கடந்த முறை மும்பையில் நியூசிலாந்து டெஸ்ட் ஆடிய போது விராட் கோலியின் வயது 3 வாரம் தான் 

மும்பையில் இந்தியா-நியூசிலாந்து அணிகளுக்கு இடையிலான 2வது டெஸ்ட்டின் டாஸ் மழை காரணமாக தாமதமாகியுள்ளது. இதை சுவாரசியமான ஒரு தகவலைப் பரிமாற பயன்படுத்துவோம், 1988-ல் கடைசியாக இந்தியா-நியூசிலாந்து அணிகள் மும்பையில் மோதிய போது இப்போதைய கேப்டன் விராட் கோலி பிறந்து 3 வாரங்கள்தான் ஆகியிருந்தன. நியூசிலாந்து கேப்டன் கேம் வில்லியம்சன் பிறக்கவேயில்லை.

கடைசியாக மும்பையில் நியூசிலாந்து அணி 1988-ம் ஆண்டு மோதிய போது முன்னாள் இந்திய அணியின் பயிற்சியாளர் ஜான் ரைட் அந்த அணிக்குக் கேப்டன், இந்திய அணிக்கு திலிப் வெங்சர்க்கார் கேப்டன். இந்தப் போட்டியில் நியூசிலாந்து வென்றது குறிப்பிடத்தக்கது. அதாவது இந்தியாவில் நியூசிலாந்து வென்ற 2 டெஸ்ட்களில் இதுவும் ஒன்று.

நியூசிலாந்து முதல் இன்னிங்சில் 236 ரன்கள் எடுத்தது. ஜான் பிரேஸ்வெல் என்ற ஸ்பின்னர் அரைசதம் எடுத்து அதிக ஸ்கோரை எடுத்தவரானார். இந்தியா தரப்பில் ரவிசாஸ்திரி 4 விக்கெட், ஹிர்வாணி 3 விக்கெட். கபில்தேவ் 2 விக்கெட். இந்தியா பேட்டிங் இறங்கிய போது நம் கிருஷ்ணமாச்சாரி ஸ்ரீகாந்த் 10 பவுண்டரி 2 சிக்சர்களுடன் 94 ரன்கள் விளாசினார். ரவிசாஸ்திரி 32 ரன்கள். சர் ரிச்சர்ட் ஹாட்லி 6 விக்கெட்டுகளைக் கைப்பற்றினார். இந்தியா 234 ரன்களுக்குச் சுருண்டது. இரண்டாவது இன்னிங்ஸில் நியூசிலாந்து 279 ரன்கள் எடுத்தது.

Also Read: ‘தென் ஆப்பிரிக்காவில் தேவையில்லாமல் ரஹானேவை நீக்கவில்லையா கோலி’

அர்ஷத் அயூப் 5 விக்கெட், ஹிர்வாணி 4 விக்கெட். இந்தியாவுக்கு வெற்றி இலக்கு 282 ரன்கள். இந்திய அணி 145 ரன்களுக்குச் சுருண்டு படுதோல்வி அடைந்தது. ஹாட்லி 4 விக்கெட் ஜான் பிரேஸ்வெல் 6 விக்கெட். ஹாட்லி 10 விக்கெட்டுகளை இந்தப் போட்டியில் கைப்பற்றினார். 3 டெஸ்ட் போட்டிகள் கொண்ட இந்தத் தொடர் 1-1 என்று டிரா ஆனது. ஆட்ட நாயகனாக பேட்டிங், பவுலிங்கில் அசத்திய ஜான் பிரேஸ்வெல் தேர்வு செய்யப்பட்டார்.

இதையும் படிங்க: 3 ஸ்பின்னர்கள் இல்லையாம்- மீண்டும் அஸ்வினுக்கு நெருக்கடி?- கோலி பீடிகை

ஆகவே அன்று அந்தப் போட்டியின் போது விராட் கோலி பிறந்தே 3 வாரங்கள்தான் ஆகியிருந்தது, கேன் வில்லியம்சன் பிறக்கவே இல்லை. இந்த இருவரும் இன்று கேப்டன்சியில் மோதும் வரலாற்றுத் தருணமாக இந்த மும்பை டெஸ்ட் போட்டி அமைகிறது.