• HOME
  • »
  • NEWS
  • »
  • sports
  • »
  • அதிக சிக்ஸர்களை விட்டுக்கொடுத்த இந்திய பவுலர்: குல்தீப் யாதவின் மோசமான சாதனை!

அதிக சிக்ஸர்களை விட்டுக்கொடுத்த இந்திய பவுலர்: குல்தீப் யாதவின் மோசமான சாதனை!

குல்தீப் யாதவ்

குல்தீப் யாதவ்

ஒரு நாள் போட்டிகளில் அதிக சிக்ஸர்களை விட்டுக்கொடுத்த இந்திய வீரர் என்ற மோசமான சாதனைக்கு சொந்தக்காரராகியிருக்கிறார் குல்தீப் யாதவ்.

  • Share this:
 

2வது ஒரு நாள் போட்டியில் இந்திய அணி நிர்ணயித்த இமாலய இலக்கை ஈஸியாக துரத்திப்பிடித்து வெற்றிபெற்றது இங்கிலாந்து அணி. இந்த வெற்றியில் பெரும் பங்கு கொண்டிருப்பவர்கள் இந்திய அணியின் இடது கை சுழற்பந்து வீச்சாளர் குல்தீப் யாதவும், குருணால் பாண்டியாவும் தான். ஒரு பக்கம் கே.எல்.ராகுல் அடித்த சதம் வீணானது.

2வது ஒரு நாள் போட்டியில் இந்திய அணி 336 ரன்கள் குவித்த போதிலும் 39 பந்துகள் மிச்சம் இருக்கையில் அனாயசமாக 6 விக்கெட்கள் வித்தியாசத்தில் வெற்றி பெற்று தொடரை 1-1 என்ற கணக்கில் சமன் செய்தது இங்கிலாந்து அணி. இந்திய பந்துவீச்சை தவிடுபொடியாக்கி இங்கிலாந்துக்கு வெற்றி தேடித்தந்தனர் ஜானி பேர்ஸ்டோவும், பென் ஸ்டோக்ஸும். இருவரின் பார்ட்னர்ஷிப்பில் இங்குலாந்துக்கு 165 ரன்கள் சேர்ந்தது.

இந்தப் போட்டியில் குல்தீப் யாதவின் பந்துவீச்சில் 8 சிக்ஸர்களை இங்கிலாந்து வீரர்கள் பறக்க விட்டனர். இதன் மூலம் ஒரு நாள் போட்டிகளில் அதிக சிக்ஸர்களை விட்டுக்கொடுத்த இந்திய வீரர் என்ற மோசமான சாதனைக்கு சொந்தக்காரர் ஆகியிருக்கிறார் குல்தீப் யாதவ்.

முன்னதாக வினய் குமார் 7 சிக்ஸர்களை விட்டுக்கொடுத்ததே இந்திய பந்துவீச்சாளரின் மோசமான சாதனையாக இருந்தது. வினய் குமார் 2013ம் ஆண்டு ஆஸ்திரேலியாவிற்கு எதிரான போட்டியில் 7 சிக்ஸர்களை விட்டுக்கொடுத்தார்.

2வது ஒருநாள் போட்டியில் 10 ஓவர்கள் வீசிய குல்தீப் யாதவ் மொத்தமாக 84 ரன்களை தாரைவார்த்தார்.
குல்தீப்பின் பந்துவீச்சில் பென் ஸ்டோக்ஸ் 4, பேர்ஸ்டோ 3, ஜேசன் ராய் ஒரு சிக்ஸர்களை பறக்க விட்டனர்.

இதனிடையே ஆல் ரவுண்டரான குருணால் பாண்டியா 6 ஓவர்களில் 72 ரன்களை தாரை வார்த்தார். இதில் ஒரே ஓவரில் 278 ரன்கள் எடுக்கப்பட்டது குறிப்பிடத்தக்கது. குருணால் பாண்டியா மற்றும் குல்தீப் யாதவ் இருவரும் 16 ஓவர்களில் 156 ரன்களை தாரை வார்த்தனர்.

இந்தியா Vs இங்கிலாந்து 2வது போட்டி ஒரு பார்வை:

இங்கிலாந்துக்கு எதிரான டெஸ்ட் (3-1) மற்றும் டி20 தொடரை (3-2) கைப்பற்றிய இந்திய அணி 3 போட்டிகள் ஒரு நாள் தொடரில் ஆடி வருகிறது. இதில் முதல் போட்டியில் 66 ரன்கள் வித்தியாசத்தில் இந்திய அணி வெற்றி பெற்றது. 2வது ஒரு நாள் போட்டி புனேவில் உள்ள மகாராஷ்டிரா கிரிக்கெட் அசோசியேஷன் மைதானத்தில் இன்று நடைபெற்றது. இதில் டாஸ் வென்ற இங்கிலாந்து அணி பந்துவீச்சை தேர்வு செய்தது.

முதலில் பேட்டிங் செய்த இந்திய அணிக்கு தொடக்க ஆட்டக்காரர்கள் ரோகித் சர்மா (25), ஷிகர் தவான் (4) சோபிக்கத் தவறினாலும் விராட் கோலி (66) கேப்டனுக்குரிய பங்களிப்பை அளித்தார்.

கே.எல்.ராகுல் 114 பந்துகளில் 108 ரன்களும் (இது இவருடைய 5வது சதமாகும்), ரிஷப் பந்த் 77 ரன்களும், ஹர்திக் பாண்டியா 35 ரன்களும் குவித்ததால் இந்திய அணி 300 ரன்களை கடந்தது. 50 ஓவர்களில் 6 விக்கெட் இழப்பிற்கு 336 ரன்கள் எடுத்தது.

மிகவும் சவாலான இலக்குடன் இங்கிலாந்து அணி நெருக்கடியான நிலையில் களமிறங்கியது. இங்கிலாந்து அணிக்கு தொடக்க வீரர்கள் நங்கூரம் அமைத்துக் கொடுத்தனர். ஜேசன் ராய் 55 ரன்கள் எடுத்தார். ஜானி பேர்ஸ்டோ மற்றும் பென் ஸ்டோக்ஸ் கூட்டணி இந்திய அணியின் வெற்றியை தட்டிப்பறிக்கும் விதத்தில் ஆடியது. ஜானி பேர்ஸ்டோ அற்புதமான சதம் அடித்தார். 112 பந்துகளுக்கு 124 ரன்களை அவர் விளாசினார். மறுமுனையில் ருத்ரதாண்டவம் ஆடிய பென் ஸ்டோக்ஸ் 52 பந்துகளில் 99 ரன்கள் அடித்து மிரட்டினார். புவனேஸ்வர் குமாரின் பந்தில் ரிஷப் பந்திடம் கேட்ச் கொடுத்து ஒரு ரன்னில் சதத்தை தவறவிட்டார். இருவரும் பார்ட்னர்ஷிப் அமைத்து 165 ரன்கள் திரட்டினர்.

வெற்றி பெற்ற இங்கிலாந்து அணி


இந்த நிலையில் 43.3 ஓவர்களிலேயே 337 ரன்கள் விளாசி இங்கிலாந்து அணி 6 விக்கெட் வித்தியாசத்தில் அசத்தல் வெற்றி பெற்றது. இந்த வெற்றியின் மூலம் ஒரு நாள் தொடர் 1-1 என்ற கணக்கில் சமன் செய்யப்பட்டுள்ளது.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தைஇங்கே கிளிக்செய்து ஃபாலோ செய்யுங்கள்.. செய்திகளை உடனுக்குடன் பெறுங்கள். Also Follow @ Facebook, Twitter, Instagram, Sharechat,Telegram, YouTube

Published by:Arun
First published: