மாஸ்கில் ரகசிய மைக்: நீட் தேர்வில் மோசடி செய்த கும்பல் கைது

மாஸ்கில் ரகசிய மைக் வைத்து நீட் தேர்வில் மோசடி

தேர்வறை கண்காணிப்பாளரின் உதவியுடன் நீட் தேர்வில் மோசடியில் ஈடுபட்ட மாணவி உட்பட 8 பேரை போலீசார் கைது செய்தனர்.

  • Share this:
    ராஜஸ்தானில் என்-95 (N-95) மாஸ்கில் ரகசிய மைக் வைத்து நீட் தேர்வில் மோசடி செய்ய முயன்ற கும்பலை போலீசார் கைது செய்துள்ளனர். அதேபோல, தேர்வு அறை கண்காணிப்பாளர் உதவியுடன் மோசடியில் ஈடுபட முயன்ற, மாணவி உட்பட 8 பேர் மற்றொரு பகுதியில் கைது செய்யப்பட்டுள்ளனர்.

    ராஜஸ்தான் மாநிலத்தில் ஜெய்பூர் மற்றும் சிகார் பகுதிகளில் மாணவர்களுக்கு பதிலாக போலியான நபர்கள் மூலம், நீட் தேர்வு எழுதவைக்கும் கும்பல் செயல்படுவதாக போலீசாருக்கு தகவல் கிடைத்துள்ளது. அதன் அடிப்படையில் தீவிர சோதனையில் ஈடுபட்ட போலீசார், இரண்டு வெவ்வேறு இடங்களில் இருந்து சில மருத்துவ மாணவர்கள் உட்பட 21 பேரை கைது செய்தனர்.

    கைதானவர்களிடமிருந்து, சந்தேகிக்கும் வகையில் தைக்கப்பட்டு இருந்த ஏராளமான N-95 மாஸ்குகள் கைப்பற்றப்பட்டன. அவற்றை பரிசோதித்ததில் மாஸ்கிற்கு உட்பகுதியில், தகவல் தொடர்பு சாதனங்கள் மறைத்து வைத்திருந்தது கண்டறியப்பட்டது. விசாரணையில், மாஸ்கிற்குள் சாதனங்களை மறைத்து வைத்தால் தேர்வறையில் யாரும் சந்தேகிக்க மாட்டார்கள் என்பதால், ஆன்லைனில் தகவல் தொடர்பு சாதனங்களை வாங்கி இந்த முயற்சியை மேற்கொண்டதாக கைதானவர்கள் தெரிவித்துள்ளனர்.

    தேர்வு அறைக்கு வெளியே இருப்பவர்களை தொடர்பு கொள்ள மாஸ்கின் உட்பகுதியில் பேட்டரி மூலம் இயங்க கூடிய கருவியை பொருத்தியுள்ளனர். நானோ சிம் கொண்ட இந்த கருவியில் ஒரே பொத்தானை அழுத்துவதன் மூலம், அழைப்புகளை மேற்கொள்ள முடியும். வெளியே இருப்பவர்கள் பேசுவதை தேர்வு எழுதுபவர்கள் கேட்க, காதின் உட்பகுதியில் பொருத்தக்கூடிய சிறிய வடிவலான இயர்பீஸ்களையும் அந்த கும்பல் பயன்படுத்தியுள்ளது. மாற்று நபர்கள் மூலம் தேர்வு எழுத வைப்பதாக கூறி, மாணவர்களிடம் லட்ச கணக்கில் பேரம் பேசியதையும் ஒப்புக் கொண்டுள்ளனர்.

    இதனிடையே, ஜெய்பூரில் தேர்வறை கண்காணிப்பாளரின் உதவியுடன் மோசடியில் ஈடுபட்ட, 18 வயதான தினேஷ்வரி குமாரி எனும் மாணவி உட்பட 8 பேரை போலீசார் கைது செய்தனர். விசாரணையில், தேர்வு தொடங்கியதும் தேர்வறை கண்காணிப்பாளரான ராம் சிங் மற்றும் தேர்வு மைய பொறுப்பாளர் முகேஷ் ஆகியோர், வினாத்தாளை புகைப்படம் எடுத்து சித்ரகூட் பகுதியில் தங்கியிருந்த இரண்டு பேருக்கு வாட்ஸ் அப் மூலம் அனுப்பியதாக மாணவி தெரிவித்துள்ளார்.

    Must Read : நீட் தேர்வு எழுதி மன உளைச்சலில் இருந்த மாணவி தூக்கிட்டு தற்கொலை

    அவர்கள் சிகார் பகுதியில் வேறு சிலருக்கு வினாத்தாளை அனுப்பி, அவர்கள் மூலம் சரியான விடைகளை பெற்றுள்ளனர். அங்கிருந்து முகேஷுக்கு விடைகள் கிடைக்க, அதனை வாட்ஸ்-அப் மூலம் பெற்ற ராம் சிங் மாணவிக்கு விடைகளை தெரிவித்துள்ளார். இதற்காக 30 லட்ச ரூபாய் பேரம் பேசப்பட்டு, தேர்வுமைய வளாகத்திலேயே 10 லட்ச ரூபாய் கைமாறியுள்ளது.

    Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்

    இந்த மோசடி தொடர்பாக 8 பேர் கைது செய்யப்பட்ட நிலையில், வினாத்தாள்களுக்கான விடைகளை அனுப்பிய நபர்கள் தொடர்பாக போலீசார் விசாரணை மேற்கொண்டுள்ளனர்.
    Published by:Suresh V
    First published: