சமூக வலைதளங்களில் லீக்கான 'ஜவான்' சண்டைக்காட்சி - அதிர்ச்சியடைந்த ஷாருக்கான், அட்லி

அட்லி இயக்கத்தில் ஷாருக்கான் தற்போது ஜவான் படத்தில் நடித்துவருகிறார். இப்படத்தில் ஷாருக்கானுக்கு ஜோடியாக நயன்தாரா நடிக்கிறார். இந்தப் படத்தில் விஜய் சேதுபதி வில்லனாக நடிக்க, அனிருத் இந்தப் படத்துக்கு இசையமைக்கிறார். இந்தப் படத்தின் டீசர் சமீபத்தில் வெளியாகியிருந்தது. ஷாருக்கானின் ரெட் சில்லிஸ் எண்டர்டெயின்மென்ட் தயாரிக்கும் இந்தப் படம் ஹிந்தி, தமிழ், தெலுங்கு, மலையாளம், கன்னட மொழிகளில் வெளியாகிறது.

இந்தப் படத்தில் பிரியாமணி, சான்யா மல்ஹோத்ரா, யோகி பாபு உள்ளிட்டோர் முக்கிய வேடங்களில் நடித்துள்ளனர். சிறப்பு வேடத்தில் நடிக்க, விஜய், அல்லு அர்ஜூன் ஆகியோரிடம் பேச்சுவார்த்தை நடைபெற்றதாகவும், இறுதியில் அந்த வேடத்தில் ராம் சரண் நடிக்கவுள்ளதாகவும் தகவல் வெளியாகியுள்ளது.

இந்தப் படத்தின் சண்டைக்காட்சிகள் சமீபத்தில் சென்னையில் படமாக்கப்பட்டது. அப்போது விக்னேஷ் சிவன் - நயன்தாராவின் அழைப்பின் பேரில் ஷாருக்கான் அவரது வீட்டுக்கு சென்றிருந்தார். பின்னர் ஷாருக்கானை வாசல் வரை வந்து நயன்தாரா வழியனுப்பிய காட்சிகள் சமூக வலைதளங்களில் வைரலாகிவருகிறது.

இந்த நிலையில் இந்தப் படத்திலிருந்து சண்டை காட்சி சமூக வலைதளங்களில் கசிந்துள்ளது. அதில் ஷாருக்கான் வில்லன்களை துணியால் அடிப்பது போன்ற காட்சி அமைந்துள்ளது. இந்தக் காட்சி ரசிகர்களிடையே வரவேற்பை பெற்றாலும் ஷாருக்கானும் அட்லியும் அதிர்ச்சியடைந்திருக்கின்றனர்.