IND vs NZ T20 : சுப்மன் கில் அதிரடி சதம்… இந்திய அணி 234 ரன்கள் குவிப்பு

நியூசிலாந்துக்கு எதிரான 3ஆவது டி20 கிரிக்கெட் போட்டியில் இந்திய அணி வீரர் சுப்மன் கில் அதிரடி சதம் விளாசியுள்ளார். முதலில் பேட்டிங் செய்துள்ள இந்திய அணி 20 ஓவர்கள் முடிவில் 4 விக்கெட் இழப்புக்கு 234 ரன்கள் எடுத்துள்ளது. நியூசிலாந்து அணிக்கு எதிரான 3ஆவது டி20 கிரிக்கெட் போட்டியில் டாஸ் வென்ற இந்திய அணியின் கேப்டன் ஹர்திக் பாண்ட்யா பேட்டிங்கை முதலில் தேர்வு செய்தார். வேகப்பந்து வீச்சிற்கு அகமதாபாத் மைதானம் சாதகமாக இருக்கும் என்பதால் இந்த போட்டியில் யுஸ்வேந்திர சாஹலுக்கு பதிலாக உம்ரான் மாலிக்கிற்கு வாய்ப்பு அளிக்கப்பட்டுள்ளது.

டி20 தொடரின் முதல் போட்டியில் நியூசிலாந்து அணியும், 2ஆவது போட்டியில் இந்தியாவும் வெற்றி பெற்றன. தொடரை வெல்லப்போவது யார் என்பதை தீர்மானிக்கும் 3ஆவது மற்றும் கடைசிப் போட்டி இன்று அகமதாபாத்தில் நடைபெற்று வருகிறது. டாஸ் வென்ற இந்திய அணி பேட்டிங்கை தேர்வு செய்தது. தொடக்க வீரர்களாக சுப்மன் கில் – இஷான் கிஷன் இணை களத்தில் இறங்கியது. 3 பந்தில் 1 ரன் எடுத்திருந்தபோது இஷான் கிஷன் ஆட்டமிழந்தார். அடுத்துவந்த ராகுல் திரிபாதி அதிரடியாக விளையாடி 22 பந்தில் 3 சிக்சருடன் 44 ரன்கள் எடுத்து அவுட் ஆனார். பெரிதும் எதிர்பார்க்கப்பட்ட சூர்ய குமார் யாதவ் 24 ரன்கள் மட்டுமே எடுத்தார்.

இந்திய அணி 125 ரன்னுக்கு 3 விக்கெட் என்ற நிலையில் இருந்தபோது சுப்மன் கில்லும் – கேப்டன் ஹர்திக் பாண்ட்யாவும் இணைந்து அதிரடியாக விளையாடினர். இருவரும் 4ஆவது விக்கெட்டிற்கு 103 ரன்கள் பார்ட்னர்ஷிப் அமைத்தனர். 17 பந்துகளில் 30 ரன்கள் எடுத்திருந்தபோது, ஹர்திக் பாண்ட்யா ஆட்டமிழந்தார். தொடக்கம் முதலே சிக்சரும் ஃபோருமாக பறக்கவிட்ட சுப்மன் கில் 63 பந்துகளில் 7 சிக்சர், 12 பவுண்டரிகளுடன் 126 ரன்கள் எடுத்து அசத்தினார். 20 ஓவர்கள் முடிவில் 4 விக்கெட்டுகளை இழந்த இந்திய அணி 234 ரன்கள் எடுத்துள்ளது. இதையடுத்து 235 ரன்கள் எடுத்தால் வெற்றி என்ற இலக்குடன் நியூசிலாந்து அணியின் பேட்ஸ்மேன்கள் களத்தில் இறங்கியுள்ளனர்.