இந்தியா – ஆஸி. 4ஆவது டெஸ்ட் நாளை தொடங்குகிறது… முழு வீச்சில் தயாரான அகமதாபாத் நரேந்திர மோடி மைதானம்

இந்தியா – ஆஸ்திரேலியா இடையிலான 4 ஆவது டெஸ்ட் கிரிக்கெட் போட்டி நாளை குஜராத் மாநிலம் அகமதாபாத் நரேந்திர மோடி மைதானத்தில் தொடங்கவுள்ளது. இதையொட்டி மைதானம் முழுவீச்சில் தயாராகியுள்ளது. இந்த போட்டியை இந்திய பிரதமர் நரேந்திர மோடி மற்றும் ஆஸ்திரேலிய பிரதமர் அல்பேனிஸ் ஆகியோர் முதல் நாள் ஆட்டத்தை நேரில் கண்டு களிக்கவுள்ளனர். இருநாட்டு தலைவர்கள் வருகை தரவுள்ளதால், மைதானத்தில் பாதுகாப்பு ஏற்பாடுகள் பலப்படுத்தப்பட்டுள்ளன. இந்த மைதானத்தில் நடைபெறும் போட்டிகளை 1 லட்சத்து 32 ஆயிரம் பேர் நேரில் கண்டு ரசிக்க முடியும்.

ஆஸ்திரேலிய பிரதமர் அல்பேனிஸ் 3 நாட்கள் சுற்றுப் பயணத்தை இந்தியாவில் மேற்கொள்ளவுள்ளதாக அந்நாட்டு தூதர் பேரி ஓ ஃபேரில் தெரிவித்துள்ளார். ஆஸ்திரேலிய பிரதமரும், இந்திய பிரதமர் மோடியும் நாளை தொடங்கவுள்ள 4 ஆவது டெஸ்டின் முதல் நாள் ஆட்டத்தை நேரில் காணவுள்ளனர். இரு நாட்டு உறவையும் கிரிக்கெட் இணைப்பதாக கூறியுள்ள ஆஸ்திரேலிய தூதர், இரு நாட்டு பிரதமர்கள் அகமதாபாத்தில் கிரிக்கெட் காண உள்ளதாவும், இது சிறப்பான தருணம் என்றும் கூறியுள்ளார்.  கடைசி டெஸ்ட் போட்டியையொட்டி, மைதானம் முழு வீச்சில் தயார் செய்யப்பட்டுள்ளது. ஏற்கனவே விளையாடப்பட்ட மைதானங்களின் தரம் குறித்து விமர்சனங்கள் எழுந்த நிலையில், அகமதாபாத் மைதானம் மிகுந்த கவனத்துடன் பராமரிக்கப்பட்டுள்ளதாக தகவல்கள் வெளிவந்துள்ளன.

கடைசி டெஸ்டில் இந்திய அணி வெற்றி பெற்றால், உலக டெஸ்ட் சாம்பியன்ஷிப் தொடரின் இறுதிப் போட்டிக்கு எளிதாக முன்னேறி விடும். அத்துடன் டெஸ்ட் போட்டிக்கான ஐசிசி தரவரிசையில் இந்திய அணி முதலிடத்திற்கு முன்னேறும். இன்னொரு பக்கம் ஆஸ்திரேலிய அணியும் நல்ல ஃபார்மில் இருப்பதால், இந்த போட்டியில் வெற்றி பெற்று தொடரை சமன் செய்ய கடுமையாக போராடும். இதனால் கடைசி டெஸ்ட் போட்டி கிரிக்கெட் ரசிகர்களுக்கு விருந்தாக அமையும் என்பதில் சந்தேகமில்லை.