ஹாலிவுட்டில் ரீமேக்காகும் கமலின் ‘பாபநாசம்’ திரைப்படம்... உற்சாகத்தில் ரசிகர்கள்..!

விக்ரம் படத்தின் மாபெரும் வெற்றிக்கு பிறகு நடிகர் கமல்ஹாசன் தற்போது இந்தியன் 2 படத்தில் நடித்து வருகிறார். பிரமாண்ட இயக்குநர் ஷங்கர் இயக்கும் இந்தப் படத்துக்கு ரவிவர்மன் ஒளிப்பதிவு செய்ய அனிருத் இசையமைக்கிறார். இந்தப் படத்தின் படப்பிடிப்பு தற்போது விறுவிறுப்பாக நடைபெற்று வருகிறது.

இதனையடுத்து மணிரத்னம் இயக்கத்தில் கமல்ஹாசன் நடிக்கவுள்ளதாக அறிவிக்கப்பட்ட நிலையில், அதற்கு முன்னதாக வினோத் இயக்கத்தில் ஒரு படத்தில் நடிக்கவுள்ளதாக தகவல்கள் பரவி வருகின்றன. எனினும் அந்த தகவல்கள் உறுதிப்படுத்தப்படாமலேயே இருக்கின்றன.

இந்த நிலையில் மலையாளத்தில் மோகன்லால் நடித்து பெரும் வெற்றிப்பெற்ற திரிஷ்யம் பட தமிழ் ரீமேக்கான பாபநாசம் படத்தில் கமல் நடித்திருந்தார். மலையாளத்தில் இயக்கிய ஜீத்து ஜோசப் தான் தமிழிலும் இயக்கியிருந்தார். கடந்த 2015 ஆம் ஆண்டு வெளியான இந்தப் படம் மலையாளத்தைப் போலவே தமிழிலும் பெரும் வெற்றியைப் பதிவு செய்தது. தெலுங்கு, ஹிந்தி மொழிகளிலும் ரீமேக் செய்யப்பட்டது.

அதனைத் தொடர்ந்து இதன் இரண்டாம் பாகம் தமிழைத் தவிர மற்ற மொழிகளிலும் வெளியாகி நல்ல வரவேற்பைப் பெற்றன. இந்த நிலையில் திரிஷ்யம் படம் தற்போது ஹாலிவுட்டில் ரீமேக் செய்யப்படவிருக்கிறதாம். ஹாலிவுட்டில் ரீமேக் செய்யும் உரிமையை பனோரமா ஸ்டுடியோஸ் நிறுவனம் கைப்பற்றியுள்ளதாக கூறப்படுகிறது.

மேலும் கொரிய, ஜப்பானிய மொழிகளில் ரீமேக் செய்யும் உரிமையை பெற அந்நிறுவனம் பேச்சுவார்த்தையில் ஈடுபட்டுவருகிறதாம். இதுதொடர்பான அதிகாரப்பூர்வ அறிவிப்பு விரைவில் வெளியாகலாம் என்று எதிர்பார்க்கப்படுகிறது. கமல்ஹாசன் ரீமேக் செய்து நடித்த திரைப்படம் ஹாலிவுட்டில் ரீமேக் ஆவது அவருடைய ரசிகர்கள் மத்தியில் உற்சாகத்தை ஏற்படுத்தியுள்ளது.