சுபமுகூர்த்த மாதம்.. பட்டு நகரத்துக்கு படையெடுக்கும் மக்கள்..! திணறும் காஞ்சிபுரம்

பட்டு நகரம் என்று அழைக்கப்படும் காஞ்சிபுரத்தில் பட்டுப்புடவைகளை வாங்கிட வெளிமாநில, வெளிமாவட்டங்களை சேர்ந்த மக்கள் அதிகளவிலானோர் வருகை தந்து பட்டு ஜவுளி புடவைகளை வாங்கி செல்வர். கடந்த மாதம் மார்கழியில் சுபமுகூர்த்தங்கள் இல்லாததன் காரணமாக சற்று வெறிசோடி காணப்பட்டது.

இந்தநிலையில் சுபமுகூர்த்த மாதம் என்று அழைக்கப்பட கூடிய தை  மாதத்தில் சுபமுகூர்த்த நாட்கள் அதிகம் வரக்கூடிய நிலையில் மணமக்கள் வீட்டார்கள் பட்டுப்புடவைகளை வாங்கிட அதிகளவிலானோர் காஞ்சிபுரத்திற்கு படையெடுத்துள்ளனர்.

இந்நிலையில், இன்று குடியரசு தினம் பொதுவிடுமுறையை ஒட்டி தமிழகம் மட்டுமல்லாமல் ஆந்திரா, கேரளா, கர்நாடகா போன்ற பிற மாநிலத்தில் இருந்து ஏராளமானூர் பட்டுப்புடவை எடுப்பதற்கு இன்று கூடியதால்  கடும் போக்குவரத்து நெரிசல் ஏற்பட்டது. இந்த வகையிலேயே பட்டு ஜவுளி கடைகள் மிகுந்த காஞ்சிபுரம் காந்தி சாலை பகுதியில் காலை முதலே அதிகளவிலானோர் வருகைதந்து பட்டு ஜவுளி புடவைகளை வாங்கிட அதிகளவில் தங்களுக்கு தேவையான பட்டுப்புடவைகளை வாங்கி சென்று வருகின்றனர்.

இவர்கள் வரக்கூடிய வாகனங்கள் அனைத்துமே பார்க்கிங் என்று சொல்லப்படகூடிய வாகன நிறுத்தமிடங்கள் இல்லாததால் சாலையிலேயே வாகனங்களை நிறுத்தவிட்டு சென்று விடுகின்றனர். இதன் காரணமாக அச்சாலை முழுவதுமே போக்குவரத்து நெரிசலானது ஏற்பட்டு வாகனங்கள் ஊர்ந்து செல்ல கூடிய நிலையானது ஏற்பட்டுள்ளது. அதன்படி காஞ்சிபுரம் மாநகராட்சிக்கு உட்பட்ட காந்தி சாலை, தேரடி மூங்கில் மண்டபம், கீரை மண்டபம், மேட்டு தெரு உள்ளிட்ட முக்கிய பிரதான சாலைகள் போக்குவரத்து நெரிசலை கட்டுபடுத்தபடுத்த போலீசார் ஈடுபடுத்தப்பட்டுள்ளனர். மேலும் சாலையில் நிறுத்தப்படும் அந்த வாகனங்களினால் போக்குவரத்து சீர் செய்வதில் சிரமம் ஏற்பட்டு திணறி வருகின்றனர்.

செய்தியாளர் : சந்திரசேகர் ராமச்சந்திரன் - காஞ்சிபுரம்