Tamil News Live : 'ஸ்டெர்லைட் ஆலையை மூட அவசரப்படத் தேவையில்லை' - அமைச்சர் மா.சுப்பிரமணியன்

தேனியில், 67 வயது முதியவருக்கு, ஒரே நேரத்தில் இரண்டு முறை கொரோனா தடுப்பூசி செலுத்தப்பட்டதாக காவல்நிலையத்தில் புகார் அளிக்கப்பட்டுள்ளது. 
அல்லிநகரத்தைச் சேர்ந்த முதியவர், 2-வது தவணை தடுப்பூசி செலுத்துவதற்காக, தேனியில் தனியார் திருமண மண்டபத்தில் அமைக்கப்பட்ட சிறப்பு முகாமிற்கு சென்றுள்ளார். அங்கு அவருக்கு தடுப்பூசி போட்ட பின்னர், காய்ச்சல் மாத்திரை வாங்குவதற்காக காத்திருந்துள்ளார். அப்போது செவிலியர் ஒருவர் மீண்டும் கொரோனா தடுப்பூசி போட முயன்றுள்ளார். தான் ஏற்கெனவே போட்டுவிட்டதாக கூறி தடுக்கும் முன்னரே, முதியவருக்கு 2-வது முறையாக தடுப்பூசி போடப்பட்டுள்ளது. இது தொடர்பாக காவல்நிலையத்தில் முதியவரின் உறவினர்கள் புகார் அளித்துள்ளனர். இதனிடையே ஒரேநேரத்தில் 2 முறை தடுப்பூசி போட்டுக் கொண்டால், உடனடியாக அருகில் உள்ள மருத்துவமனையை அணுக வேண்டும் எனவும் சாதாரண காய்ச்சலுக்கு வழங்கப்படும் பாராசிட்டமால் மாத்திரைகளை உட்கொண்டாலே பக்க விளைவுகள் ஏற்படாது என்றும் மருத்துவ நிபுணர்கள் தெரிவித்துள்ளனர்.

துறைமுகத்தில் பலத்த சத்தத்துடன் வெடித்து சிதறிய கண்டெய்னர் : நகரின் பல வீடுகளில் உணரப்பட்ட அதிர்வு

துபாயின் ஜெபல் அலி துறைமுகத்தில் இருந்த சரக்கு கப்பலில், பயங்கர வெடி சத்தத்தை தொடர்ந்து தீ விபத்து ஏற்பட்டது. கண்டெய்னரில் ஏற்பட்ட வெடி விபத்தால் உருவான அதிர்வு, நகரின் பல வீடுகளில் உணரப்பட்டது. துறைமுகத்தில் பல கண்டெய்னர்கள் சேதமடைந்த நிலையில், தகவலறிந்து வந்த தீயணைப்புத்துறையினர் போராடி தீயை கட்டுக்குள் கொண்டு வந்தனர். அதிர்ஷ்டவசமாக இதில் யாரும் காயமடையவில்லை என கூறப்படும் நிலையில், விபத்துக்கான காரணம் தொடர்பாக விசாரணை நடைபெற்று வருகிறது.

ரூ.80 லட்சம் மோசடி செய்த ஆடிட்டர் கடத்தல் - 6 பேர் கைது

மின்வாரியத்தில் வேலை வாங்கி தருவதாக 80 லட்சம் ரூபாய் மோசடி செய்த ஆடிட்டரை காரில் கடத்திய 6 பேரை போலீசார் கைது செய்தனர். கடந்த 6ஆம் தேதி எழும்பூரில் உள்ள தனியார் லாட்ஜ் அருகே ஆடிட்டர் ராஜாவை 6 பேர் கொண்ட கும்பல் சரமாரியாக தாக்கி காரில் கடத்தி சென்றது. இது தொடர்பாக ஆடிட்டரின் கார் ஓட்டுநர் காவல் நிலையத்தில் புகார் அளித்தார். அதனை தொடர்ந்து சம்மந்தப்பட்ட லாட்ஜில் போலீசார் விசாரணை நடத்தியதில் அந்த லாட்ஜில் தங்கியிருந்த 6 பேர்தான் ஆடிட்டரை கடத்தியது தெரியவந்தது.ராஜாவின் செல்போன் எண்ணை டிராக் செய்த போலீசார், அந்த 6 பேரையும் தொடர்பு கொண்டு காவல் நிலையத்திற்கு ஆடிட்டரை அழைத்து வரும்படி எச்சரித்துள்ளனர். அதன்பிறகு ஆடிட்டர் ராஜாவுடன் காவல் நிலையம் வந்த 6 பேரிடம் நடத்திய விசாரணையில், மின்வாரியத்தில் வேலை வாங்கி தருவதாக 80 லட்சத்தை மோசடி செய்ததால்தான் ஆடிட்டரை கடத்தியதாக வாக்குமூலம் அளித்தனர். அதனை தொடர்ந்து அலெக்ஸ், கில்லிவாளன், குமார், சுதர்சன் உள்ளிட்ட 6 பேரை போலீசார் கைது செய்தனர்.

ஆக்சிஜன் உற்பத்தி செய்யும் ஸ்டெர்லைட் ஆலையை மூட அவசரப்படத் தேவையில்லை..கொரோனா முற்றாக ஒழியட்டும் என மருத்துவ அமைச்சர் மா.சுப்பிரமணியன் பேட்டி...

ஸ்டெர்லைட் ஆலையில் தற்போது ஆக்சிஜன் உற்பத்தி செய்யப்பட்டு வரும் சூழலில், ஆலையை மூட வேண்டிய அவசரம் இல்லை என மக்கள் நல்வாழ்வுத்துறை அமைச்சர் மா.சுப்பிரமணியன் கூறியுள்ளார்.

சென்னை மெட்ரோ ரயில் சேவை நேரம் நீட்டிப்பு

சென்னையில் இன்று முதல் மெட்ரோ ரயில் சேவை நேரம் நீட்டிக்கப்பட்டுள்ளது. காலை மற்றும் மாலை நேரங்களில் அதிகளவில் மெட்ரோ ரயில்களை இயக்க வேண்டுமென பொதுமக்கள் தொடர்ந்து கோரிக்கை விடுத்திருந்தனர். இதனை ஏற்ற சென்னை மெட்ரோ ரயில்வே நிர்வாகம், இன்று முதல் காலை 6 முப்பது மணிக்கு பதில் அதிகாலை 5 முப்பது மணிக்கே மெட்ரோ ரயில் சேவை தொடங்கப்படும் என தெரிவித்துள்ளது. காலை 5 முப்பது மணிக்கு தொடங்கும் ரயில் சேவை இரவு 9 மணி வரை இயக்கப்படும் என மெட்ரோ ரயில் நிர்வாகம் குறிப்பிட்டுள்ளது. இதுதவிர கூட்ட நெரிசல் மிகுந்த நேரங்களான காலை 8 மணி முதல் காலை 11 மணி வரை 5 நிமிட இடைவெளியில் ரயில்கள் இயக்கப்படும் எனவும் அதேபோல் மாலை 5 மணி முதல் இரவு 8 மணி வரை 5 நிமிட இடைவெளியில் மெட்ரோ ரயில்கள் இயக்கப்படும் எனவும் கூறப்பட்டுள்ளது. மற்ற நேரங்களில் 10 நிமிடங்களுக்கு ஒருமுறை ரயில் இயக்கப்படும் என மெட்ரோ ரயில்வே நிர்வாகம் தெரிவித்துள்ளது.

தானிய கிடங்கிலிருந்து வெளியேறும் பூச்சிகள் : செல்பூச்சிகளால் குடியிருப்புவாசிகள் கடும் அவதி

கோவை பீளமேடு பகுதியில் உணவு தானிய கிடங்கிலிருந்து வெளியேறும் பூச்சிகளால், சுற்றுவட்டாரப்பகுதி மக்கள் கடுமையாக பாதிக்கப்பட்டுள்ளனர். காந்திமாநகர் பகுதியில், மத்திய அரசின் உணவு தானிய சேமிப்பு கிடங்கு உள்ளது. இங்கு இருப்பில் வைக்கப்பட்டுள்ள தானியங்களால் உற்பத்தியாகும் செல்பூச்சிகள், அருகிலிருக்கும் ஸ்ரீராம்நகர், முருகன்நகர் குடியிருப்புகளுக்கு புகுந்து விடுகின்றன. உணவுகளில் பூச்சிகள் விழுந்து விடுவதால், சாப்பிட முடியாமல் கீழே கொட்டுவதாகவும், பூச்சி தொல்லையால் பல்வேறு உடல்நல பாதிப்புக்கு ஆளாவதாகவும் பொதுமக்கள் வேதனை தெரிவிக்கின்றனர்.

இயக்குநர் லிங்குசாமி மீது சீமான் கொடுத்த புகார் தள்ளுபடி செய்யப்பட்டுள்ளது.

அரியவகை மரபணு நோய்க்கு இந்தியாவில் மருந்து அறிமுகம்

அரியவகை மரபணு நோய்க்கு இந்தியாவில் மருந்து அறிமுகம்

SMA என்ற முதுகு தண்டுவட தசை சிதைவு நோய்க்கு  Roche நிறுவனம் தயாரிக்கும் மருந்து வரும் 10ம் தேதி முதல் இந்திய சந்தையில் அறிமுகம்.இந்திய மருந்து கட்டுப்பாட்டு ஒப்புதல் பெற்றுள்ளது 

மதுரையில்  நாளிதழ் ( தினகரன்)  அலுவகம் எரிப்பு வழக்கில்,     மதுரை மத்திய சிறையில் ஆயுள் தண்டனை கைதியாக உள்ள அட்டாக் பாண்டிக்கு,  அவசர கால விடுப்பாக 10 நாட்கள் வழங்க உத்தரவிட கோரிய மனு மீதான விசாரணையில் மதுரை மத்திய சிறை துறை கண்காணிப்பாளர்,  பதில்மனு தாக்கல் செய்ய உத்தரவிட்டு வழக்கு விசாரணையை ஜூலை 26 ம் தேதி ஒத்தி வைத்து உயர்நீதிமன்றம் மதுரை கிளை உத்தரவு.