''சூப்பர் பா...'' 'ஜெயிலர்' படத்துக்காக நெல்சனுக்கு கிடைத்த செம பரிசு

நெல்சன் திலீப்குமார் இயக்கத்தில் ரஜினிகாந்த் தற்போது ஜெயிலர் படத்தில் நடித்துவருகிறார். ரஜினிகாந்த்தின் முந்தைய படமான அண்ணாத்த படத்துக்கும் நெல்சனின் முந்தைய படமான பீஸ்ட் படத்துக்கும் கலவையான விமர்சனங்களே கிடைத்தன. இதனால் இருவரும் ஜெயிலர் படத்தில் அதிக கவனம் செலுத்திவருகின்றனர். இந்தப் படத்தில் முத்துவேல் பாண்டியன் என்ற சிறை பாதுகாப்பு அதிகாரியாக ரஜினிகாந்த் நடித்துள்ளதாகவும் சிறையிலிருந்து தப்பிக்கும் கைதியை மீட்பது தான் இந்தப் படத்தின் கதை என்றும் கூறப்படுகிறது.

பான் இந்தியன் படமாக உருவாகும் இந்தப் படத்தில் மலையாள நடிகர் மோகன்லால், கன்னட நடிகர் சிவராஜ்குமார், தெலுங்கு நடிகர் சுனில், ஹிந்தி நடிகர் ஜாக்கி ஷெராஃப் உள்ளிட்டோர் முக்கிய வேடங்களில் நடித்துவருகின்றனர். அனிருத் இந்தப் படத்துக்கு இசையமைக்கிறார். பேட்ட, தர்பார் படங்களுக்கு பிறகு 3வது முறையாக ரஜினிகாந்த் - அனிருத் இணைந்துள்ளதால் ஜெயிலர் பட பாடல்கள் மீதான எதிர்பார்ப்பு அதிகரித்துள்ளது.

ஜாக்கி ஷெராஃப்

ஜெயிலர் படம் ஆக்சன் காட்சிகள் நிறைந்த படமாக உருவாகிவருகிறது. நடிகர் ரஜினிகாந்த்தின் பகுதிகள் பெரும்பாலும் படமாக்கப்பட்டுவிட்டதாக கூறப்படுகிறது. இந்தப் படத்தில் முக்கிய வேடத்தில் நடித்துள்ள ஜாக்கி ஷெராஃப்-க்கு இயக்குநர் நெல்சன் பணிபுரிந்த விதம் மிகவும் பிடித்துவிட்டதாம். இதனையடுத்து அவரைப் பாராட்டும் விதமாக பைக் ஒன்றை நெல்சனுக்கு ஜாக்கி ஷெராஃப் பரிசளித்திருப்பதாக தகவல்கள் தெரிவிக்கின்றன.

ரஜினிகாந்த்தும் ஜாக்கி ஷெராஃப்பும் இணைந்து ஏற்கனவே உட்டர் தக்ஷின், கோச்சடையான் ஆகிய படங்களில் இணைந்து நடித்திருக்கின்றனர். மேலும் தமிழில் ஆரண்ய காண்டம், பிகில் ஆகிய படங்களின் நடித்தன் மூலம் தமிழ் ரசிகர்களிடையே ஜாக்கி ஷெராஃப் பிரபலமானவராக இருக்கிறார்.