Home /News /lifestyle /

வரலாறோடு ஒரு ட்ரெக்கிங் பயணம்- செஞ்சி கோட்டை!

வரலாறோடு ஒரு ட்ரெக்கிங் பயணம்- செஞ்சி கோட்டை!

செஞ்சி கோட்டை

செஞ்சி கோட்டை

Gingee fort: சென்னை, விழுப்புரம், பாண்டிச்சேரியில் இருக்கும் மக்கள் ஞாயிறு 1 நாள் விடுப்புக்கு எங்கே போகலாம் என்று தேடுகிறீர்களா? சென்னை வண்டலூரில் இருந்து 120 கிமீ தூரத்திலும், பாண்டிச்சேரியில் இருந்து 58 கிமீ தூரத்திலும் ஒரு வரலாற்று சிறப்புமிக்க ட்ரெக்கிங் கலந்த ஸ்பாட் சொல்கிறோம்.

மேலும் படிக்கவும் ...
சென்னை, விழுப்புரம், பாண்டிச்சேரியில் இருக்கும் மக்கள் ஞாயிறு ஒரு நாள் விடுப்புக்கு எங்கே போகலாம் என்று தேடுகிறீர்களா? சென்னை வண்டலூரில் இருந்து 120 கிமீ தூரத்திலும், பாண்டிச்சேரியில் இருந்து 58 கிமீ தூரத்திலும் ஒரு வரலாற்று சிறப்புமிக்க ட்ரெக்கிங் கலந்த ஸ்பாட் சொல்கிறோம்.

செஞ்சி கோட்டை தான் அது. காலை முதல் மாலை வரை குடும்பத்துடன் செலவழித்து வர சரியான இடம். மலை, கோட்டை, கோவில், குளம், வியூ பாயிண்ட் என்று பலவற்றை இந்த சுற்றுலா தளம் கொண்டுள்ளது.



செஞ்சி இந்திய வரலாற்றின் மிகக் கொடூரமான மற்றும் வீரமிக்கப் போர்களை சந்தித்த இடமாகும். ராஜகோட்டையின் இராணுவ வியூகத்தால் கவரப்பட்ட வீர சிவாஜி அதை " இந்தியாவின் அசைக்க முடியாத கோட்டை" என்று பாராட்டியுள்ளார்.
இது ஆங்கிலேயர்களால் "கிழக்கின் டிராய்" என்று அழைக்கப்பட்டது. நாயக்கர் மற்றும் முகலாயர்களின் கட்டிடக்கலையின் கலவை இது.

வரலாறு:
இந்த கோட்டை முதலில் 1190 AD இல் கோனார் வம்சத்தின் அனந்த கோனால் கட்டப்பட்டது.பல்லவர்கள், பாண்டியர்கள், ஹொய்சாலர்கள்,கைகளுக்கு மாறி கிபி 1677 இல், சத்ரபதி சிவாஜியின் தலைமையில் மராட்டியர்களுக்காக சுபேதார் ஹர்ஜி ராஜேமஹாதிக் கோட்டையைக் கைப்பற்றினார். பிஜப்பூர் சுல்தான்கள், மொகலாயர்கள், கர்நாடக நவாப்கள், பிரெஞ்சுக்காரர்கள் மற்றும் இறுதியாக 1761 இல் ஆங்கிலேயர்கள் கைகளுக்கு மாறியது.

வானில் பறக்க ரெடியா? சென்னையில் பாராகிளைடிங், பாராமோட்டரிங் ஐடியாக்கள்

தேசிங்கு ராஜா என்றழைக்கப்பட்ட அரசர் தனது 22 வயதில் 500 குதிரைப்படை மற்றும் 350 குதிரை வீரர்களுடன் 10000 குதிரைப்படை மற்றும் 8000 குதிரை வீரர்களைக் கொண்ட ஆற்காடு/முகலாயப் படையை எதிர்த்து போரிட்டார். அந்த போரில் தேசிங்கு ராஜா இறந்தபின் தான் இது ஆற்காடு நவாப்புகளுக்கு கைமாறியதாக இந்த கோட்டை குறித்த பிரபலமான கதை உண்டு.

அமைப்பு:
கோட்டை வளாகம் 3 மலைகளுக்கு (கிருஷ்ணகிரி, ராஜகிரி மற்றும் சக்கிலிதோர்க்/சந்திரயந்துர்க்) மத்தியில் முக்கோணமாக அமைந்துள்ளது. ராஜகிரியின் உச்சியில் ராஜகோட்டை, கிருஷ்ணகிரியின் உச்சியில் ராணிக்கோட்டை அமைந்துள்ளது. மூன்று மலைகளும் 13 கிமீ நீளமுள்ள கோட்டைச் சுவரால் நன்கு பாதுகாக்கப்படுகின்றன

கிருஷ்ணகிரி மலையை சாலையில் இருந்து பார்த்தால் நன்றாக தெரியும். ராணி கோட்டை மலையின் 500 அடி உயரத்தில் அமைந்துள்ளது. அங்கு படிக்கட்டுகள் வழி செல்லவேண்டும். கொஞ்சம் செங்குத்தான மலை தான். ஆனால் ஏறுமளவு தான் இருக்கும். 3 தானிய கிடங்குகள், 2 கோவில்கள் மற்றும் சிம்மாசனத்தின் எச்சங்களை காணலாம். சிம்மாசனம் மிகவும் சுவாரஸ்யமானது, ஏனெனில் அடித்தளம் திராவிட பாணியிலும், மேல்புறம் முகலாய பாணியிலும் கட்டப்பட்டுள்ளது. அருகில் குளுமையான குளம் ஒன்றும் உள்ளது.



ராஜகிரி கோட்டை 800 அடி உயரத்தில் உள்ளது மற்றும் கிபி 1200 இல் ஆனந்த கோன் என்பவரால் கட்டப்பட்டது. கோட்டைச் சுவர் 25 அடி வரை உயர்ந்து 5 அடி தடிமன் கொண்ட கிரானைட் கற்களால் கட்டப்பட்டு உள்ளே கற்கள், சில்லுக்களால் நிரப்பப்பட்டுள்ளது. இது பல நுழைவாயில்கள் கொண்டது. கோட்டைக்கு ஏறும் போது கமலக்கண்ணி,பால ரங்கநாதர் கோவில்களைக் காணலாம். ஏழு மாடி திருமண மண்டபம் உள்ளது. நாயக்கர் கால காட்டிடக்கலை அமைப்பில் செவ்வக கோபுரம் கொண்டு அமைக்கப்பட்டுள்ளது.

படிக்கட்டு குளம்:

உள்ளே நான்கு பக்கமும் உயர்ந்த  கட்டிடங்களில் பெண்கள் தங்குவதற்கு அறைகள் கட்டப்பட்டுள்ளது. நடுவில் படிக்கட்டுகளுடன் கூடிய சதுரமான குளிக்கும் குளம் கட்டப்பட்டுள்ளது. குளத்தின் இடையில் ஒரு மண்டபமும் உள்ளது. இது ராஜகுல பெண்கள் குளிப்பதற்காக பிரத்யேகமாக கட்டப்பட்டது.



உயர்த்த உத்திரத்துடன், பெரிய பெரிய தானியக் களஞ்சியங்கள் அமைக்கப்பட்டுள்ளன. சிறை அறைகள், வளைந்த உயரமான விட்டதுடன் சான்னல்களோடு பறந்து விரிந்த உடற்பயிற்சி கூடங்கள் உள்ளது.



அதைச்சுற்றி பசுமையான புல்வெளிகள் கண்ணை கவர்கிறது. அதோடு தூண் மண்டபத்தோடு ஒரு வேணுகோபாலர் கோயிலும் கொண்டுள்ளது. ஆனைக்குளம் என்று அழைக்கப்படும் குளமும் உள்ளது.

சிதிலமடைந்த கோட்டையின் எச்சங்கள், வளைந்த கற்படிக்கட்டுகளை, நிலத்தடி ரகசிய அறைகள்,திறந்தவெளி அரசவை அமைப்பு, குதிரை கொட்டகை, யானை கட்டி வைக்கும் இடம் ஆகியவற்றை காணலாம். முகலாயர்கள் கட்டிட அமைப்பில் ஒரு மணி மண்டபமும், மலையில் இருந்து ஊரை பார்க்க கண்காணிப்பு கோபுரமும் உள்ளது.

பயணத்தின் போது டிராவல் பேகில் கட்டாயம் எடுத்து வைக்க வேண்டிய பொருட்கள்... மிஸ் பண்ணிடாதீங்க...

இந்திய தொல்லியல் துறை பாதுகாத்து வரும் இந்த இடத்தை காண ஜூலை முதல் ஜனவரி வரையிலான காலம் மிகச்சிறந்ததாகும். காலை 9 மணி முதல் மாலை 3 மணி வரை மலை ஏற அனுமதிக்கப்படுவர். நுழைவுக்கட்டணம் 5 ரூபாய் மட்டுமே. உணவு பொருட்கள் அருகில் கிடைக்காது. எனவே உணவு தண்ணீரை எடுத்துச்செல்ல மறவாதீர்கள். பேருந்து, கார், இருசக்கர வாகனம் என்று எதிலும் பயணிக்கலாம்.
Published by:Ilakkiya GP
First published:

Tags: Gingee, Travel, Travel Guide, Trip

அடுத்த செய்தி