ராஜமௌலியின் படம் கண்களுக்கு விருந்தாக இருந்தது... பாராட்டித் தள்ளிய பிரபல ஹாலிவுட் இயக்குநர்

ராம் சரண், ஜூனியர் என்.டி.ஆர். நடிப்பில் ராஜமௌலி இயக்கத்தில் வெளியான படம் 'ஆர்ஆர்ஆர்'. இப்படம் உலகம் முழுவதும் மார்ச் 25-ஆம் தேதி வெளியானது. தெலுங்கு, தமிழ், மலையாளம், கன்னடம், இந்தி மொழிகளில் வெளியான இப்படம் நல்ல விமர்சனங்கள் பெற்றது.

இப்படத்தில் பாலிவுட் நடிகர் அஜய் தேவ்கான், ஆலியா பட், பிரகாஷ் ராஜ், சமுத்திரகனி உள்ளிட்டோர் முக்கிய கதாபாத்திரங்களில் நடித்துள்ளனர். பீம் கதாபாத்திரத்தில் ஜூனியர் என்.டி.ஆரும் ராம ராஜு கதாபாத்திரத்தில் ராம் சரணும் நடித்திருந்தனர். இப்படம் திரையரங்குகளில் வெற்றிகரமாக ஓடி உலகம் முழுவதும் ரூ.1200 கோடிக்கு மேல் வசூல் செய்து இன்னும் உலகளவில் சில திரையரங்குகளில் ஓடிக்கொண்டிருக்கிறது. 2023 ஆஸ்கார் விருதுகளுக்கு இப்படம் 14 பிரிவுகளில் சமர்ப்பிக்கப்பட்டது.

இந்நிலையில், 'ஆர்ஆர்ஆர்' திரைப்படம் கோல்டன் குளோப் விருது நாமினேஷன் பட்டியலில் இரண்டுப் பிரிவுகளில் இடம்பிடித்தது. திரைத்துறையினர் உயரிய விருதாக கருதும், ஆஸ்கர் விருதுக்கு அடுத்தப்படியாக கோல்டன் குளோப் விருது விளங்கி வருகிறது.

இந்த படத்திற்கு ராஜமௌலியின் ஆஸ்தான இசையமைப்பாளர் எம்.எம்.கீரவாணி இசையமைத்திருந்தார். இந்த படத்தில் இடம்பெற்ற பாடல்கள் நல்ல வரவேற்பை பெற்றிருந்தன. குறிப்பாக படத்தின் ஹீரோக்கள் ராம்சரண், ஜூனியர் என்.டி.ஆர். ஆடும் நாட்டுக் கூத்து பாடல் சூப்பர் ஹிட்டானது.

நாட்டு கூத்து பாடலில் இடம்பெறும் ராம் சரண், ஜூனியர் என்.டி.ஆரின் நடன காட்சிகளை பலரும் ரீ கிரியேட் செய்திருந்தனர். இன்ஸ்டாகிராமில் இதுதொடர்பான ரீல்ஸ்கள் அதிகம் பகிரப்பட்டிருந்தன. இந்நிலையில், சிறந்த ஒரிஜினல் பாடல் பிரிவில் நாட்டு கூத்து பாடலுக்கு கோல்டன் குளோப் விருது கடந்த மாதம் வழங்கப்பட்டுள்ளது.

அந்த விருது வழங்கும் விழாவில் பிரபல ஹாலிவுட் இயக்குநர்கள் ஜேம்ஸ் கேமரூன், ஸ்டீபன் ஸ்பீல்பெர்க் உள்ளிட்ட இயக்குநர்களை ராஜமௌலி சந்தித்துப் பேசினார். அவர்கள் ‘ஆர்.ஆர்.ஆர்’ படத்தைப் பாராட்டினர்.

இந்நிலையில் பிரபல ஹாலிவுட் இயக்குநர் ஸ்டீபன் ஸ்பீல்பெர்க்குடன் ஜூம் மீட்டிங் மூலம் கலந்துரையாடல் செய்யும் வாய்ப்பு எஸ்.எஸ். ராஜமௌலிக்கு கிடைத்துள்ளது.  இந்த சந்திப்பில் சினிமா குறித்து இருவரும் அதிகமாக பகிர்ந்துகொண்டனர். அது மட்டுமின்றி ராஜமௌலியை பாராட்டு மழையில் நனைய வைத்துள்ளார் ஸ்டீபன் ஸ்பீல்பெர்க்.

ஸ்டீபன் ஸ்பீல்பெர்க் பேசுகையில், உங்களை சந்திக்கும் வரையில் நான் ஆர்.ஆர்.ஆர் திரைப்படத்தை பார்க்கவில்லை. சென்ற வாரம் தான் படத்தை பார்த்தேன். மிகவும் அற்புதமான ஒரு திரைப்படம். எனது கண்களுக்கு விருந்தாக அமைந்தது என்றும் வெகுவாக பாராட்டியுள்ளார்.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.