ராமேஸ்வரம்: மாடுகளுக்கு பொங்கல் வைத்து சிறப்பு வழிபாடு

ராமேஸ்வரத்தில் பட்டதாரி இளைஞர்கள் ஒன்று சேர்ந்து 20-க்கும் மேற்பட்ட பசு மற்றும் காளை மாடுகளை குளிப்பாட்டி, வர்ணம் பூசி, சந்தன குங்குமப் பொட்டு வைத்து மாலை அணிவித்தும் பொங்கல் வைத்தும் மாடுகளுக்கு தீபாராதனை செய்தும் வழிபட்டனர்.

மாட்டுப் பொங்கல் என்பது தைப்பொங்கல் நாளின் மறுநாள் தமிழர்களால் கொண்டாடப்படும் ஒரு பண்டிகை ஆகும். இது பட்டிப் பொங்கல் அல்லது கன்றுப் பொங்கல் எனவும் அழைக்கப்படுகிறது.

மக்களின் வாழ்வில் ஒன்றிய பசுவுக்கு நன்றி தெரிவிப்பதற்காகவும், பசுக்களில் எல்லாத் தேவர்களும் இருப்பதாலும் பசுக்களை வணங்கி வழிபடும் நாளாகக் கொண்டாடுகின்றனர். அன்று மாடுகள் கட்டும் தொழுவத்தினைச் சுத்தம் செய்து கால்நடைகளை குளிப்பாட்டி சுத்தம் செய்வார்கள்.

மாடுகளின் கொம்புகள் சீவப்பட்டு பளபளக்கும் வகையில் வண்ணம் பூசி, கூரான கொம்பில் குஞ்சம் அல்லது சலங்கை கட்டிவிடுவார்கள். கழுத்துக்கு தோலிலான வார் பட்டையில் சலங்கை கட்டி அழகு படுத்துவார்கள். திருநீறு பூசி குங்குமப் பொட்டிட்டும் புதிய மூக்கணாங் கயிறு, தாம்புக் கயிறு அணிவித்தும் தயார் செய்வார்கள்.

உழவுக்கருவிகளை சுத்தம் செய்து சந்தனம், குங்குமம் வைப்பார்கள். விவசாயத்தில் பயன்படுத்தப்படும் அனைத்துக் கருவிகளையும் இதேபோல செய்வார்கள். தாம்பாளத் தட்டுகளில் தோட்டம் காடுகளில் விளைந்த பயிர், பச்சைகளை வைத்தும் தேங்காய், பூ, பழம், நாட்டுச் சர்க்கரை என எல்லாம் பூஜைக்காக எடுத்து வைப்பார்கள்.

தொழுவத்திலேயே பொங்கல் பொங்கி கற்பூர தீபாராதனை காட்டப்படும். இதன் பின் பசு, காளை, எருமை என அனைத்து கால்நடைகளுக்கும் பொங்கல், பழம் கொடுத்து மகிழ்வார்கள். அந்த வகையில் இந்தாண்டு கோலாகலமாக மாட்டுப் பொங்கல் கொண்டாடப்பட்டது.

செய்தியாளர்: பூ.மனோஜ்குமார், இராமநாதபுரம்.