ஆர்ஆர்ஆர் படத்துக்கு ஆஸ்கர் கிடைக்குமா..? இன்று மாலை வெளியாகிறது அதிகாரப்பூர்வ லிஸ்ட்!

பாகுபலி, பாகுபலி 2 என்ற பிரம்மாண்ட படங்களுக்கு பிறகு ராஜமௌலி இயக்கிய படம் ஆர்ஆர்ஆர். பிரபல தெலுங்கு ஹீரோக்களான ஜுனியர் என்.டி.ஆர் இணைந்து நடித்த இந்தப் படம் சுதந்திர போராட்ட வீரர்களான அல்லூரி சீதாராம ராஜு மற்றும் கொமரம் பீம் ஆகியோரின் வாழ்க்கை வரலாற்றை அடிப்படையாகக் கொண்டு உருவாகியிருந்தது. இந்திய அளவில் பிரபல நட்சத்திரங்களான ஆலியா பட், அஜய் தேவ்கன், சமுத்திரக்கனி உள்ளிட்டோர் நடித்த இந்தப் படம் கடந்த ஆண்டு மார்ச் மாதம் வெளியாகி வசூல் சாதனை படைத்தது.

ஆஸ்கார் 2023 விருதுக்காக ஆர்ஆர்ஆர் திரைப்படம் 14 பிரிவுகளில் சமர்ப்பிக்கப்பட்டுள்ளது.  இப்படம் கோல்டன் குளோப்ஸ் 2023 விருதுக்காக இரண்டு பரிந்துரைகளைப் பெற்றிருந்தது. இந் நிலையில் இன்று நடைபெற்ற கோல்டன் குளோப்ஸ் விருது விழாவில் ஆர்ஆர்ஆர் திரைப்படத்தில் இடம்பெற்ற நாட்டு நாட்டு பாடலுக்கு ஓரிஜினல் பாடல் பிரிவில் கோல்டன் குளோப் விருது கிடைத்துள்ளது. விருதினை படத்தின் இடையமைப்பாளர் எம்.எம்.கீரவாணி பெற்றார்.

இந்நிலையில் ஆஸ்கர் ரேஸில் பங்கேற்றுள்ள ஆர் ஆர் ஆர் திரைப்படம் ஆஸ்கரை வெல்லுமா என்ற எதிர்பார்ப்பு எக்கச்சக்கமாய் எகிறியுள்ளது. இந்தியா சார்பில் அதிகாரப்பூர்வமாக படம் ஆஸ்கருக்கு அனுப்பப்படவில்லை என்றாலும் பல பிரிவுகளில் ஆர் ஆர் ஆர் திரைப்படம் விண்ணப்பிக்கப்பட்டுள்ளது. பல பிரிவுகள் இருந்தாலும் இரண்டு முக்கியமான பிரிவுகளில் ஆர் ஆர் ஆர் திரைப்படம் ஆஸ்கரை வெல்லலாம் என எதிர்பார்க்கப்படுகிறது. அதன்படி சிறந்த வெளிநாட்டு படங்களுக்கான விருது, சிறந்த ஒரிஜினல் பாடலுக்கான விருது ஆகிய இரு பிரிவுகளில் தேர்வாகலாம் என எதிர்பார்க்கப்படுகிறது.

ஆஸ்கர் விருதுக்கு தேர்வாகும் படங்களில் பட்டியல் இன்று மாலை 7 மணிக்கு அதிகாரப்பூர்வமாக வெளியாகவுள்ளதாக தகவல் வெளியாகியுள்ளது. இந்நிலையில் ஆஸ்கர் ரேஸின் அடுத்தக்கட்டத்துக்கு ஆர் ஆர் ஆர் செல்லுமா என இந்திய ரசிகர்கள் ஆர்வத்துடம் காத்திருக்கின்றனர்.