கிரிக்கெட் வரலாற்று புத்தகத்தை மாற்றி எழுத வைத்த ரோஹித் சர்மா- சாதனைத் துளிகள்

நேற்று ஓவலில் இங்கிலாந்தை இந்தியா 10 விக்கெட்டுகள் வித்தியாசத்தில் வீழ்த்தியதில் ரோஹித் சர்மா 76 நாட் அவுட், ஷிகர் தவான் 31 நாட் அவுட், இந்த இன்னிங்சில் ரோஹித் சர்மா சிலபல சாதனைகளை முறியடித்துள்ளார், அது என்னவென்று பார்ப்போம்:

ஒருநாள் போட்டிகளில் 250 சிக்சர்கள்: நேற்று 5 சிக்சர்களை விளாசிய ரோஹித் சர்மா ஒருநாள் சர்வதேச போட்டிகளில் 250 சிக்சர்கள் மைல்கல்லை கடந்தார். 250 சிக்சர்களை தொட்ட முதல் இந்திய வீரர் ரோஹித் சர்மா.

இங்கிலாந்தில் அதிக 50கள்; வெளிநாட்டு அணிகளில் இங்கிலாந்தில் அதிக அரைசதம் அடித்த வீரர் என்ற சாதனையையும் ரோஹித் சர்மா நிகழ்த்தியுள்ளார், இவர் 25 ஒருநாள் போட்டிகளில் இங்கிலாந்தில் 7 அரைசதம் மற்றும் 7 சதங்களை அடித்துள்ளார். இதில் உலகக்கோப்பை 2019-ல் அடித்த 5 சதங்களும் அடங்கும்.

தொடக்க வீரராக அதிக 50கள்: ஓப்பனராக ரோஹித் சர்மா 60 முறை 50 அல்லது அதற்கு மேலான ஸ்கோரை எடுத்துள்ளார். ஹஷிம் ஆம்லா 56 முறை 50+ ஸ்கோர்களையும் ஷிகர் தவான் 52 முறை 50+ ஸ்கோர்களையும் எடுத்துள்ளனர்.

இதோடு கடந்த 5 ஆண்டுகளில் ஒருநாள் போட்டிகளில் மட்டும் ரோஹித் சர்மா 126 சிக்சர்களை விளாசியுள்ளார். 5 ஆண்டுகளில் கிறிஸ் கெய்ல் 93 சிக்சர்களையும் ஜானி பேர்ஸ்டோ 79 சிக்சர்களையும் இதற்கு முன்னர் விளாசியுள்ளனர்.

ரோஹித் சர்மாவும் ஷிகர் தவானும் நேற்று 114/0 என்று சதக்கூட்டணி அமைத்ததன் மூலம் ஒருநாள் கிரிக்கெட்டில் 5000 ரன்களை சேர்ந்து எடுத்த 4வது ஜோடியாகத் திகழ்கின்றனர். இந்தியர்களில் சச்சின் -சவுரவ் கங்குலி ஜோடிதான் இந்தப் பட்டியலில் முதலிடத்தில் உள்ளனர்.

ரோஹித்தும் தவானும் நேற்று 18வது செஞ்சுரி பார்ட்னர்ஷிப் அமைத்தனர். கங்குலியும் டெண்டுல்கரும் 26 சதக்கூட்டணி அமைத்துள்ளனர்.