நன்மைகள் செய்யும் பிரம்ம முகூர்த்த வழிபாடு...

பிரம்ம முகூர்த்த வழிபாடு

பிரம்ம முகூர்த்தம் என்பது காலை 3 மணி முதல் 5 மணி வரையாகும் எனவே அதிகாலை எழுந்திருக்கும்போது சில நன்மைகள் உண்டு. பிரம்மனுடைய மனைவி சரஸ்வதி தேவி விழித்துச் செயற்படும் நேரம் பிரம்மமுகூர்த்தம் என்பதும் நம்பிக்கை. ... இந்த நேரத்தில் செய்யும் வழிபாடு பலமடங்கு புன்ணியத்தை தரும்.

  • Share this:
பிரம்ம முகூர்த்தத்தின் இன்னொரு பெயர் "சரஸ்வதி யாமம்". இதனை உஷத் காலம் என்கிறது வேதங்கள். அந்த சமயத்தில் தேவர்கள் வான மண்டலத்தில் சஞ்சரிப்பதாகவும் ஒரு ஐதீகம் உண்டு. அதாவது, பிரம்ம முகூர்த்தம் என்பது காலை 3 மணி முதல் 5 மணி வரையில் உள்ள காலம் ஆகும். பிரம்மனுடைய சக்தி தேவியான சரஸ்வதி தேவி விழித்துச் செயற்படும் நேரம் பிரம்ம முகூர்த்தம் என்பதும் தொன்ம நம்பிக்கை.

"சூரியோதயே சாஸ்தமயே ஸாயினம் விமுஞ்சதி ஸ்ரீரபி ஸக்ரபாணிநம்!" என்கிறது சாஸ்திரம். மேற்கண்ட இந்த சம்ஸ்கிருத வார்த்தையின் பொருள் : சூரியன் உதயமாகும் நேரத்தில் தூங்குபவன், இந்திரனைப் போல் செல்வச் செழிப்பு கொண்டவனாக இருந்தாலும், அவனை விட்டு திருமகள் விலகி விடுவாள்.

மேலும் படிக்க...  செவ்வாய் தோஷம் இருந்தால் திருமணம் தடையாகுமா?

அதே சமயத்தில், பிரம்மமுகூர்த்தத்தில் எழுந்து செயற்படும் போது மன நிலையானது ஒரு நிலைப்படுகின்றது. அதற்கு ஏற்ற காலமாக இது விளங்குகின்றது. அதிகாலையில் சூரிய வெப்பம் கிடையாது. சந்திரனுடைய வெப்பதிட்ப குளுமையும் கிடையாது. இவை இரண்டுக்கும் மத்தியில் நிலவுவது பிரம்ம முகூர்த்தம்.

இந்நேரத்தில் எழுந்து ஜெபிப்பது, தியானம் செய்வது, யோகா செய்வது, கல்வி கற்பது, வேலைகள் செய்வது போன்றவை சிறந்த பயனைத் தருவதோடு ஞாபக சக்தியையும் விருத்தியாகும். அது மட்டும் அல்ல, இக்காலத்தில் செய்யப்படும் பூஜைகள் முழு பலனை அளிக்க வல்லது. பதினெண் புராணங்களில் ஒன்றான சிவபுராணத்தில் ருத்ரசம் ஹிதையின் சிருஷ்டி காண்டம் பதினொன்று மற்றும் பதிமூன்றாவது அத்தியாயங்களில் பிரம்ம முகூர்த்தத்தின் சிறப்பைப் பற்றி மேலும் சிறப்பாக  சொல்லப்பட்டுள்ளது.

மேலும் படிக்க... பெளர்ணமி தினத்தின் சிறப்புகள் என்ன?

மேற்கண்ட சாஸ்திரத்தின் படி எந்தெந்த கிழமைகளில் எப்படியான வழிபாடுகளை நடத்துவது சிறப்பு என்பதை பற்றி தெரிந்துக் கொள்ளலாம் வாங்க...

ஞாயிற்றுக் கிழமை பிரம்ம முகூர்த்தத்தில் அகல் விளக்கு (மண்ணால் செய்யப்பட்டது) ஏற்றி சத்ய நாராயண பூஜை செய்து பெருமாளை வழிபட்டு வர பித்ரு தோஷம் தீரும். முன் ஜென்ம கர்ம வினை அகலும், இதனால் பாவம் தொலையும். கிரக தோஷம் தீரும். மங்களம் உண்டாகும்.

திங்கட்கிழமை பிரம்ம முகூர்த்தத்தில் அகல் விளக்கு (மண்ணால் செய்யப்பட்டது) ஏற்றி அம்பாளை வழிபட மனம் தெளிவடையும், பயம் நீங்கும், ஞானம் பெருகும்.

செவ்வாய் கிழமை பிரம்ம முகூர்த்தத்தில் பஞ்சலோக விளக்கு ஏற்றி முருகப்பெருமானை வழிபட்டு கந்த சஷ்டி கவசம் படித்து வர வியாதிகள் தீரும். வீட்டில் மருத்துவச் செலவுகள் குறையும். கண்திருஷ்டி, பீடை, செய்வினைக் கோளாறுகள் அகலும்.

புதன் கிழமை பிரம்ம முகூர்த்தத்தில் குத்துவிளக்கு ஏற்றி துளசி சாற்றி விஷ்ணு சகஸ்ரநாமம் கேட்டு மகாவிஷ்ணுவை அல்லது குழந்தை கிருஷ்ணரை வழிபட்டு வர சந்ததி விருத்தி ஏற்படும். பெண் பிள்ளைகளே பிறந்து வந்த வீட்டில் கூட ஆண் குழந்தைக்கு வழிபிறக்கும். கல்வி மேம்படும். கலைஞர்கள் குறிப்பாக வழிபட்டு வர சகல கலைகளும் சித்திக்கும்.

மேலும் படிக்க... கிருஷ்ண ஜெயந்தி எப்போது, பூஜைக்கான நேரம் என்ன?

வியாழக் கிழமை பிரம்ம முகூர்த்தத்தில் நெய் அகல் விளக்கு ஏற்றி சித்தர்கள் அல்லது மகான்கள் அல்லது உங்களது குல தெய்வங்களை வழிபட்டு வர சகல சௌபாக்கியமும் கிடைக்கப்பெறும்.

வெள்ளிக்கிழமை பிரம்ம முகூர்த்தத்தில் வெள்ளி விளக்கு ஏற்றி மகாலக்ஷ்மியை கனகதாரா சுலோகம் சொல்லி வழிபட்டு வர வரவு அதிகரிக்கும் அல்லது வரவு அதிகரிக்க வழி பிறக்கும். இதனால் கடன்கள் அடைபடும். சேமிப்பு அதிகரிக்கும். வாழ்க்கை வசதிகள் மேம்படும். தொழில் அல்லது உத்யோகம் சிறக்கும். அஷ்ட லக்ஷ்மியும் வீட்டில் குடி கொள்வார்கள். சுக்கிரனின் அருளும் கிடைக்கப்பெறும். சிலருக்கு ஜாதகத்தில் காணப்படும் தரித்திர யோகமும் கூட முடிவுக்கு வரும். இதனால் ராஜயோகம் ஏற்படும்.

சனிக்கிழமை பிரம்ம முகூர்த்தத்தில் நல்லெண்ணெய் அகல்விளக்கு ஏற்றி ஸ்ரீ ருத்திரம் கேட்டு சிவ பெருமானை வழிபட்டு வர சனி தோஷம் தீரும். தரித்திரம் தொலையும்.

இப்படியாக ஒவ்வொரு கிழமையும் செய்யப்படும் பிரம்ம முகூர்த்த வழிபாடுகளுக்கும் ஒரு பலன் சாஸ்த்திரத்தில் சொல்லப்பட்டு உள்ளது. அந்த வகையில், வாழ்வில் எல்லா நலமும் வளமும் பெற நாமும் கூட இந்த பிரம்ம முகூர்த்த வழிபாடுகளை முறைப்படி செய்வோம்.

மேலும் படிக்க... ஆரோக்கியமாக இருக்க வாஸ்துப்படி சமையலறையை இந்த திசையில் வையுங்கள்...

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.
Published by:Vaijayanthi S
First published: