சாலையில் அடிபட்டு கிடந்த கரப்பான்: அடுத்து அரங்கேறிய நெகிழ்ச்சி சம்பவம்!

கரப்பானுக்கு சிகிச்சை

சாலையில் கரப்பான் பூச்சி அடிப்பட்டு கிடப்பதை கண்ட நபர், அதனை காப்பாற்றி விட வேண்டும் என்று உடனடியாக விலங்குநல மருத்துவமனைக்கு எடுத்து சென்றுள்ளார். இது குறித்த அறிந்த மருத்துவர், நெகிழ்ச்சி அடைந்ததோடு, இலவசமாக சிகிச்சையும் அளித்துள்ளார்.

  • Share this:
சாலையில் அடிப்பட்டு கிடந்த கரப்பான்பூச்சியை மருத்துவரிடம் எடுத்து சென்று சிகிச்சை அளித்த நபரின் செயல் நெகிழ்ச்சியை ஏற்படுத்தியுள்ளது.

தொழில்நுட்பம் விரிவடைந்து வரும் இன்றைய நவநாகரிக காலத்தில் முகம் கொடுத்து பேசும் மனிதர்களை காண்பதே அரிதாக உள்ளது. இத்தகைய சூழலில் மனிதம் கடந்து விலங்குகள், தாவரங்கள் போன்றவற்றை நேசிப்பவர்களும் இருக்கதான் செய்கின்றனர். ஆதரவின்றி சுற்றித்திரியும் விலங்குகளுக்கு உணவு அளிப்பது, அவற்றை தத்தெடுத்துக் கொண்டு பராமரிப்பது என தங்களால் இயன்ற பங்களிப்பை அவர்கள் தாங்கள் நேசிக்கும் விலங்குகளுக்கு செலவிட்டு வருகின்றனர்.  இந்நிலையில், தாய்லாந்து நாட்டைச் சேர்ந்த நபர் ஒருவர் கரப்பானிடம் காட்டியுள்ள நேசம் இதையெல்லாம் கடந்த ஒன்றாக கருதப்படுகிறது.

தாய்லாந்து நாட்டைச் சேர்ந்த நபர் ஒருவர், சாலையில் நடந்து சென்றுகொண்டிருந்தப்போது அடிபட்டு கிடந்த கரப்பான் பூச்சியை பார்த்துள்ளார். கரப்பான் பூச்சி இறந்துவிடக் கூடாது என எண்ணிய அந்நபர், க்ரதம் பேன் பகுதியில் உள்ள சாய் ராய் விலங்குநல மருத்துவமனைக்கு அதனை தூக்கி சென்றுள்ளார். அங்கிருந்த மருத்துவர் தனு லிம்பப்பட்டனவானிச் என்பவரிடம் அந்நபர் விவரங்களை கூறியுள்ளார்.

அந்நபரின் மனிதநேயத்தை கண்டு வியந்த மருத்துவர், கரப்பான் பூச்சிக்கு சிகிச்சை அளித்துள்ளார். இதற்காக அவர் எவ்வித கட்டணமும் வசூலிக்கவில்லை.

இதையும் படிங்க.. தடுப்பூசி செலுத்திக்கொண்டால் பீர் இலவசம்: எந்த நாட்டில் தெரியுமா?..

இது தொடர்பாக தனது முகநூல் பக்கத்தில் எழுதியுள்ள மருத்துவர் தனு லிம்பப்பட்டனவானிச், “ சாலையோரம் அடிப்பட்டு கிடந்த கரப்பான் பூச்சியை பார்த்த நபர் ஒருவர், அதனை உடனடியாக விலங்குநல மருத்துவமனைக்கு எடுத்து வந்தார். இது நகைச்சுவை அல்ல, இது ஒவ்வொரு உயிரினத்தின் மீதும் இரக்கத்தையும் பரிதாபத்தையும் குறிக்கிறது. ஒவ்வொரு வாழ்க்கையும் விலைமதிப்பற்றது, உலகில் இதுபோன்ற நபர்கள் அதிகமானோர் இருக்க வேண்டும் என விரும்புகிறேன். இரக்கம் உலகத்தை ஆதரிக்கிறது ” என்று பதிவிட்டுள்ளார்.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.

கரப்பான் பூச்சி உயிர் பிழைப்பதற்கான வாய்ப்பு 50 சதவீதம் மட்டுமே இருந்ததால், அதனை ஆக்சிஜன் உள்ள கலன் ஒன்றில் வைத்த மருத்துவர், பின்னர் அந்த நபரிடம் கரப்பான் பூச்சியை வழங்கியுள்ளார். தேவையென்றால் மீண்டும் கரப்பான் பூச்சியை சிகிச்சைக்கு எடுத்துவருமாறு அந்த நபரிடம் மருத்துவர் கூறினார். இந்த சிகிச்சைக்கு அவர் கட்டணம் வசூலிக்கவில்லை என்பது குறிப்பிடத்தக்கது.  இந்த சம்பவம் தொடர்பான மருத்துவரின் முகநூல் பதிவு தற்போது வைரலாகி வருகிறது.

அந்த கரப்பான்பூச்சி உயிர் பிழைத்ததா இல்லையா என்பது குறித்த எந்த தகவலும் கிடைக்கவில்லை. அதேவேளையில், கரப்பான் பூச்சி உயிரை காப்பாற்றுவதற்கு முயன்ற அந்த பெயர் தெரியாத நபர் மற்றும் மருத்துவர் தனு லிம்பப்பட்டனவானிச் ஆகியோரின் செயல் பலரது மனங்களையும் வென்றுள்ளது.


உடனடி செய்திகளுக்கு இணைந்திருங்கள்
Published by:Murugesh M
First published: