என்ன செய்தாலும் கருவளையங்கள் போகவில்லையா..? ஊட்டச்சத்து குறைபாடு காரணமாக இருக்கலாம்...

கருவளையங்கள், சுருக்கங்கள் அற்ற கண்கள் வேண்டுமென்ற ஆசை எந்த பெண்ணுக்கு தான் இருக்காது. அப்படியொரு வசீகரமான கண்களை பெற வேண்டும் என்றால் சருமத்தையும், கூந்தலையும் பராமரிப்பது போல் கண்களுக்கு என்றும் தனி கவனம் செலுத்த வேண்டும்.

அதற்காக விலையுயர்ந்த க்ரீம்களைப் பயன்படுத்து வேண்டும் என்றில்லை. நமக்கு ஏன் கருவளையங்கள் உருவாகின்றன யோசித்தாலே போதும். நிபுணர்களின் கூற்றுப்படி, கருவளையங்கள் அழகு பிரச்சனை விட ஊட்டச்சத்து குறைபாட்டைக் குறிப்பதாக கூறுகின்றனர்.

சில ஊட்டச்சத்து குறைபாடுகள் கண்களைச் சுற்றி கருவளையங்களை ஏற்படுத்தும். இவை முக்கியமாக பல்வேறு வைட்டமின்கள் மற்றும் இரும்புச்சத்து குறைபாடு காரணமாக ஏற்படக்கூடும் என மருத்துவர்கள் தெரிவிக்கின்றனர்.

கருவளையங்கள் உருவாக காரணமான ஊட்டச்சத்து குறைபாடு பற்றி விரிவாக பார்க்கலாம்...

1. இரும்புச்சத்து:

இரும்புச்சத்து குறைபாடு, செல்கள் போதுமான ஆக்ஸிஜனைப் பெறவில்லை என்பதை குறிக்கிறது, இது கண் பகுதியைச் சுற்றி கருவளையங்கள் உருவாக வழிவகுக்கிறது. இரும்புச்சத்து குறைபாடு இரத்த சோகை மற்றும் கண்களுக்குக் கீழே உள்ள தோல் வெளிர் மற்றும் சாம்பல் நிறமாக மாற காரணமாக அமைகிறது. பச்சை காய்கறிகள், கீரை, பருப்பு, பீன்ஸ், பருப்புகள், விதைகள், பழுப்பு அரிசி, கோதுமை, உலர்ந்த பழங்கள் போன்றவற்றை எடுத்துக்கொள்வதன் மூலமாக இயற்கையாக உடலில் இரும்புச்சத்தை அதிகரிக்கலாம்.

2. வைட்டமின் கே:

வைட்டமின் கே சிறந்த சரும பராமரிப்பு பொருளாக கருதப்படுகிறது. குறிப்பாக கண்ணுக்கு கீழ் உருவாகும் கருவளையங்களை அகற்ற உதவும் க்ரீம்களில் வைட்டமின் கே பயன்படுத்தப்பட்டிருப்பதை காணலாம். வைட்டமின் K இன் குறைபாடு கண்ணைச் சுற்றியுள்ள மெல்லிய இரத்த நாளங்களின் பலவீனத்திற்கு வழிவகுக்கிறது, இது கசிவு மற்றும் கண்ணைச் சுற்றி நிறமி படிவதற்கு வழிவகுக்கிறது. பச்சை இலைக் காய்கறிகள், கீரை, காலிஃபிளவர், ப்ரோக்கோலி, முட்டைக்கோஸ், மீன், இறைச்சி மற்றும் முட்டை ஆகியவை வைட்டமின் கே நிறைந்துள்ள உணவு வகைகள் ஆகும்.

இதய நோயை உண்டாக்கும் அதிக கொலஸ்ட்ரால் : கட்டுப்படுத்த உதவும் உணவுகள்...

3. வைட்டமின் ஈ:

இது உங்கள் சருமத்தை புத்துணர்ச்சியுடனும், பொலிவுடனும் வைக்க உதவுகிறது. உங்கள் உணவில் வைட்டமின் ஈ குறைவாக இருந்தால் சருமத்தில் மந்தமான தன்மை மற்றும் முதுமை அதிகரிப்பதற்கான அறிகுறிகள் தோன்றக்கூடும். கோதுமை கிருமி எண்ணெய், சூரியகாந்தி எண்ணெய், வேர்க்கடலை, பாதாம், சூரியகாந்தி விதைகள், கீரை, ப்ரோக்கோலி போன்றவற்றிலிருந்து வைட்டமின் ஈ பெறலாம்.

4. வைட்டமின் சி:

வைட்டமின் சி பொதுவாகப் பயன்படுத்தப்படும் இயற்கையான சருமப் பொலிவு ஊட்டச்சத்துக்களில் ஒன்றாகும். இது கண்ணைச் சுற்றியுள்ள நெகிழ்ச்சி மற்றும் கொலாஜனைப் பராமரிக்கிறது மற்றும் இரத்த நாளங்களுக்கு வலிமை அளிக்கிறது, எனவே அவை கண்ணைச் சுற்றி கருவளையம் உருவாவதை தடுக்கிறது. ப்ரோக்கோலி, காலிஃபிளவர், கீரை, தக்காளி, உருளைக்கிழங்கு, எலுமிச்சை, சிட்ரஸ் பழங்கள் போன்றவை வைட்டமின் சியின் அற்புதமான ஆதாரங்கள் நிறைந்தவையாகும்.

5. வைட்டமின் ஏ:

வைட்டமின் ஏ சருமத்தில் வயதான அறிகுறிகள் தோன்றுவதை தடுக்க கூடியது. இது கொலாஜன் உற்பத்தியை அதிகரிப்பதோடு, வயதான சுருக்கங்களுக்கு எதிராகவும் போராடுகிறது. மேலும் உங்கள் கண் பகுதியின் தோல் தொனி மற்றும் அமைப்பை மேம்படுத்துகிறது. காட் லிவர் ஆயில், வெண்ணெய், பப்பாளி, தர்பூசணி, பெருங்காயம், மாம்பழம் போன்றவற்றில் வைட்டமின் ஏ இயற்கையாகவே உள்ளது.

உங்கள் கண் பகுதியை சுற்றியுள்ள சரும ஆரோக்கியத்தை பராமரிக்கவும், கருவளையங்களை தடுக்கவும் ஊட்டச்சத்துக்கள் மிகவும் முக்கியம். மேலே குறிப்பிடப்பட்டுள்ள ஊட்டச்சத்துக்களை சரியான அளவில் உணவில் சேர்த்துக்கொள்வதன் மூலமாக கருவளையங்களை தடுக்க முடியும் என நிபுணர்கள் தெரிவிக்கின்றனர்.