ஹாலிவுட் லெவல் பிளான்... களமிறங்கும் விஜய்... லியோ படத்தின் கதை இதுதானா?

இதுநாள் வரையில் தளபதி 67 என்று அழைக்கப்பட்டு வந்த விஜய் - லோகேஷின் படத்துக்கு லியோ எனப் பெயரிடப்பட்டுள்ளது. இந்தப் படத்தின் ப்ரமோ வீடியோ சமூக வலைதளங்களில் டிரெண்டிங்கில் இருந்துவருகிறது. ப்ரமோவில் காஷ்மீரில் படு கூலாக சாக்லேட் தயாரித்துக் கொண்டிருக்கிறார் விஜய். மற்றொரு பக்கம் இரும்பு பட்டறையில் வாள் ஒன்றை செதுக்கிக் கொண்டிருக்கிறார் விஜய். பின்னணியில் சிலுவை படம் இருக்கிறது. ஒருவேளை படத்தில் இரண்டு விஜய்யா என்ற கேள்வியும் எழுகிறது.

இந்த நிலையில் முகமூடி அணிந்த கும்பல் ஒன்று அவரைத் தேடி வருவதுபோல காட்டப்படுகிறது. பின்னர் அந்த கும்பல் நெருங்கி வந்ததும் சாக்லெட்டில் முக்கி அந்த வாளை எடுத்து பிளடி ஸ்வீட் என்கிறார்.

பொதுவாக தமிழ் படங்கள் முடிவடையும் தருவாயில் தான் படத்தின் ரிலீஸ் தேதி முடிவு செய்யப்படும். ஆனால் லியோ படம் வருகிற அக்டோபர் 19 ஆம் தேதி வெளியாகும் அறிவிக்கப்பட்டுள்ளது. ஹாலிவுட்டில் படம் துவங்கும்போதே ரிலீஸ் தேதி முடிவு செய்யப்படும். சில பாலிவுட் படங்களும் இந்த நடைமுறையைக் கடைபிடிக்கின்றன. நடிகர் ரஜினிகாந்தின் ஜெயிலர் படமும் தீபாவளிக்கு வெளியாகவிருப்பதாக கூறப்படும் நிலையில் லியோ படத்தின் ரிலீஸ் தேதி அறிவிக்கப்பட்டிருப்பது குறிப்பிடத்தக்கது.

கைதி, விக்ரம் படங்களில் தமிழ்நாடு அளவிலான போதைப் பொருள் கடத்தலை பதிவு செய்திருந்தார். இதில் காஷ்மீரில் படமாக்கப்படவிருப்பதால் இந்தியா அல்லது சர்வதேச அளவிலான போதைப் பொருள் கடத்தலை பற்றிய படமாக இருக்கக் கூடும் என்று எதிர்பார்க்கப்படுகிறது. அதுமட்டுமில்லாமல் போதை சாக்லெட்டுகள் குறித்த செய்திகள் அடிக்கடி வெளியாகும் நிலையில் படத்தில் அது சார்ந்த கதையாக இருக்குமோ என்ற எண்ணத்தையும் ஏற்படுத்துகிறது.