Home /News /lifestyle /

பிரெஞ்சு காலனி பாண்டிச்சேரிக்கு 1 நாள் பயணத் திட்டம் இதோ..!

பிரெஞ்சு காலனி பாண்டிச்சேரிக்கு 1 நாள் பயணத் திட்டம் இதோ..!

பாண்டிச்சேரி

பாண்டிச்சேரி

பிரெஞ்சு காலனியான பாண்டிச்சேரியில் காலை முதல் மாலை வரை என்ன செய்யலாம் என்று 1 லிஸ்ட்.

பாண்டிச்சேரி என்றாலே பார்ட்டி மோட் தான். இளைஞர்கள் ஆடி பாடி நண்பர்களுடன் குதூகலமாக இருக்கும் இடம். அது மட்டும் இல்லைங்க பாண்டி… குடும்பத்தோடு ஒரு நாள் ட்ரிப்புக்கு ஐடியா தருகிறோம். 

காலையில் இருந்து மாலை வரை போதும் போதும் என்று சொல்லும் அளவிற்கு இருக்கிறது. காலை பேருந்தில் இறங்கி ஒரு டீயை அடித்துக் கிளம்பினால், நேரே அண்ணாசாலை வழி வரதராஜ பெருமாள் கோவிலுக்கு போகலாம். புளியோதரையும் வடையும் சாப்பிட்டால் அப்படி இருக்கும்.

கையில் வண்ணம் கிடைத்தால் அதை கைவண்ணம் ஆக்குவோம் என்று பாண்டிச்சேரியின் தெருக்களில் உள்ள சுவர்கள் சொல்லும். கிராஃபிட்டி எனும் கலையை பயன்படுத்தி  வரைந்த ஓவியங்கள் இருக்கும். மிஸ் பண்ணிடாதீங்க..



அப்படியே பிரெஞ்சு காலனிய வீதிகளை ரசித்துக்கொண்டே 900 மீட்டர் நடந்தால் மணக்குள விநாயகர் கோவில். திருமணத்திற்கு தயாராகும் பெண்களும் ஆண்களும் இங்கே சிறப்பு வேண்டுதல் வைப்பர். காலை 6 மணி முதல் திறந்திருக்கும்.



அடுத்த தெருவிலேயே அரவிந்தர் ஆசிரமம். காலை 8 மணி முதல் 11 மணி  வரையும்,மதியம் 2 மணி முதல் மாலை 6 மணி வரை திறந்திருக்கும். வண்டி சத்தத்திற்கு இடையில் வாழ்த்த நமக்கு ஒரு மன அமைதி தரும் இடம்.



அங்கிருந்து வடக்கு நோக்கி நான்கு வீதிகள் நடந்தால் மகாகவி பாரதியின் நினைவு இல்லம் இருக்கும். மெட்ராஸ் மாகாணத்தில் இருந்து துரத்தப்பட்ட போது பாரதி தங்கி தனது புரட்சி எழுத்துக்களை வெளியிட்ட இடம் அது. காலை 9 40 முதல் மாலை 5 20 வரை திறந்திருக்கும்.

 

அப்படியே லாலி தொல்லேண்டால் வீதியில் நடந்தால் கடற்கரை  சாலையை அடைந்துவிடலாம். அங்கிருந்து 350 மீட்டரில் புதுச்சேரி அருங்காட்சியகம் உள்ளது. நமது கலாசார பெருமைகள் மற்றும் பிரெஞ்சு அரசின் நினைவுகளை இங்கே காணலாம் . காலை 10 முதல் 5 வரை திறந்திருக்கும். இதற்கு நுழைவுக்கட்டணம் ரூ 15 மட்டுமே.



அதற்கு அருகிலேயே பாரதி பூங்கா. ஒரு காலத்தில் ஆங்கிலேயர்களால் அழிக்கப்பட்ட  ஃபோர்ட் லூயிஸின் இருப்பிடமாக  இருந்துள்ளது. 2006 ஆம் ஆண்டில், பூங்கா புதுப்பிக்கப்பட்டு, பல புதிய பிரிவுகள் சேர்க்கப்பட்டன. பசுமை வெளியில் சிறிது நேரம் நடக்கலாம். குழந்தைகள் விளையாட ஏற்றது.



ஆயி மண்டபம் பூங்காவின் மையத்தில் அமைந்துள்ளது.  பாண்டிச்சேரி நகரின் முக்கிய நீர் ஆதாரமாக ஆயி மண்டபம் இருந்தது. இந்த மண்டபம் கிரேக்க-ரோமன் கட்டிடக்கலையை பறைச்சாற்றும். 

இதையும் படித்து பாருங்க... கிழக்கு கடற்கரை சாலையில் ஒரு நாள்... குடும்பத்துடன் சுற்றிப் பார்க்க ஏற்ற இடங்கள்

பூங்கா விட்டு கிழக்கு வாசல் வழியாக வெளியே வந்தால் காந்தி திடல், எதிரே காந்தி சிலை. இந்தியாவின் மூன்றாவது உயரமான சிலை இது ராய் சவ்திரியால் உருவாக்கப்பட்டது. 4 அடி சிலையைச் சுற்றி 6 வளைந்த அரண்கள் அமைக்கப்பட்டுள்ளது. இந்த சிலைக்கு அருகில் இருந்து செஞ்சி கோட்டை வரை பாதாள வழி இருந்ததாக சொல்லப்படுகிறது.



அப்படியே காந்திக்கு பின்னால் பார்த்தால் அகண்ட வங்கக்கடல். கருப்பு பாறைகள் சூழ அமைந்துள்ளதால் ராக் பீச் என்று அழைக்கின்றனர்.



கரை ஏறினால் முதல் உலகப்போரில் பிரெஞ்சு படைக்காக போரிட்டு இறந்த இந்திய படை வீரர்களுக்காக 1971 இல் உருவாக்கப்பட்ட போர் நினைவுச்சின்னம். காலை 10 முதல் மாலை 5 வரை திறந்திருக்கும்.



சூரிய அஸ்தமனம் பார்த்து விட்டு , அப்படியே வெள்ளை நகரம் எனப்படும் காலனி வீதிகளில்  பயணித்தால் பொட்டானிக்கல் கார்டனை அடைவோம். 1607 இல் உருவாக்கப்பட்ட இது உலகின் பல இடங்களில்  இருந்து கொண்டுவரப்பட்ட அழகிய செடிகளால் அலங்கரிக்கப்பட்டுள்ளது. பாண்டிச்சேரியின் தோட்டக்கலை துறையின் தலைமை இடமாக விளங்குகிறது. குழந்தைகளுக்கு டாய் ட்ரெயின், மாலையில் நீரூற்று காட்சிகள், அக்குவாரியம் முதவற்றை பார்வையிடலாம். மாலை 6 மணி வரை அனுமதி உண்டு.

கிளம்பும் முன்னர் அங்கே உள்ள பிரெஞ்சு முறை ரெஸ்டாரண்டுகளில் சாப்பிட மறந்துடாதீங்க..
Published by:Ilakkiya GP
First published:

Tags: Pondicherry, Travel Guide, Travel Tips

அடுத்த செய்தி