ஜெயிலர் ஷூட்டிங்கில் தமன்னா... அவரே வெளியிட்ட வீடியோ!

நடிகை தமன்னா தான் ஜெயிலர் படப்பிடிப்பில் இணைந்துள்ளதாக இன்ஸ்டகிராம் ஸ்டோரியில் தெரிவித்துள்ளார்.

நடிகர் ரஜினிகாந்த் தற்போது தனது 169-வது படமான ‘ஜெயிலர்’ படப்பிடிப்பில் மங்களூரில் இருக்கிறார். நெல்சன் திலீப்குமார் இயக்கி வரும் இப்படத்தில் ரஜினிகாந்த், ரம்யா கிருஷ்ணன், சிவராஜ்குமார், மோகன்லால், ஜாக்கி ஷெராப், தமன்னா, யோகி பாபு, சுனில் ஆகியோர் முக்கிய வேடங்களில் நடிக்கின்றனர். கடந்தாண்டு தொடங்கிய இதன் படப்பிடிப்பு தற்போது 70% முடிந்துள்ளதாகக் கூறப்படுகிறது.

இந்நிலையில் தற்போது இன்ஸ்டாகிராமில், 'ஜெயிலர்' படப்பிடிப்பு தளத்தின் வீடியோ ஒன்றை ஸ்டோரியில் பகிர்ந்துள்ளார் தமன்னா. வீடியோவில் இயக்குநர் நெல்சன் திலீப்குமார் படப்பிடிப்பு தளத்தில் படக்குழுவினருடன் மகிழ்ச்சியாக உரையாடுவதைக் காண முடிகிறது. அந்த பதிவில் தான் ‘ஜெயிலர்’ படத்தின் படப்பிடிப்பில் இருப்பதாகவும் தமன்னா குறிப்பிட்டுள்ளார்.

இந்த வருடம் அதிகம் எதிர்பார்க்கப்பட்ட படங்களில் ஒன்று ரஜினிகாந்தின் ‘ஜெயிலர்’. அனிருத் ரவிச்சந்தர் இசையமைத்துள்ள இப்படத்தை வரும் தீபாவளிக்கு வெளியிட படக்குழுவினர் திட்டமிட்டுள்ளனர். ‘ஜெயிலர்’ படத்தைத் தொடர்ந்து, ‘ஜெய் பீம்’ இயக்குநர் ஞானவேலுடன் புதிய படத்தில் இணைவதாகக் கூறப்படுகிறது. அதோடு ஐஸ்வர்யா ரஜினிகாந்த் இயக்கத்தில் உருவாகி வரும் ‘லால் சலாம்’ படத்தில் ரஜினிகாந்த் சிறப்புத்தோற்றத்தில் நடிப்பது குறிப்பிடத்தக்கது.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.