தேசியக் கொடி வாங்கினால் தான் ரேஷன் பொருள்..! - கட்டாயப்படுத்திய ரேஷன் விநியோகஸ்தரின் உரிமம் ரத்து

தேசியக் கொடி வாங்கினால் மட்டுமே, ரேஷன் பொருட்கள் வழங்கப்படும் என்று வாடிக்கையாளர்களை கட்டாயப்படுத்திய ஹரியானா ரேஷன் விநியோகஸ்தரின் உரிமம் ரத்து செய்யப்பட்டுள்ளது.

நாட்டின் 75வது சுதந்திர தினம் வரும் 15- ஆம் தேதி கொண்டாடப்படுகிறது. இதற்காக விடுதலை தின அமுதப்பெருவிழா என்ற தலைப்பில், நாடு முழுவதும் மத்திய அரசு கொண்டாட்ட ஏற்பாடுகளை செய்து வருகிறது. வீடுகள் தோறும் தேசியக் கொடி ஏற்ற வேண்டும் என்று பிரதமர் மோடி கேட்டுக்கொண்டுள்ளார். இதற்காக பாஜக ஆளும் மாநிலங்களில் அரசு சார்பில் லட்சக்கணக்கான கொடிகள் தயாரிக்கப்பட்டுள்ளன.

இந்தநிலையில் ஹரியானா மாநிலத்தில் தேசியக் கொடி வாங்கினால் மட்டுமே, ரேஷன் பொருட்கள் வழங்கப்படும் என்று நிர்பந்திப்பதாக புகார் எழுந்துள்ளது. கர்னல் மாவட்டத்தின் ஹெம்தா கிராமத்தில் உள்ள ரேஷன் கடையில், 20 ரூபாய்க்கு தேசியக் கொடி வாங்கினால் மட்டுமே ரேஷன் பொருட்கள் வழங்கப்படும் என்று அப்பகுதி மக்கள் கூறிய வீடியோ ஒன்றை பாஜக எம்.பி.வருண் காந்தி தனது டிவிட்டர் பக்கத்தில் பதிவிட்டார்.

आजादी की 75वीं वर्षगाँठ का उत्सव गरीबों पर ही बोझ बन जाए तो दुर्भाग्यपूर्ण होगा।

राशनकार्ड धारकों को या तिरंगा खरीदने पर मजबूर किया जा रहा है या उसके बदले उनके हिस्से का राशन काटा जा रहा है।

हर भारतीय के हृदय में बसने वाले तिरंगे की कीमत गरीब का निवाला छीन कर वसूलना शर्मनाक है। pic.twitter.com/pYKZCfGaCV

— Varun Gandhi (@varungandhi80) August 10, 2022

ஏழைகளின் உணவைப் பறித்துத்தான் தேசியக் கொடிகளை விற்பனை செய்யவேண்டுமா எனவும் வருண் காந்தி காட்டமாக கேள்வி எழுப்பினார். அதனைதொடர்ந்து இந்த விவகாரம் சமூக வலைதளங்களில் பேசுபொருளானது. பின்னர், தேசியக் கொடியை வாங்க மக்களை கட்டாயப்படுத்தியதாக மாவட்ட நிர்வாகத்திற்கு புகார் தெரிவிக்கப்பட்டது. அதன் அடிப்படையில் அக்கடையின் ரேஷன் விநியோக உரிமத்தை மாவட்ட நிர்வாகம் ரத்து செய்துள்ளது.

Also Read:  75ஆவது சுதந்திர தினத்திற்கான தில்லியின் காவல் ஏற்பாடுகள்..

இதுதொடர்பாக பேசிய ரேஷன் பொருட்கள் விநியோகஸ்தர், அரசு உத்தரவின்படியே தாங்கள் தேசியக் கொடியை விற்பனையை செய்ததாக கூறினார். ஆனால் இதனை மறுத்துள்ள ஹரியானா அரசு, மக்கள் விருப்பப்பட்டால் தான் தேசியக் கொடியை விற்பனை செய்யவேண்டும் என்று விளக்கமளித்துள்ளது.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.