வெற்றிமாறன் படத்தில் இணையும் ஜுனியர் என்டிஆர் - தனுஷ்.. செம சர்ப்ரைஸ் காத்திருக்கு...

இயக்குநர் வெற்றிமாறன் தற்போது சூரி ஹீரோவாக நடித்துள்ள விடுதலை படத்தை இயக்கியுள்ளார். எழுத்தாளர் ஜெயமோகனின் சிறுகதையை அடிப்படையாகக் கொண்டு இந்தப் படம் தயாராகியுள்ளது. இரண்டு பாகங்களாக உருவாகியுள்ள இந்தப் படத்தில் விஜய் சேதுபதி, கௌதம் மேனன் உள்ளிட்டோர் முக்கிய வேடங்களில் நடித்துள்ளனர். முதல் பாகம் வருகிற மார்ச் 30 ஆம் தேதி வெளியாகும் என்று கூறப்படுகிறது.

இளையராஜா இசையில் இந்தப் படத்திலிருந்து ஏற்கனவே உன்னோடு நடந்தா என்ற பாடல் வெளியான நிலையில் இந்தப் படத்தின் இசை வெளியீட்டு விழா நாளை நடைபெறவிருக்கிறது. இந்த நிகழ்ச்சியில் தனுஷ் சிறப்பு விருந்தினராக கலந்துகொள்ளவிருப்பதாக தகவல் வெளியாகியுள்ளது. விடுதலை படத்துக்கு பிறகு சூர்யா நடிப்பில் வாடிவாசல் படத்தை வெற்றிமாறன் இயக்கவிருக்கிறார்.

இதற்கான ஒத்திகை கடந்த சில மாதங்களுக்கு முன் நடைபெற்றது. தாணு தயாரிக்கவுள்ள இந்தப் படத்துக்கு ஜி.வி.பிரகாஷ் இசையமைக்கிறார். இந்த நிலையில் வெற்றிமாறனின் புதிய படம் குறித்த தகவல் வெளியாகியுள்ளது. வாடிவாசல் படத்துக்கு பிறகு ஜுனியர் என்டிஆர் - தனுஷ் இணைந்து நடிக்கும் படத்தை வெற்றிமாறன் இயக்கவிருக்கிறார். இந்தப் படத்தையும் விடுதலை படத் தயாரிப்பாளர் எல்ரெட் குமார் தயாரிக்கிறார்.

சமீபத்தில் ஹைதராபாத்தில் ஜுனியர் என்டிஆரை சந்தித்து கதை ஒன்றை சொல்லியிருக்கிறார் வெற்றிமாறன். அது அவருக்கு பிடித்துப் போகவே உடனடியாக படத்தில் நடிக்க சம்மதித்ததாக கூறப்படுகிறது. இந்தப் படத்தின் அறிவிப்பு வெளியாகும் என்று எதிர்பார்க்கப்படுகிறது. வெற்றிமாறனின் அசுரன் படம் தெலுங்கில் வெங்கடேஷ் நடிப்பில் ரீமேக் செய்யப்பட்டு நல்ல வரவேற்பை பெற்றது.

சமீபத்தில் ஆர்ஆர்ஆர் படம் தொடர்பாக ஆங்கில பத்திரிகை ஒன்றுக்கு பேட்டியளித்த இயக்குநர் ராஜமௌலி, நிச்சயம் பார்க்க வேண்டிய 5 இந்திய படங்களில் ஒன்றாக வெற்றிமாறனின் ஆடுகளம் படத்தைக் குறிப்பிட்டிருந்தார்.