கமலின் இந்தியன் 2 பட அப்டேட்… ஷூட்டிங்கிற்காக தென்னாப்பிரிக்கா செல்கிறது படக்குழு

படப்பிடிப்புக்காக இந்தியன் 2 படக்குழுவினர் தென் ஆப்பிரிக்கா செல்ல உள்ளனர். அங்கே முக்கியமான காட்சிகள் சில படமாக்கப்பட உள்ளதாக தகவல்கள் தெரிவிக்கின்றன. இந்தியன் படத்தின் பிரம்மாண்ட வெற்றியை தொடர்ந்து அதன் அடுத்த பாகமாக இந்தியன் 2 திரைப்படம் தற்போது படமாக்கப்பட்டு வருகிறது. 1996-இல் இந்தியன் முதல் பாகம் வெளியாகி மிகப்பெரும் வெற்றியை பதிவு செய்தது. 27 ஆண்டுகளுக்கு பின்னர் தற்போது அதன் அடுத்த பாகம் மிகப் பெரும் பொருட்செலவில் உருவாக்கப்பட்டு வருகிறது. இந்தப் படத்தை லைகா நிறுவனம் தயாரிக்கிறது. முதல் பாகத்தை இயக்கிய ஷங்கர் இரண்டாம் பாகத்தை இயக்குகிறார். அனிருத் இந்த படத்திற்கு இசையமைக்கிறார்.

இந்தப் படத்தில் கமலுடன் காஜல் அகர்வால், பிரியா பவானி சங்கர், ரகுல் ப்ரீத் சிங், பாபி சிம்ஹா, சித்தார்த் உட்பட முக்கிய நட்சத்திரங்கள் நடித்து வருகின்றனர். இந்தியன் 2 படத்தின் ஷூட்டிங் சென்னை திருப்பதி உள்ளிட்ட இடங்களில் நடைபெற்று வந்தது. இந்நிலையில் படக்குழுவினர் முக்கிய காட்சிகளை படமாக்குவதற்காக தென்னாப்பிரிக்கா செல்ல உள்ளதாக தகவல்கள் தெரிவிக்கின்றன.

படப்பிடிப்பை விரைந்து முடித்து இந்த ஆண்டுக்குள் அல்லது அடுத்த ஆண்டின் தொடக்கத்தில் இந்தியன் 2 திரைப்படம் வெளிவரும் என்று எதிர்பார்க்கப்படுகிறது. இன்னொரு பக்கம், இயக்குனர் ஷங்கர் ராம்சரண் நடிக்கும் அவரது 15வது படத்தை இயக்கி வருகிறார். கமல்ஹாசன் தனது 234 ஆவது படத்தில் மணிரத்னத்துடன் இணைகிறார். இந்த படத்திற்கு ஏ.ஆர்.ரஹ்மான் இசையமைக்கிறார். அவரது 233 ஆவது படத்தை எச். வினோத்  இயக்குவார் என்று எதிர்பார்க்கப்படுகிறது. இந்த படங்களை தொடர்ந்து விக்ரம் 2 படமும் கமலின் நடிப்பில் உருவாக உள்ளது