ஷங்கர் இயக்கத்தில் விஜய் - ஷாருக்கான் இணையும் புதிய படம்?

இயக்குநர் ஷங்கர் இயக்கத்தில் நடிகர்கள் விஜய் மற்றும் ஷாருக்கான் நடிக்கவிருப்பதாக தகவல்கள் தெரிவிக்கின்றன. 

விஜய் மற்றும் ஷாருக்கான் இருவரும் முறையே தமிழ் மற்றும் இந்தியில் உச்ச நடிகர்களாக திகழ்கிறார்கள். சமீபத்தில் அவர்கள் நடிப்பில் வெளியான வாரிசு, பதான் இரண்டு படங்களும் பாக்ஸ் ஆபிஸில் பெரிய தொகையை வசூலித்துள்ளன. இரு நடிகர்களும் ஒருவருக்கொருவர் பாராட்டுகளைப் பகிர்ந்து கொள்வதை நாம் பார்த்திருந்தாலும், பெரிய திரையில் அவர்களை ஒன்றாகப் பார்க்க வேண்டும் என்பதுதான் பல ரசிகர்களின் ஆசை.

அந்த வகையில் இயக்குநர் ஷங்கர் இயக்கத்தில் விஜய் மற்றும் ஷாருக்கான் இணைந்து பணியாற்றுவார்கள் என தகவல்கள் வெளியாகியிருக்கின்றன. மெகா பட்ஜெட் படங்களை வழங்குவதில் சிறந்து விளங்கும் இயக்குனர் ஷங்கர், 900 கோடி ரூபாய் பட்ஜெட்டில் நீருக்கடியில் அறிவியல் புனைகதையை மையமாக வைத்து இரண்டு ஹீரோ சப்ஜெக்ட்டை எடுக்க திட்டமிட்டுள்ளதாகவும் கூறப்படுகிறது.

இரண்டு பிரபலமான தயாரிப்பு நிறுவனங்கள் இந்த மெகா பட்ஜெட் படத்தைத் தயாரிக்கும் என்றும் எதிர்பார்க்கப்படுகிறது. மேலும் படம் குறித்த ஆரம்ப பேச்சுக்கள் நடந்து வருகின்றன. ஷங்கர் தனது தற்போதைய படங்களான 'RC 15' மற்றும் 'இந்தியன் 2' ஆகியவற்றை முடித்ததும் அந்தப் படத்தின் வேலைகளை ஆரம்பிக்கலாம் எனவும் பிரபல ஆங்கில ஊடகத்தில் தெரிவிக்கப்பட்டுள்ளது. இருப்பினும், ஷங்கரின் இயக்கத்தில் விஜய் மற்றும் ஷாருக்கான் இணைந்து நடித்தால் கண்டிப்பாக பல பாக்ஸ் ஆபிஸ் சாதனைகளை முறியடிக்கும் என்பதில் எந்த சந்தேகமும் இல்லை.

இயக்குனர் அட்லீ இயக்கத்தில் ஷாருக்கான் நடித்துள்ள 'ஜவான்' படத்தில் விஜய் சிறப்புத் தோற்றத்தில் நடிப்பது குறிப்பிடத்தக்கது. 'பதான்' பாக்ஸ் ஆபிஸ் வசூலில் மகிழ்ந்திருக்கும் ஷாருக்கானுக்கு, 'ஜவான்' மற்றும் 'டுங்கி' ஆகிய படங்கள் இந்த ஆண்டு வரிசையாக வெளியாக உள்ளன. மறுபுறம் விஜய், லோகேஷ் கனகராஜுடன் இணைந்து 'லியோ' படத்தின் படப்பிடிப்பைத் தொடங்கியுள்ளார்.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.