மகா சிவராத்திரி 2023| மதுரை மீனாட்சியம்மன் கோயிலில் விடிய விடிய நடக்கும் பூஜைகள்!

மதுரை மீனாட்சியம்மன் கோயிலில் வரும் 18ஆம் தேதி மகா சிவராத்திரியன்று மீனாட்சி சுந்தரேஸ்வரருக்கு விடிய விடிய சிறப்பு வழிபாடு நடைபெறவுள்ளது.

மதுரையில் உலக பிரசித்தி பெற்ற மீனாட்சியம்மன் கோயில் அமைந்துள்ளது. இந்த கோயிலில் தினசரி வெளிநாடு, வெளிமாநிலம், வெளிமாவட்டம் என  லட்சக்கணக்கான பக்தர்கள் வந்து செல்கின்றனர். வரும் மகா சிவராத்திரியன்று சிவன் கோயில்களில் சிறப்பு பூஜைகள் நடைபெறுவது வழக்கம். அந்த வகையில் மீனாட்சியம்மன் கோயிலிலும் வரும் 18ஆம் தேதி மகா சிவராத்திரியன்று சிறப்பு பூஜைகள் நடைபெறுவதாக தெரிவிக்கப்பட்டுள்ளது.

இரவு முழுவதும் நடைபெறும் 4 கால பூஜை, அபிஷேகத்திற்கு தேவையான பால், தயிர், இளநீர், பன்னீர், பழவகைகள், தேன், மஞ்சள் பொடி, எண்ணெய், நெய் மற்றும் இதர அபிஷேக பொருட்களை வருகிற 18-ந் தேதி மாலைக்குள் கோவில் உள்துறை அலுவலகத்தில் பக்தர்கள் ஒப்படைக்கலாம்.

சிவராத்திரி விழாவையொட்டி அன்று இரவு 4 கால பூஜைகள் நடைபெறும். அதன்படி மீனாட்சி அம்மன் சன்னதியில் முதல் கால பூஜை இரவு 10 மணிக்கு தொடங்கி 10.45 மணி வரையிலும், 2-ம் கால பூஜை 11 மணிக்கு தொடங்கி 11.40 மணி வரையிலும், 3-ம் கால பூஜை 12 மணிக்கு தொடங்கி 12.40 மணி வரையிலும், 4-ம் கால பூஜை நள்ளிரவு 1 மணிக்கு தொடங்கி 1.45 மணி வரையிலும் நடைபெறும்.

அதேபோன்று சுவாமி சன்னதியில் முதல் கால பூஜை இரவு 11 மணிக்கு தொடங்கி 11.45 மணி வரையிலும், 2-ம் கால பூஜை இரவு 12 மணிக்கு தொடங்கி 12.45 மணி வரையிலும், 3-ம் கால பூஜை நள்ளிரவு 1 மணிக்கு தொடங்கி 1.45 மணி வரையிலும், 4-ம் கால பூஜை 2 மணிக்கு தொடங்கி 2.45 மணி வரையிலும் நடைபெறும். அதை தொடர்ந்து அதிகாலை 3 மணிக்கு அர்த்த சாம பூஜையும், 4 மணிக்கு பள்ளியறை பூஜையும், 5 மணிக்கு திருவனந்தல் பூஜையும் நடைபெற உள்ளது என்று  மதுரை மீனாட்சி  அம்மன்  கோவில் நிர்வாகம் தெரிவித்துள்ளது.