பாகிஸ்தான் ஜிந்தாபாத் சொன்ன பெண்ணைக் கொல்பவர்களுக்கு ரூ.10 லட்சம் - ஸ்ரீராம் சேனா அறிவிப்பு

பாகிஸ்தான் ஜிந்தாபாத் சொன்ன பெண்ணைக் கொல்பவர்களுக்கு ரூ.10 லட்சம் - ஸ்ரீராம் சேனா அறிவிப்பு
  • Share this:
பெங்களூருவில் நடைபெற்ற சிஏஏ எதிர்ப்புப் பேரணியில் அமுல்யா லியோனா (18) எனும் மாணவி ‘பாகிஸ்தான் ஜிந்தாபாத்’ முழக்கமிட்டதற்காக தேச துரோகச் சட்டத்தில் சிறைவைக்கப்பட்டுள்ளார். அவரைக் கொல்பவர்களுக்கு ஸ்ரீராம் சேனா 10 லட்சம் ரூபாய் வழங்கும் என அந்த அமைப்பின் பிரமுகர் அறிவித்துள்ளார்.

பெங்களூருவில் மூன்று நாள்களுக்கு முன் சிஏஏ, என்ஆர்சி எதிர்ப்புப் பேரணி நடைபெற்றது. அதில் AIMIM தலைவர் அசதுத்தீன் உவைஸியும் கலந்துகொண்டு உரை நிகழ்த்தினார். அந்தக் கூட்டத்தில் கல்லூரி மாணவி அமுல்யா ‘பாகிஸ்தான் ஜிந்தாபாத்’ கோஷமிட்டது பெரும் சர்ச்சைக்குள்ளானது. உவைஸி அந்த மேடையிலேயே மாணவியின் நடவடிக்கையைக் கண்டித்துப் பேசினார்.

மாணவி அமுல்யாவின் பேச்சுக்காக பெங்களூரு காவல்துறை, தேச துரோகச் சட்டம் 124(a) உட்பட பல்வேறு பிரிவுகளின் கீழ் அவர் மீது வழக்குப் பதிவு செய்து கைது செய்தது. அமுல்யாவுக்கு எதிராக பல்வேறு இடங்களில் இந்து அமைப்பினர் ஆர்ப்பாட்டங்கள் நடத்தினர். அவருடைய வீட்டைத் தாக்கியதோடு, அவரின் தந்தை வாஜியை ‘பாரத் மாதா கீ ஜெய்’ சொல்ல வைத்தனர். தன் மகள் செய்தது தவறு என்றும் அவரை ஆதரிக்கப் போவதில்லை என்றும் வாஜி கூறினார். அது காணொளியாக வாட்ஸ்அப்பில் பரவலாகப் பகிரப்பட்டது.


இதனிடையே, அமுல்யாவின் பேச்சு தவறாக விளங்கப்பட்டு விட்டதாக அவருடைய உறவினர்கள் தெரிவித்துள்ளனர். பாதியில் பேச்சை நிறுத்தியதால்தான் அது பிரச்னைக்குரியதாய் ஆகிவிட்டதாக அவர்கள் கூறுகின்றனர். கடந்த ஃபிப்ரவரி 18ஆம் தேதி அமுல்யா தனது முகநூல் பக்கத்தில், எந்த நாடாக இருந்தாலும் எல்லா நாடுகளும் நலமாக இருக்க வேண்டும் என்றும் பாகிஸ்தான், இந்தியா, வங்காளதேசம், இலங்கை என அனைத்து நாடுகளும் வாழ்க எனும் பொருளிலும் பதிவு செய்திருந்ததாகக் கூறப்படுகிறது.

இந்நிலையில், அமுல்யாவை ஆதரித்து பேனர் பிடித்ததற்காக அவரின் தோழி ஆர்திரா நாராயணன் என்பவரைக் கடந்த வெள்ளிக்கிழமை கைது செய்துள்ளனர். அமுல்யாவுக்கு எதிராக நடைபெறும் ஆர்ப்பாட்டங்களுக்கு எதிர்வினையாக அவர் ஒரு சார்டில் ”முஸ்லிம், தலித், காஷ்மிரி, பகுஜன், ஆதிவாசி, மாற்றுப் பாலினத்தார் விடுதலை” என எழுதி எடுத்துச் சென்றுள்ளார். இந்தப் பின்னணியில், மத, இன ரீதியில் அவர் பகைமையை ஏற்படுத்துவதாக வழக்குப் பதிவு செய்யப்பட்டு அவர் கைது செய்யப்பட்டார்.

தற்போது மாணவி அமுல்யாவைக் கொல்பவர்களுக்கு 10 லட்சம் ரூபாய் வெகுமதியளிக்கப்படும் என ஸ்ரீராம் சேனா பிரமுகர் சஞ்சீவ் மராதி கூறியிருக்கிறார். அத்தோடு, காவல்துறை அமுல்யாவை வெளிவர விடக்கூடாது என்றும் வெளியே விட்டால் கொலை செய்துவிடுவேன் என்றும் பேசி பெரும் சர்ச்சையை ஏற்படுத்தியிருக்கிறார். 

Also see:
First published: February 23, 2020
மேலும் பார்க்க
அடுத்து செய்திகள்