மேலும் 20 வருடத்திற்கு சில நிபந்தனைகளுடன் ஒப்பந்தம் கையெழுத்தானது. அதாவது முதல் ஐந்து வருடத்திற்கு ஆண்டிற்கு 50 ஆயிரம் ரூபாய் குத்தகை தொகை நிர்ணயிக்கப்பட்டுள்ளது. அதற்கு பிறகு அன்றைய மதிப்பு படி குத்தகை தொகை மாற்றியமைக்கப்படும் என சொல்லப்பட்டுள்ளது.

குத்தகை தொகை நிர்ணயப்பதில் ஏற்பட்ட பிரச்சனையாலும், விதிமுறையை மீறி கட்டப்பட்ட ஐ, ஜே, கே கேலரிகள் வழக்கு நீதிமன்றத்தில் நிலுவையில் உள்ள காரணத்தாலும் 2000-ம் ஆண்டிலிருந்து 2015-ம் ஆண்டு வரை மைதானத்தின் குத்தகை தொகை வசூலிக்கப்படவில்லை.

பிறகு 1995-ம் ஆண்டு போடப்பட்ட ஒப்பந்தம் 2015-ல் முடிவிற்கு வந்த போது வாடகை பாக்கி தொடர்பாக சட்டமன்றத்தில் சி.ஏ.ஜி அறிக்கை தாக்கல் செய்யப்பட்டது. அதாவது மைதானத்தின் குத்தகை பாக்கி 2081 கோடி ரூபாய் எனவும் இதை உடனடியாக தமிழக அரசு வசூலிக்க நடவடிக்கை எடுக்க வேண்டும் எனவும் அறிக்கையில் தெரிவிக்கப்பட்டிருந்தது.

Loading...

ஆனால் மைதானத்தை நிர்வகிக்க கூடிய தரப்பிலிருந்து இது முற்றிலும் தவறான கணக்கு எனவும் இவ்வளவு ரூபாய் வருவதற்கு வாய்ப்பே இல்லை எனவும் கூறப்பட்டு வாடகை பாக்கி செலுத்த மறுக்கிறது.

அரசு தரப்பிலிருந்து குத்தகை தொகை நிலத்தின் சந்தை மதிப்பில் இரண்டு மடங்கிலிருந்து 10 சதவிகித்தை செலுத்த வேண்டும் என நிர்பந்தம் செய்யப்படுகிறது. இதற்கு செவிசாய்க்க மைதான நிர்வாகம் தொடர்ந்து மறுப்பதால் ஒப்பந்தம் செய்வதில் இழுபறி நீடிக்கிறது.

இந்நிலையில் தான் அரசு மூன்று நபர் குழு நியமித்து மைதானத்தின் நிர்வாகத்தை ஆய்வு செய்யவும், ஒப்பந்தத்தை புதுப்பிக்கவும் கடந்த மூன்று தினங்களுக்கு முன் சேப்பாக்கம் மைதானத்தில் ஆய்வு மேற்கொண்டுள்ளது.

அத்துடன் தலைமை செயலகத்தில் மைதானத்தை நிர்வகிக்கும் குழுவும் அரசு நியமித்த மூன்று நபர் குழுவும் ஒப்பந்தம் புதுப்பித்தல் தொடர்பான பேச்சுவார்த்தையில் ஈடுபட்டன.

நமக்கு தெரிந்ததெல்லாம் சேப்பாக்கம் மைதானம் கிரிக்கெட் மைதானம் என்பது தான். ஆனால் அதையும் தாண்டி சேப்பாக்கம் மைதானத்தில் வேறு என்ன வசதிகள், ஆடுகளம் இருக்கிறது தெரியுமா?

நீச்சல் குளம், ஸ்குவாஷ் மைதானம், ஸ்னூக்கர் ஆடுகளம், இரண்டு மதுபான கூடம், நட்சத்திர வசதியுடன் கூடிய தங்கும் விடுதி, உடற்பயிற்சி கூடம், என ஐந்து நட்சத்திர விடுதியில் உள்ள அனைத்து வசதிகளையும் சேப்பாக்கம் மைதானம் உள்ளடக்கியுள்ளது.

2000-ம் ஆண்டு முதல் 2015-ம் ஆண்டு வரை குத்தகை தொகை செலுத்தாமலும், 2015-ம் ஆண்டு முதல் 2019-ம் ஆண்டு வரை ஒப்பந்தம் புதுப்பிக்கபடாமலும் சேப்பாக்கம் மைதானம் தொடர்ந்து செயல்பட்டு வருவது குறிப்பிடத்தக்கது.

Also Watch

First published: September 4, 2019
மேலும் பார்க்க
Loading...
அடுத்து செய்திகள்
Loading...