ஃபிட்னஸ் பிரியர்களின் விருப்பமான காலை உணவு ஓவர் நைட் ஓட்ஸ் : உடல் எடையை குறைக்கும் எளிமையான செய்முறை

ஓவர் நைட் ஓட்ஸ் உடல் எடையைக் குறைப்போரின் ஃபேவரட் உணவு. இதை இரவு செய்துவிட்டு மறுநாள் காலை எழுந்து காலை உணவாக ஜிம் செல்வோர் கையோடு எடுத்துச் சென்று சாப்பிடுவார்கள்.

வேலைக்குச் செல்வோரும் ஜார் பாட்டிலில் போட்டு எடுத்துச் சென்று பயணம் செய்யும்போதோ அல்லது வேலைக்கு இடையிலோ சாப்பிட்டு காலை உணவை முடிப்பார்கள். இதில் அவர்களுக்கு தேவையான புரோட்டீன் சத்துக்கள் கிடைக்கும். அதேசமயம் உடல் எடைக் கூடாமலும் இருக்கும். எப்படி செய்வது என்று பார்க்கலாம்.

தேவையான பொருட்கள் :

ஓட்ஸ் - 1 கப்
தயிர் - 1/2 கப்
பால் - 3/4 கப்
பேரிட்சை - 5
சியா விதைகள் - 1/4 ஸ்பூன்
ஏலக்காய் பொடி - 1/4 ஸ்பூன்
மாதுளை - 1/2 கப்



செய்முறை

இரவு தூங்கும் முன் ஒரு பவுலில் ஓட்ஸ் சேர்த்துக்கொள்ளுங்கள். பின் அதில் கெட்டித் தயிர் சேர்த்து அதோடு பால் சேர்த்து கலந்துகொள்ளுங்கள்.

பின் சியா விதைகளை சேருங்கள். பேரிட்சை பழத்தை பிச்சிப் போடுங்கள்.

ஏலக்காய் பொடி சேர்த்துக்கொள்ளுங்கள். தற்போது நன்குக் கலக்குங்கள்.

மூன்று வேளையும் அரிசி உணவுதான் சாப்பிடுகிறீர்களா..? அதனால் உண்டாகும் பக்கவிளைவுகளை பற்றி தெரியுமா..?

அதன் மேல் மாதுளை பழ விதைகளை தூவுங்கள். அதை தற்போது அப்படியே ஒரு தட்டுப்போட்டு மூடி ஃபிரிட்ஜில் வைத்துவிடுங்கள்.

மறுநாள் காலை எடுத்துப் பார்க்க ஓட்ஸ் ஊறி குழைந்திருக்கும். தயிரின் சுவையும் ஓட்ஸ் , பேரிசை என நல்ல சுவையில் இருக்கும்.

இதை பவுல் மட்டுமன்றி ஒரு கண்ணாடி ஜாரிலும் செய்து மறுநாள் காலை வீட்டில் சாப்பிட நேரமில்லை எனில் கையோடு எடுத்து சென்று சாப்பிடலாம்.