RRR: பாகுபலியை விட பிரமாண்டம் - பத்து மொழிகளில் வெளியாகும் ராஜமௌலியின் ஆர் ஆர் ஆர்!

ஆர்.ஆர்.ஆர்

ரஜினியின் சில படங்கள் ஜப்பானில் ஓடியிருக்கின்றன. போர்ச்சுகல், துருக்கி, கொரியாவில் ஓடியதாக செய்தி இல்லை. சீனா ரசிகர்கள் இந்தியப் படங்களை ரசிக்கும் முறையே வேறு.

  • Share this:
பாகுபலியை விட ஆர்.ஆர்.ஆர் படத்தை மிகப்பிரமாண்ட முறையில் வெளியிடுகிறார் ராஜமௌலி. மொத்தம் 10 மொழிகளில் ஆர்.ஆர்.ஆர் வெளியாகிறது.

இந்தியாவில் தயாராகும் படம் அதிகபட்சம் ஐந்து மொழிகளில் வெளியாகும். அதற்கு மேல் சிரமம். இந்திய சினிமாவின் மார்க்கெட் வெளிநாட்டவர்கள் மத்தியில் இன்னும் டேக் ஆஃப் ஆகவில்லை. இதற்கு விதிவிலக்கு சீனா. அங்கு தங்கல் படம் 1500 கோடிகளுக்கும் அதிகமாக வசூலித்தது. அதேபோல் சீக்ரெட் சூப்பர் ஸ்டார், பிகே, அந்தாதுன் படங்கள் பல நூறு கோடிகள் வசூல் செய்தன. பிரெஞ்ச், ஸ்பானிஷ் என்று வந்தால் ஏதோ சில டாலர்கள் கிடைக்கும். கோடிகள் இன்னும் கனவு தான்.

இந்திய அளவில் அதிகம் வசூலித்தது ராஜமௌலியின் பாகுபலி 2. இந்திப் பதிப்பு மட்டுமே 510 கோடிகள். தமிழ், தெலுங்கு, கன்னடம், மலையாளம் எல்லாம் சேர்த்தால் ஆயிரம் கோடிகளை நெருங்கும். அமீர் கானின் தங்கல் இதைவிட குறைவு. ஆனால், சீனாவில் படம் அடித்து ஆடியதால் உலக அளவிலான வசூலில் பாகுபலி 2-வை பின்னுக்கு தள்ளி ஜம்மென்று முதலிடம் வந்தது தங்கல். அதை எப்படியும் முறியடிக்க வேண்டும் என்ற அடிமன ஆவேசம் ராஜமௌலிக்கு உண்டு. ஆர்.ஆர்.ஆர் படத்தை அதற்கேற்ப செதுக்கி வருகிறார். படத்தை மட்டுமில்லை, வியாபாரத்தையும்.

இந்தியாவில் தெலுங்கு, தமிழ், மலையாளம், கன்னடம், இந்தி ஆகிய ஐந்து மொழிகளில் ஆர்.ஆர்.ஆர் வெளியாகிறது. இந்தியாவில் படத்தின் டிஜிட்டல் உரிமையை ஸீ 5 மற்றும் நெட்பிளிக்ஸ் பெற்றுள்ளது. அதாவது, ஆர்ஆர்ஆர் திரையரங்கில் வெளியான பிறகு ஸீ 5 ஓடிடி தளத்தில் அதன் தமிழ், தெலுங்கு, மலையாளம், கன்னட பதிப்புகளை பார்க்கலாம். இந்தி பதிப்பு மட்டும் நெட்பிளிக்ஸில்.

ஆர்ஆர்ஆர் படத்தின் தொலைக்காட்சி உரிமையும் விற்பனையாகியுள்ளது. படத்தின் இந்திப் பதிப்பு ஸீ சினிமாவிலும், தெலுங்கு, தமிழ், கன்னட பதிப்புகள் ஸ்டார் விஜய்யிலும், மலையாளப் பதிப்பு ஏஷியாநெட்டிலும், வெளியாகும். ஆர்ஆர்ஆர் படத்தை ஆங்கிலம், போர்ச்சுகல், கொரியன், துருக்கி மற்றும் ஸ்பானிஷ் மொழிகளிலும் வெளியிடுகிறார்கள். நெட்பிளிக்ஸ் ஓடிடி தளத்தில் இந்த ஐந்து மொழிகளிலும் படத்தைப் பார்க்கலாம். இந்த மொழிகளில் படத்தை 'டப்' செய்வார்களா இல்லை சப் டைட்டிலுடன் ஓட்டுவார்களா தெரியவில்லை.

சீனாவை தவிர்த்து பிற நாடுகளில் இந்தியப் படங்கள் பெரிய அளவில் ஓடியதில்லை. ரஜினியின் சில படங்கள் ஜப்பானில் ஓடியிருக்கின்றன. போர்ச்சுகல், துருக்கி, கொரியாவில் ஓடியதாக செய்தி இல்லை. சீனா ரசிகர்கள் இந்தியப் படங்களை ரசிக்கும் முறையே வேறு.

ஹாலிவுட்டின் 'பி' கிரேடு ஆக்ஷன் படங்களையும், சூப்பர் ஹீரோ திரைப்படங்களையும் சகட்டுமேனிக்கு ரசிப்பவர்கள் இந்தியப் படங்கள் என்றால் அடிதடி தவிர்த்து உணர்வுகளுக்கே முக்கியத்துவம் தருகிறார்கள். ஹாலிவுட்டை விடவா ஆக்ஷன் காட்சியை வைத்துவிடப் போகிறீர்கள் என்று இந்திய ஆக்ஷன் படங்களை தவிர்க்கிறார்களா இல்லை, இந்தியான்னாலே உணர்ச்சிதான் என்று முடிவு செய்துவிட்டார்களா தெரியவில்லை. அந்தாதுன், சீக்ரெட் சூப்பர் ஸ்டார், ஹிந்தி மீடியம், மாம், டாய்லெட் - ஏக் பிரேம் கதா போன்ற மினிமம் பட்ஜெட் படங்கள் 100 கோடிகளை தாண்டி வசூலித்த போது பாகுபலி 2, தக்ஸ் ஆஃப் ஹிந்துஸ்தான், சுல்தான் போன்ற மெகா பட்ஜெட் ஆக்ஷன் படங்கள் மிகக்குறைவாகவே வசூலித்தன.

ஆர்ஆர்ஆர் படமும் ஆக்ஷனை மையப்படுத்தியே தயாராகியிருக்கிறது. அது வெளிநாட்டு பார்வையாளர்களை கவருமா என்பது கேள்விக்குறி. அதேநேரம், ஆர்ஆர்ஆர் என்ற வலையை உலகம் முழுக்க வரும்படி வீசியிருக்கிறார் ராஜமௌலி. சிக்குவது திமிங்கலமா இல்லை சின்ன மீன்களா என்பது படம் வரும்போது தெரிந்துவிடும்.



உடனடி செய்திகளுக்கு இணைந்திருங்கள்
Published by:Shalini C
First published: