வருடத்திற்கு ஒருமுறை மட்டுமே திறக்கும் கர்நாடகாவின் கோவில் பற்றி கேட்டிருக்கிறீர்களா?

இந்தியாவில் கோவில்களுக்கு பஞ்சமே கிடையாது. ஊர் தோறும் காவல் தெய்வங்கள், முன்னோர்கள், புராண தெய்வங்கள், என்று அனைவருக்கும் கோவில்கள் எழுப்பப்பட்டுள்ளன. அதில் ஒரு சில கோவிலின் பழக்க வழக்கங்களும் புராணங்களும் அந்த கோவிலை தனித்துவமானதாகக்  காட்டும். அது போன்ற ஒரு சுவாரசிய கோவிலை பற்றி தான் இதில் பார்க்க இருக்கிறோம்.

பொதுவாக கோவில் என்றால் காலையில் திறந்து மாலையில் மூடிவிடுவார்கள். ஆனால், கர்நாடக மாநிலத்தில் அமைந்துள்ள ஒரு கோவிலை மட்டும் ஆண்டுக்கு ஒரு முறை தான் திறக்கிறார்கள். அதுவும் 15 நாட்களுக்கு மட்டுமே. அதன் பின்னர் ஆண்டு முழுவதும் மூடியே கிடக்கிறது. அதன் பின்னணி கதையை பார்ப்போமா?

கர்நாடகாவில் உள்ள ஹாசன் மாவட்டத்தில் ஹசனம்பா கோயில் உள்ளது. ஆண்டு முழுவதும் மூடிக்கிடக்கும் இந்த கோவிலை தீபாவளி சமயத்தில் மட்டும் திறக்கின்றனர். அம்மன்களுக்கு அர்பணிக்கப்படும் நவராத்ரி சமயத்தில் இந்த கோவிலில் பூஜைகள் நடத்தப்படுகிறது.  கன்னட நாட்காட்டியின் அஸ்வீஜா மாதத்தின் முதல் வியாழன் அன்று ஹாசனம்பா ஜாத்ரா மஹோத்ஸவம்  தொடங்குகிறது.

தினமும் காலை 7 மணி முதல் இரவு 10 மணி வரை, மாலை 3 மணி முதல் இரவு 10 மணி வரை பொதுமக்கள் தரிசனத்திற்கு அனுமதிக்கப்படுகின்றனர். அதன் பின்னர் ஒரு வருடத்திற்கு மூடப்படுகிறது. மூடும் முன்னர் அம்மன்களுக்கு இரண்டு மூட்டை அரிசி, பூக்கள், ஏற்றி வைக்கப்பட்ட ஒரு பெரிய நெய்தீபம்  மற்றும் தண்ணீர் ஆகியவை வைக்கப்படுகின்றன. அந்த நெய் தீபம் அடுத்த ஆண்டு கோவில் திறக்கும் வரை எரிவதாக நம்புகின்றனர்.