Home /News /lifestyle /

கிழக்கு கடற்கரை சாலையில் ஒரு நாள்... குடும்பத்துடன் சுற்றிப் பார்க்க ஏற்ற இடங்கள்

கிழக்கு கடற்கரை சாலையில் ஒரு நாள்... குடும்பத்துடன் சுற்றிப் பார்க்க ஏற்ற இடங்கள்

கிழக்கு கடற்கரை சாலையில் ஒரு நாள் பயணம்

கிழக்கு கடற்கரை சாலையில் ஒரு நாள் பயணம்

one day trip in ECR: வங்கக் கடலின் உப்புக்காத்தோடு கிழக்கு கடற்கரை சாலையில் ஒரு நாள் எங்கெல்லாம் பயணிக்கலாம்

பள்ளிக்கூடம் திறந்தாச்சு. பாடங்கள் தொடங்கியாச்சு. ஆனா சுற்றுலா சீசன் எப்பவும் முடிவதில்லை.

சென்னையில் இருக்கும் நபர்களுக்கு ஞாயிறு விடுமுறையை கழிக்க ஒரு நாள் ட்ரிப் ஐடியா இதோ….

Ecr என்றாலே ரைடு தான் நினைவுக்கு வரும். பைக் இருக்கும் இளைஞர்கள் அதை எடுத்துக் கொண்டு ‘பறக்கும் ராசாளியே’ என்று சத்தமாக ஹெட்செட்டில் பாட்டு கேட்டுக்கொண்டு ஒரு குதூகலத்துடன் ரைடு போவார்கள். ஆனால் குழந்தைகள், குடும்பஸ்தர்கள் ecr இல் என்ன செய்யலாம் என்று யோசிக்கிறீர்களா? சில ஐடியாக்கள் தருகிறோம் ட்ரை செய்து பாருங்கள்.



தாம்பரம், பிராட்வே, வேளச்சேரி , கோயம்பேடு என்று சென்னையின் முக்கிய புள்ளிகளில் இருந்து ECRக்கு பேருந்துகள் இருந்து கொண்டே இருக்கிறது. கிழக்கு கடற்கரையோரம் வண்டி திரும்பியதுமே கரையோர உப்புக்காத்து உங்களை வரவேற்கும்.

முதல் நிறுத்தம் சோழ மண்டலம்.



10 கிலோமீட்டர் பரப்பில் 30 க்கும் மேற்பட்ட கலைஞர்களின் ஓவியங்கள் , செதுக்கல்கள், கைவினை பொருட்கள் காட்சிப் படுத்தப்பட்டுள்ளன. அருங்காட்சியகங்களை வேடிக்கை பார்த்துக் கொண்டு அங்குள்ள நூலகத்தையும் பார்வையிடலாம். திறந்தவெளி தியேட்டரும் உள்ளது. நுழைவுக்கட்டணம் வெறும் 20 ரூபாய் தான். காலை 9.30 முதல் மாலை 6.30 வரை திறந்திருக்கும்.

அடுத்த நிறுத்தம் விஜிபி:

விஜிபி நிறுவனத்தின் குளிரூட்டும் ஸ்னோ கிங்டம், தண்ணீரில் குதூகலிக்க அம்யூஸ்மென்ட் பூங்கா , மீன்களைக் காண தண்ணீருக்குள் சுரங்கப்பாதை போன்ற அமைப்போடு சுற்றி உலவும் மீன்களை காணும் காட்சி இருக்கே.. அப்பப்பா..

யூனிவர்சல் கிங்டம் காலை 9.30 முதல் மாலை 6 30 வரை திறந்திருக்கும். 300 முதல் 700 வரை டிக்கெட்டுகள் உள்ளன. சாகசங்களைப் பொறுத்து விலை மாறும்.

ஸ்னோ கிங்டம் 10 மணி முதல் இரவு 8 மணி வரை திறந்திருக்கும். பனியை உருட்டி நண்பர்கள் மீது வீசியும் இக்ளூக்களில் வாசித்தும் மகிழலாம். பெரியவர்களுக்கு 345, குழந்தைகளுக்கு 150 கட்டணமாக வசூலிக்கப்படுகிறது. 



மரைன் உலகம் காலை 9 முதல் 8 இரவு வரை திறந்திருக்கும். இங்கே திமிங்கலங்களுக்கு இடையே ‘ஸ்கூபா டைவிங்’ போக  மறந்துடாதீங்க மக்களே.

அடுத்த நிறுத்தம் நேரே முட்டுகாடு படகு இல்லம் தான்…

கான்கிரீட் காடுகளில் வாழும் நமக்கு இயற்கையோட உறவாட ஒரு வாய்ப்பாக இது இருக்கும். 40 கிலோமீட்டர்  கொண்ட ஏரியின் ஓரம் உள்ள சதுப்பு நிலக்காடுகளோடு சேர்ந்து ஒரு படகுப்பயணம். வாட்டர் ஸ்கூட்டர், மோட்டார் படகு , துடுப்பு படகு, ஸ்பீட் படகு என்று 5 நிமிடம் முதல் 30 நிமிடங்கள் வரை பயணம் அமையும். 3 முதல் 8 பேர் வரை பயணிக்கும் வசதி உள்ளது.



30 நிமிடங்கள் பொறுமையாக அந்த ஏரியில் குடும்பத்தோடு  உலா வாருங்கள். 400 முதல் 950 வரை படகு கட்டணம் ஆகும். 2 முதல் 3 மணி நேரம் ஒரு பசுமையான உலகத்திற்குள் போய் வந்த உணர்வு இருக்கும்.

கடைசி நிறுத்தம்  தக்ஷிண சித்ரா பாரம்பரிய அருங்காட்சியகம்.

பெயருக்கேற்றாற்போல் கலாச்சார பாரம்பரியங்களை காணும் வாய்ப்பை இது அமைத்துத்தருகிறது. கேரளா, தமிழ்நாடு, கர்நாடகா, ஆந்திரா என்று பெயரிட்ட வீடுகளை அமைத்துள்ளனர். ஒவ்வொரு வீடும் அந்த மாநிலத்தின் பாரம்பரியங்களின் குறியீடுகள் அனைத்தையும் தன்னுள் கொண்டுள்ளது. ஒவ்வொரு வீட்டிற்குள் செல்லும் பொது அந்த மாநிலத்திற்கே சென்று வந்த அனுபவம் தரும்.

 

இன்று முதல் கிராம-நகர மாற்றங்கள் குறித்த ஓவிய கண்காட்சி வேறு நடக்க இருக்கிறது. பார்க்க மறந்துறாதீங்க…அப்புறம் வருத்தப்படுவீங்க….

குழந்தைகளுக்கு 50 பெரியவர்களுக்கு 100 ரூபாய் நுழைவுக்கட்டணம். காலை  10 முதல் மாலை 6 வரை திறந்திருக்கும். இங்கு அருங்காட்சியகம் மட்டுமின்றி கற்றல் சாலைகளும் உள்ளது. மண்பாண்டங்கள், மரபாண்டங்கள் செய்ய கற்றுத்தரப்படுகிறது.



இறுதியாக ECR பீச்சில் நின்று ரம்யமான கடலுள் மூழ்கும் சூரியனை பார்த்து விட்டு வீட்டுக்கு போனால் அழகான ஒரு ஞாயிறு முடியும். என்ன நீங்க இன்னும் கிளம்பலையா?
Published by:Ilakkiya GP
First published:

Tags: Chennai, Travel, Trip

அடுத்த செய்தி