'இந்தியன் 2'- ல் கமலுடன் மோதும் 7 வில்லன்கள் - யார் யார் தெரியுமா? இயக்குநர் ஷங்கரின் வேற லெவல் பிளான்

விக்ரம் படத்தின் பிரம்மாண்ட வெற்றிக்கு பிறகு கமல்ஹாசன் தற்போது ஷங்கர் இயக்கத்தில் ‘இந்தியன் 2’ படத்தில் நடித்துவருகிறார். கடந்த 2019 ஆம் ஆண்டே துவங்கிய இந்தப் படம் படப்பிடிப்புத் தளத்தில் ஏற்பட்ட விபத்து, கொரோனா ஊரடங்கு உள்ளிட்ட காரணங்களால் பாதியில் நின்றது. மேலும் லைக்காவுக்கும் ஷங்கருக்கும் பட்ஜெட் தொடர்பான முரண் காரணமாகவும் இந்தப் படம் தாமதமானதாக கூறப்படுகிறது.

ஒரு வழியாக சிக்கல்கள் தீர்ந்து இந்தியன் 2 படத்தின் படப்பிடிப்பு விறுவிறுப்பாக நடைபெற்றுவருகிறது. இதற்கிடையில் ராம் சரண், கியாரா அத்வானி நடிப்பில் ஆர்சி 15 படத்தையும் துவங்கியிருந்தார். ஆர்சி 15 படத்தை வாரிசு படத்தை தயாரித்துள்ள ஸ்ரீ வெங்கடேஸ்வரா சினி கிரியேஷன்ஸ் நிறுவனமே தயாரிக்கிறது. இரண்டு தயாரிப்பாளர்களுடன் பேசி தனித்தனியாக ஷெட்யூல்கள் போட்டு ஒரே நேரத்தில் இரண்டு படங்களையும் ஷங்கர் இயக்கிவருகிறார்.

தற்போது ‘இந்தியன் 2’ படத்தின் 11வது ஷெட்யூல் படப்பிடிப்பு சென்னையில் உள்ள பிரபல ஸ்டுடியோவில் தொடங்கி நடைபெற்று வருகிறது. இந்த ஷெட்யூலில் தொடர்ந்து 30 நாட்கள் படப்பிடிப்பை நடத்த கமல்ஹாசன் ஒப்புக்கொண்டுள்ளதாக கூறப்படுகிறது.

‘இந்தியன் 2’ படத்தில் கமல்ஹாசன் , காஜல் அகர்வால், பிரியா பவானி சங்கர், ரகுல் ப்ரீத் சிங், பாபி சிம்ஹா, சித்தார்த் ஆகியோர் முக்கிய வேடங்களில் நடித்துள்ளனர். இந்த படத்திற்கு அனிருத் ரவிச்சந்தர் இசையமைத்துள்ளார். இந்த நிலையில் இந்தப் படத்தில் சமுத்திரக்கனி, பாபி சிம்ஹா, ஜெயப்பிரகாஷ், குரு சோமசுந்தரம், மாரிமுத்து, வெண்ணிலா கிஷார், சிவாஜி குருவாயூர் ஆகியோர் வில்லன்களாக நடித்துள்ளதாக தகவல்கள் வெளியாகியுள்ளன.