Hit & Run - நட்பு நாடுகளுக்கிடையிலான பனிப்போர்...!

ஹிட் & ரன் ஆகஸ்ட் 6 நெட்பிளிக்ஸில் வெளியானது. இஸ்ரேலையும், யுஎஸ்ஸையும் மையப்படுத்தி இந்த த்ரில்லர் வெப் தொடரை எடுத்துள்ளனர். சுமார் 45 நிமிடங்கள் ஓடிக்கூடிய ஒன்பது எபிசோடுகள்.

ஹிட் & ரன்னை ஏன் பார்க்க வேண்டும் என்றால், முதலாவது காரணம், எங்கும் சோர்வடையவிடாமல் பரபரவென நகர்ந்து செல்லும் கதை. குறிப்பிட்ட இடைவெளியில் எதிர்பாராத திருப்பங்களும் உண்டு. சிலவற்றை யூகிக்க முடிகிறது என்றாலும் சுவாரஸியத்துக்கு எந்த இடைஞ்சலும் இல்லை.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.

இஸ்ரேலின் இரண்டாவது பெரிய நகரமான டெல் அவிவில் டூர் கைடாக இருக்கிறார் செகவ். அவரது மனைவி ஒரு நடனக் கலைஞர். அமெரிக்கர். செகவுக்கு முதல் மனைவி மூலம் ஒரு பெண் குழந்தையும் உண்டு. அமெரிக்காவில் நடக்கும் நடன நிகழ்ச்சியில் கலந்து கொள்வதற்காக கிளம்பும் செகவின் மனைவி கார் விபத்தில் கொல்லப்படுகிறார். அவரை மோதிய கார் நிற்காமல் செல்கிறது. செகவின் மனைவி இறந்து போகிறார்.

இந்த ஹிட் & ரன்னை விசாரிக்க ஆரம்பிக்கிறார் செகவ். அவர் ஒரு முன்னாள் ராணுவ வீரர். பல வெளிநாடுகளில், பல துறைகளில் பணிபுரிந்தவர். அவரது இறந்தகால வாழ்க்கையில் ஒரு எதிரியும் அவருக்கு உண்டு. அவன் இருப்பது அமெரிக்காவில். தனது மனைவியை இடித்துவிட்டுச் சென்ற காரில் இருந்தவர்கள் இரு அமெரிக்கர்கள்என்பதை தெரிந்து கொள்ளும் செகவ் அமெரிக்கா கிளம்புகிறார். அனைத்துக்கும் அந்த எதிரிதான் காரணம் என.

ஆனால், அமெரிக்காவில் அவருக்கு அதிர்ச்சிகள் அடுத்தடுத்து காத்திருக்கின்றன. அவர் நினைத்தது போல் அது பழிவாங்க நடத்தப்பட்ட விபத்து அல்ல. யுஎஸ்ஸின் சிஐஏ க்கும், இஸ்ரேல் உளவுப்பிரிவு மொசாட்டுக்குமான பனிப்போரின் விளைவு அந்த மரணம். இதுவரை தான் உண்மையென வாழ்ந்ததெல்லாம் - மனைவி உள்பட - ஒரு பெரிய அரசியல் விளையாட்டின் புனைவு என்பதை செகவ் அறிந்து கொள்கிறார். 

Also read... Neeraj Chopra: என் பயோபிக்கில் நீரஜ் தான் நடிக்க வேண்டும்: அக்சய் குமார்

ஹிட் & ரன் கதையே கொஞ்சம் ஆச்சரியமானதுதான். யுஎஸ்ஸும், இஸ்ரேலும் நட்பு நாடுகள். உளவு ரகசியங்கள், ராணுவ தளவாடங்கள் என அனைத்தையும் பகிர்ந்து கொள்பவை. வெளியே கை குலுக்கிக் கொண்டு, திரைமறைவில் இரண்டு நாடுகளும் பரஸ்பரம் உளவுப் பார்க்கின்றன என படம் எடுப்பது சாதாரணமில்லை. யுஎஸ், இஸ்ரேல் இரு நாடுகளின் அதிருப்தியை சம்பாதிப்பதாகிவிடும். ஆனால், அங்கு அதை படைப்பு சுதந்திரம் என எடுத்துக் கொள்கிறார்கள். இல்லையென்றால் இந்த தொடரே வெளியாகியிருக்காது. 



இஸ்ரேலின் உளவுப்பிரிவான மொசாட் குறித்து நிறைய சாகஸக் கதைகள் உலவுகின்றன. உலகின் தலைசிறந்த உளவுப்பிரிவுகளில் இதுவும் ஒன்று. 1972 Munich ஒலிம்பிக்கில் பங்கெடுக்கச் சென்ற இஸ்ரேல் விளையாட்டு வீரர்கள் சுட்டுக் கொல்லப்பட்டனர். அவர்கள் யார், அதற்குப் பின்னால் இருந்தவர்கள் எவரெவர் என்பதை கண்டுபிடித்து ஒருவர் பாக்கியில்லாமல் அனைவரையும் கொன்றழித்தது மொசாட். ஸ்டீவன் ஸ்பீல்பெர்க் அதை Munich என்ற பெயரில் படமாக்கினார். மொசாட்டின் கட்டுப்பாடுகள், காத்திருப்புகள் மெய்சிலிர்க்க வைக்கும். இந்தத் தொடரில் நாயகனை மொசாட் ஆள்கள் கொலை செய்ய துரத்துவார்கள். அதிலிருந்து தப்பிப்பார். இந்த சம்பவத்தை கேள்விப்படும் யுஎஸ் அதிகாரி, அவன் (நாயகன்) இன்னும் உயிரோடு இருந்தால், கொலை செய்ய முயன்றது மொசாட் இல்லை என்பார். மொசாட் ஒருவரை குறி வைத்தால் அது யாராக இருந்தாலும் தப்பிக்க முடியாது என்பதை உணர்த்தும் வசனம் அது. 



ஹிட் & ரன்னின் இறுதியில் செகவ் அனைத்து உண்மைகளையும் கண்டறிந்து, சம்பந்தப்பட்டவர்களை பழிவாங்க, இது மினி சீரிஸ்தான், இதோடு இந்தத் தொடர் முடிந்தது என நினைக்கையில், யாரோ அவரது மகளை கடத்தி விடுகிறார்கள். அதாவது, எதிரிகள் இன்னும் இருக்கிறார்கள். தொடர் முடியவில்லை, அடுத்த சீஸன் உண்டு. 

அரசியல் படங்கள் இரண்டுவகை. அதிகாரத்தில் இருப்பவர்கள் எப்படி செயல்படுகிறார்கள், எதிரிகளை எந்த தந்திரத்தில் தடுத்து ஆட்டத்துக்கு வெளியே நிறுத்துகிறார்கள், அதற்கு அவர்கள் கொடுக்கும் விலையென்ன, தனி நபரின் அதிகாரவேட்கை நாட்டு மக்களை எப்படி பாதிக்கிறது என தெளிவானஅரசியலை முன்வைப்பவை. ஹவுஸ் ஆஃப் கார்ட்ஸ் போல. இரண்டாவது வகை, புகை மூட்டமாக ஒரு அரசியலை வைத்து, ஆக்ஷன், த்ரில்லர் என கதைப்பின்னுவது. ஹிட் & ரன் இரண்டாவதுவகை. அடுத்த சீஸனிலாவது முதல்வகையை நோக்கி கதை முன்னேறுமா என பார்க்க வேண்டும்.