'விவசாயிகள், இளைஞர்கள் நலனுக்காக காங்கிரஸ் போராடும்' - உத்தரப்பிரதேச தேர்தல் குறித்து பிரியங்கா காந்தி கருத்து

உத்தரப்பிரதேச சட்டமன்ற தேர்தல் தேதி அறிவிக்கப்பட்டுள்ள நிலையில், விவசாயிகள் மற்றும் இளைஞர்களின் நலனுக்காக காங்கிரஸ் கட்சி போராடும் என்று பிரியங்கா காந்தி கூறியுள்ளார்.

தேசிய அளவில் மிகவும் எதிர்பார்க்கப்படும் உத்தரப்பிரதேச சட்டமன்ற தேர்தல் மொத்தம் 7 கட்டங்களாக நடைபெறும் என்று இந்திய தேர்தல் ஆணையம் அறிவித்துள்ளது.

இதையும் படிங்க : உத்தரப்பிரதேசம், பஞ்சாப் உள்ளிட்ட 5 மாநில சட்டமன்ற தேர்தல் தேதி அறிவிப்பு

கொரோனா கட்டுப்பாடுகள் நடைமுறையில் இருப்பதால் ஜனவரி 15-ம்தேதி வரையில் அரசியல் கட்சிகள் பொதுக்கூட்டம், பேரணி, வாகன பேரணி உள்ளிட்டவை நடத்துவதற்கு அனுமதி மறுக்கப்பட்டுள்ளது.

5 மாநிலங்களில் முதலில், பிப்ரவரி 10-ம்தேதி உத்தரப்பிரதேசத்தில் ஆரம்பிக்கும் வாக்குப்பதிவு கடைசியாக மார்ச் 7-ம்தேதி உத்தரப்பிரதேசத்திலேயே நிறைவு பெறுகிறது.

உத்தரப்பிரதேசத்தில் முதல்கட்ட வாக்குப்பதிவு பிப்ரவரி 10-ம்தேதி நடைபெறவுள்ள நிலையில் அதற்கான அறிவிக்கை ஜனவரி 14-ம்தேதி வெளியாகும். வேட்பு மனுத்தாக்கல் செய்ய கடைசி நாள் ஜனவரி 21. 24-ம்தேதி மனுக்கள் பரிசீலனை செய்யப்படும். 27-ம்தேதிக்குள் வேட்பு மனுக்களை திரும்பப் பெற்றுக் கொள்ளலாம்.

இதையும் படிங்க : 'மின்னணு வாக்குப்பதிவு எந்திரங்களை எண்ணி பெருமை கொள்ள வேண்டும்' : தேர்தல் ஆணையம்

இதேபோன்று ஒவ்வொரு கட்டங்களுக்கும் தேர்தல் அறிவிப்புக்கு பின்னர் வேட்பு மனுத்தாக்கல் செய்ய 7 நாட்கள் அவகாசம் வழங்கப்படுகிறது. பரிசீலனைக்கு பின்னர் மனுக்களை திரும்பப் பெற 3 நாட்கள் அளிக்கப்படுகிறது.

உத்தரப்பிரதேசத்தில் 7 கட்டங்களாக வாக்குப்பதிவு முறையே, பிப்ரவரி 10, 14, 20, 23, 27, மார்ச் 3 மற்றும் மார்ச் 7 ஆகிய தினங்களில் நடைபெறவுள்ளது.

இதையும் படிங்க : 5 மாநில தேர்தல் தேதி அறிவிப்பு : உத்தரப்பிரதேசத்தில் 7 கட்டங்களாக வாக்குப்பதிவு

இந்த தேர்தலில் பாஜக, காங்கிரஸ், பகுஜன் சமாஜ், சமாஜ்வாதி கட்சிகளிடையே 4 முனை போட்டி ஏற்படும் என் எதிர்பார்க்கப்படுகிறது. இந்நிலையில் தேர்தல் அறிவிப்பு குறித்து காங்கிரஸ் கட்சியின் பொதுச்செயலாளர் பிரியங்கா காந்தி கூறியததாவது-

தேர்தல் முடிவு அறிவிக்கப்படும் மார்ச் 10-ம்தேதி, இளைஞர்கள், விவசாயிகள், பெண்கள், வியாபாரிகள் மற்றும் பொதுமக்களின் வெற்றி நாளாக அமையும். அவர்களின் வெற்றிக்காக, நலனுக்காக காங்கிரஸ் கட்சி போராடும்.

இவ்வாறு அவர் தெரிவித்துள்ளார்.