நடிகர் வடிவேலுக்கு கௌரவ டாக்டர் பட்டம் - குவியும் பாராட்டுகள்!

வைகைப் புயல் என ரசிகர்களால் அன்போடு அழைக்கப்படும் வடிவேலு தொடர்ந்து திரைப்படங்களில் நடிக்கவில்லை என்றாலும் காமெடி சேனல்களில் ஒளிபரப்பாகும் அவரது காமெடி காட்சிகள்  மக்களை மகிழ்வித்துவருகின்றன. கடந்த சில வருடங்களாக தெனாலிராமன், எலி, கத்தி சண்டை, மெர்சல் என சில படங்களில் மட்டுமே நடித்து வந்தார்.

இதனால் நீண்ட இடைவேளைக்கு பிறகு வடிவேலு நாயகனாக நடித்திருந்த நாய் சேகர் ரிட்டர்ன்ஸ் அவரது கம்பேக் படமாக இருக்கும் என ரசிகர்கள் நம்பினார்கள். நாய் சேகர் ரிட்டர்ன்ஸ் படத்தை தலைநகரம், மருதமலை படங்களின் இயக்குநர் சுராஜ் இயக்கியிருந்தார்.

தலைநகரம், மருதமலை படங்களின் காமெடி காட்சிகள் இன்றளவும் ரசிகர்களின் ஃபேவரைட். மேலும் நீண்ட இடைவேளைக்கு பிறகு சந்தோஷ் நாராயணன் இசையில் இந்தப் படத்தில் பாடல்களையும் பாடியிருந்தார். மிகப்பெரிய எதிர்பார்ப்புகளுக்கு இடையே வெளியான இந்தப் படம் கலவையான விமர்சனங்களையே பெற்றிருந்தது.

தற்போது மாரி செல்வராஜ் இயக்கத்தில் உதயநிதி ஸ்டாலின் ஹீரோவாக நடித்துள்ள மாமன்னன் படத்தில் குணச்சித்திர வேடத்தில் நடித்துள்ள வடிவேலு, சந்திரமுகி படத்தின் 2 ஆம் பாகத்தில் தற்போது நடித்துவருகிறார். முதல் பாகம் அளவுக்கு வடிவேலுவின் காமெடி காட்சிகள் ரசிகர்களிடையே வரவேற்பை பெறும் என்று கூறப்படும் நிலையில் இந்தப் படத்தின் ஸ்டில்ஸ் சமீபத்தில் வெளியாகி ரசிகர்களிடையே மிகப்பெரும் எதிர்பார்ப்பை ஏற்படுத்தியுள்ளது.

இந்த நிலையில் உயர் நீதிமன்ற நீதியரசர் வள்ளிநாயகம் தலைமையின் கீழ் இயங்கும் சர்வதேச ஊழல் தடுப்பு மற்றும் மனித உரிமைகள் ஆணையம் நகைச்சுவை நடிகர் வைகைப்புயல் வடிவேலுவுக்கு சமூகத்தின் உயரிய விருதான கெளரவ டாக்டர் பட்டம் வழங்கி சிறப்பித்துள்ளது. அவருக்கு பொழுதுபோக்கு  பிரிவின் கீழ் இந்த பட்டம் வழங்கப்பட்டது. இதையடுத்து அவருக்கு பலரும் தங்கள் வாழ்த்துகளை தெரிவித்து வருகின்றனர்.