மகளிர் டி20 உலகக்கோப்பையை வென்றது ஆஸ்திரேலிய அணி…

தென்னாப்பிரிக்க அணியை 19 ரன்கள் வித்தியாசத்தில் வீழ்த்தி மகளிர் டி20 உலகக்கோப்பையை ஆஸ்திரேலிய அணி வென்றுள்ளது. 157 ரன்களை இலக்காக கொண்டு விளையாடிய தென்னாப்பிரிக்க அணி ஆட்ட நேர முடிவில் 137 ரன்கள் மட்டுமே எடுத்து தோல்வியை தழுவியது.  தென்னாப்பிரிக்காவின் கேப்டவுன் நகரில் நடைபெற்ற மகளிர் டி20 உலகக்கோப்பை இறுதிப் போட்டியில் ஆஸ்திரேலியா – தென்னாப்பிரிக்கா அணிகள் மோதின. டாஸ் வென்ற ஆஸ்திரேலிய அணி பேட்டிங்கை முதலில் தேர்வு செய்தது. தொடக்க வீராங்கனைகளாக அலீசா ஹீலி மற்றும் பெத் மூனி ஆகியோர் களத்தில் இறங்கினர்.

அலீசா 18 ரன்கள் எடுத்து ஆட்டமிழக்க அடுத்து வந்த அஷ்லே கார்டனர் 29 ரன்னில் வெளியேறினார். கிரேஸ் ஹாரிஸ் 10 ரன்னும்,கேப்டன் மெக் லேனிங் 10 ரன்களும் எடுத்தனர். விக்கெட்டுகளை ஒருபக்கம் விழுந்தாலும், ஆஸ்திரேலிய அணியின் தொடக்க வீராங்கனை பெத் மூனி பொறுப்புடன் விளையாடி ரன்களை சேர்த்தார். கடைசி வரை களத்தில் நின்ற பெத் மூனி 53 பந்துகளில் ஒரு சிக்சர், 9 பவுண்டரியுடன் 74 ரன்கள் எடுத்தார். 20 ஓவர்கள் முடிவில் 6 விக்கெட்டுகளை இழந்த ஆஸ்திரேலியா அணி 156 ரன்கள் எடுத்தது. இதையடுத்து 157 ரன்கள் எடுத்தால் வெற்றி என்ற இலக்குடன் தென்னாப்பிரிக்க அணியின் வீராங்கனைகள் களத்தில் இறங்கினர்.

ஆஸ்திரேலிய அணியின் துல்லியமான பந்து வீச்சுக்கு ஈடுகொடுக்க முடியாமல் தென்னாப்பிரிக்க வீராங்கனைகள் திணறினர். தொடக்க வீராங்கனை லாரா வோல்வாரிட்டை தவிர்த்து மற்ற பேட்டர்கள் அடுத்தடுத்து ஆட்டமிழந்து வெளியேறினர். க்ளோ ட்ரையான் மட்டும் 25 ரன்கள் எடுத்து தென்னாப்பிரிக்க அணிக்கு நம்பிக்கை கொடுத்தார். லாரா 48 பந்துகளில் 61 ரன்களை அதிரடியாக சேர்த்தார். 20 ஓவர்கள் முடிவில் 6 விக்கெட்டை இழந்த தென்னாப்பிரிக்க அணி 137 ரன்கள் மட்டுமே எடுத்து தோல்வியடைந்தது.